Lô-má 第 5 章 - 巴克禮全羅

1

Só͘-í lán í-keng tùi sìn chheng-chòe-gī, chiū tùi lán ê Chú Iâ-so͘ Ki-tok ū kap Siōng-tè hô;

2

iā óa-khò I, tùi sìn lâi jı̍p tī hiān-kim só͘ tòa ê un-tián, koh ǹg-bāng Siōng-tè ê êng-kng lâi hoaⁿ-hoaⁿ hí-hí.

3

M̄ nā án-ni, chiū tī hōan-lān iā hoaⁿ-hoaⁿ hí-hí, in-ūi chai hōan-lān siⁿ-chhut thun-lún; thun-lún siⁿ-chhut láu-liān;

4

láu-liān siⁿ-chhut ǹg-bāng; iā ǹg-bāng bô tì-kàu kiàn-siàu;

5

in-ūi Siōng-tè ê thiàⁿ tùi só͘ siúⁿ-sù lán ê Sèng Sîn lâi kòan-ak lán ê sim.

6

In-ūi lán iáu-kú lóan-jio̍k ê sî, Ki-tok kàu-kî thòe ū chōe ê lâng sí.

7

In-ūi thòe gī-lâng sí ê, oh-tit ū; thòe hó-lâng sí ê, kiám-chhái ū lâng káⁿ.

8

Nā-sī Siōng-tè hián-bêng I pún-sin thiàⁿ lán ê thiàⁿ-thàng, in-ūi lán iáu-kú chòe chōe-jîn ê sî, Ki-tok thòe lán sí;

9

hô-hòng lán í-keng tī I ê huih tit-tio̍h chheng-chòe-gī beh tùi I tit-tio̍h kiù, bián-tit hit ê siū-khì ah.

10

Nā lán iáu-kú chòe tùi-te̍k ê sî, tùi I ê Kiáⁿ ê sí tit-tio̍h kap Siōng-tè koh hô, hô-hòng í-keng koh hô, beh tī I ê o̍ah tit-tio̍h kiù ah.

11

M̄ nā án-ni, lán hiān-kim í-keng tùi lán ê Chú Iâ-so͘ Ki-tok tit-tio̍h koh hô, chiū tùi I iā lia̍h Siōng-tè chòe thang khoa-kháu.

12

Só͘-í chhin-chhiūⁿ chōe tùi chı̍t lâng jı̍p sè-kan, sí iā tùi chōe jı̍p, án-ni sí piàn-piàn kàu tī chèng lâng, in-ūi chèng lâng bat hōan-chōe;

13

in-ūi lu̍t-hoat bē kàu ê sî, chōe í-keng tī sè-kan; to̍k-to̍k bô lu̍t-hoat tī-teh, chōe chiū bô sǹg-siàu;

14

chóng-sī tùi A-tong kàu Mô͘-se, liân hiah ê bô hōan-chōe chhin-chhiūⁿ A-tong hōan-tio̍h kìm-lēng ê khóan ê, sí iā lóng kóan-hat in; A-tong sī tè-āu kàu ê ê saⁿ-tùi.

15

Nā-sī chōe-kòa put-pí un-sù. In-ūi nā tùi chı̍t lâng ê chōe-kòa chèng lâng sí, hô-hòng Siōng-tè ê un-tián, kap tī Iâ-so͘ Ki-tok chı̍t lâng un-tián tiong ê siúⁿ-sù, chhiong-móa tī chèng lâng ah.

16

Koh tùi chı̍t lâng ê hōan-chōe, iā put-pí un-sù; in-ūi sím-phòaⁿ sī tùi chı̍t lâng, tì-kàu tēng chōe, nā-sī un-sù sī tùi chōe-chōe chōe-kòa, tì-kàu tòan chòe gī.

17

In-ūi nā ūi-tio̍h chı̍t lâng ê chōe-kòa, sí chiū tùi chı̍t lâng chòe ông, hô-hòng hiah ê siū un-tián kap gī ê siúⁿ-sù ê chhiong-móa ê, beh tùi Iâ-so͘ Ki-tok chı̍t-ê, tī o̍ah ê tiong-kan, chòe ông ah.

18

Án-ni chhin-chhiūⁿ tùi chı̍t pái ê chōe-kòa ū tì-kàu chèng lâng siū tēng chōe, chiū tùi chı̍t pái gī ê só͘ kiâⁿ iā tì-kàu chèng lâng siū gí-tòan tit-tio̍h o̍ah.

19

In-ūi chhin-chhiūⁿ tùi chı̍t lâng ê ûi-ke̍h hō͘ chèng lâng chòe ū chōe ê, chiū tùi chı̍t lâng ê sūn-thàn hō͘ chèng lâng chòe ū gī ê, iā sī án-ni.

20

Koh ke-chham lu̍t-hoat lo̍h-khì, beh hō͘ chōe-kòa ke-thiⁿ chōe-chōe. Chóng-sī chōe-kòa chōe-chōe, chiū un-tián tī hia it-hoat chhiong-móa;

21

chiū-sī chhin-chhiūⁿ chōe bat chòe ông tī sí ê tiong-kan, iā beh hō͘ un-tián chhin-chhiūⁿ án-ni tùi gī lâi chòe ông tì-kàu éng-o̍ah, sī tùi lán ê Chú Iâ-so͘ Ki-tok.