Lô-má 第 6 章 - 巴克禮全羅

1

Án-ni lán beh cháiⁿ-iūⁿ kóng? Chóng bô tn̂g-tn̂g tiàm-tī chōe-ok, hō͘ un-tián ke-thiⁿ chōe-chōe mah?

2

Tòan-tòan m̄ thang. Lán ǹg chōe hit bīn í-keng sí ê, kiám beh iû-gôan tī chōe-tiong lâi o̍ah mah?

3

Kiám m̄ chai lán kìⁿ-nā bat siū sóe-lé lâi jı̍p tī Ki-tok Iâ-so͘ ê, sī siū sóe-lé lâi jı̍p I ê sí.

4

Só͘-í lán kì-jiân tùi sóe-lé lâi jı̍p tī sí, kap I tâng bâi-chòng; sī chhin-chhiūⁿ Ki-tok tùi Pē ê êng-kng tùi sí-lâng tiong koh-o̍ah, iā beh hō͘ lán án-ni kiâⁿ tī o̍ah-miā ê sin khóan.

5

In-ūi lán nā liân-ha̍p tī I sí ê khóan-sit, iā beh liân-ha̍p tī I koh-o̍ah ê khóan-sit;

6

sī chai lán kū ê lâng kap I tâng tèng, hō͘ chōe ê thé ōe hòe-khì, tì-kàu lán bô koh chòe chōe-ok ê lô͘-châi.

7

In-ūi í-keng sí-ê sī tit-tio̍h chheng-chòe-gī, lâi thoat-lī chōe.

8

Taⁿ lán sìn nā kap Ki-tok tâng sí, chiū beh kap I tâng o̍ah;

9

chai Ki-tok í-keng tùi sí-lâng tiong koh-o̍ah bô koh sí, sí bô koh kóan-hat I.

10

In-ūi I ê sí sī ǹg chōe chòe chı̍t pái sí, I ê o̍ah sī ǹg Siōng-tè lâi o̍ah.

11

Án-ni lín tiàm-tī Ki-tok Iâ-so͘ tio̍h khòaⁿ ka-kī ǹg chōe sī sí, ǹg Siōng-tè sī o̍ah.

12

Só͘-í bo̍h-tit iông-ún chōe-ok chòe ông tī lín ōe sí ê seng-khu, tì-kàu lín sūn-thàn i ê su-io̍k;

13

iā bo̍h-tit chiong lín ê pah-thé hiàn hō͘ chōe-ok chòe put-gī ê khì-kū; sī tio̍h chiong pún-sin hiàn hō͘ Siōng-tè, chhin-chhiūⁿ tùi sí-lâng tiong lâi o̍ah ê, iā hiàn lín ê pah-thé hō͘ Siōng-tè, chòe gī ê khì-kū.

14

In-ūi chōe-ok bô koh kóan-hat lín, in-ūi lín m̄ sī tī lu̍t-hoat ē, sī tī un-tián ē.

15

Án-ni chiū cháiⁿ-iūⁿ? Lán kì-jiân m̄ sī tī lu̍t-hoat ē, sī un-tián ē, thang hōan-chōe mah? Tòan-tòan m̄ thang.

16

Kiám m̄ chai lín hiàn pún-sin chòe lô͘-po̍k lâi sūn-thàn i, chiū-sī chòe só͘ sūn-thàn ê ê lô͘-po̍k, he̍k-sī chòe chōe-ok ê lô͘-po̍k tì-kàu sí, á-sī chòe sūn-thàn ê lô͘-po̍k tì-kàu gī?

17

Kám-siā Siōng-tè in-ūi lín chêng chòe chōe-ok ê lô͘-po̍k, taⁿ bat kam-sim sūn-thàn lín só͘ jı̍p hit ê kàu-hùn ê kui-bô͘;

18

í-keng tit-tio̍h tháu-pàng thoat-lī chōe, chiū chòe gī ê lô͘-po̍k.

19

Góa in-ūi lín jio̍k-thé ê láon-jio̍k, chiū chiàu lâng ê sū lâi kóng; in-ūi chhin-chhiūⁿ lín bat ēng lín ê pah-thé hiàn hō͘ ù-òe put-hoat chòe lô͘-po̍k, tì-kàu put-hoat, taⁿ tio̍h chiàu án-ni ēng lín ê pah-thé hiàn hō͘ gī chòe lô͘-po̍k, tì-kàu chiâⁿ sèng.

20

In-ūi lín chêng chòe chōe-ok ê lô͘-po̍k, hit sī lín bô hō͘ gī kóan-hat.

21

Tng hit sî lín tit-tio̍h sím-mı̍h ké-chí tī hiān-kim só͘ kiàn-siàu ê ah? in-ūi in ê kiat-kio̍k sī sí.

22

Taⁿ lín í-keng tit-tio̍h tháu-pàng thoat-lī chōe-ok, lâi chòe Siōng-tè ê lô͘-po̍k, tit-tio̍h ké-chí tì-kàu chiâⁿ-sèng, hit ê kiat-kio̍k sī éng-o̍ah.

23

In-ūi chōe-ok ê kang-chîⁿ sī sí, nā-sī Siōng-tè ê un-sù sī éng-o̍ah, chāi-tī lán ê Chú Ki-tok Iâ-so͘.