Ngá-ko 第 4 章 - 巴克禮全羅

1

Góa só͘-thiàⁿ-ê, khòaⁿ ah, lí chin-súi, khòaⁿ ah, lí chin súi, Tī phè ê lāi-bīn lí ê ba̍k-chiu chhin-chhiūⁿ kap; Lí ê thâu-mn̂g chhin-chhiūⁿ soaⁿ-iûⁿ kui-tīn; Tó tī Ki-lia̍t ê soaⁿ-piⁿ.

2

Lí ê chhùi-khí chhin-chhiūⁿ tú-á chián-mn̂g ê chı̍t-kûn iûⁿ, sóe chheng-khì chiūⁿ--lâi, Ta̍k-chiah ū siang-siⁿ kiáⁿ, bô chı̍t-chiah sit-lo̍h i ê kiáⁿ.

3

Lí ê chhùi-tûn chhin-chhiūⁿ chu-âng sòaⁿ, Lí ê chhùi iā siⁿ-chòe hó, Lí ê pìn-piⁿ tī phè-lāi, Chhin-chhiūⁿ chı̍t-tè sia̍h-liû.

4

Lí ê ām-kún chhin-chhiūⁿ Tāi-pı̍t ê tâi, khí chòe kun-chong(**chông)-ke̍k; Piah-téng tiàu chı̍t-chheng ê pîn-pâi, Lóng sī ióng-sū ê tîn-pâi.

5

Lí ê nn̄g ê lin, chhin-chhiūⁿ chı̍t-tùi lo̍k-á, Chia̍h-chháu tī pek-ha̍p-hoe-tiong, Chiū-sī lo̍k-bú siang-siⁿ--ê.

6

Kàu jı̍t liâng-léng, iáⁿ chhun-tn̂g ê sî, Góa beh khì bu̍t-io̍h soaⁿ, kap jú-hiuⁿ ê soaⁿ-thâu.

7

Góa só͘-thiàⁿ-ê, lí ôan-chôan súi, Lí bô chı̍t-tiám-á hâ-chhû.

8

Góa ê sin-niû, lí tio̍h tùi Lī-pa-lùn kap góa lâi, tùi Lī-pa-lùn kap góa lâi, Tùi A-má-ná ê téng-bīn, tùi Sī-nî-jíⁿ kap Hek-bûn ê téng-bīn; Tùi sai ê hia̍t, tùi pà ê soaⁿ khòaⁿ--lo̍h-khì.

9

Góa ê sió-bē ah, góa ê sin-niû ah, Lí to̍at góa ê sim, lí ēng ba̍k-chiu chı̍t-ē khòaⁿ, Ēng lí ê ām-kún ê chı̍t-tiâu kim-liān-á, to̍at góa ê sim.

10

Góa ê sió-bē, góa ê sin-niû, lí ê ài-chêng cháiⁿ-iūⁿ hiah bí-biāu. Lí ê ài-chêng cháiⁿ-iūⁿ pí chiú khah-hó; Lí ê ko-iû ê phang-bī cháiⁿ-iūⁿ pí it-chhè ê hiuⁿ-liāu khah-iâⁿ.

11

Góa ê sin-niû ah, lí ê chhùi-tûn chhin-chhiūⁿ bı̍t-pô͘ teh tih, Lí ê chı̍h-ē ū bı̍t ū ni; Lí ê i-ho̍k ê phang-bī chhin-chhiūⁿ Lī-pa-lùn ê phang-bī.

12

Góa ê sió-bē, góa ê sin-niû, chiū-sī koaiⁿ-só ê hn̂g; Khàm-ba̍t ê chíⁿ, hong-ba̍t ê chúi-chôaⁿ.

13

Lí só͘ chhut sī sia̍h-liû ê hn̂g, ū siōng-hó ê ké-chí, Chńg-kah-hoe kap ná-ta̍t ê chhiū.

14

Ū ná-ta̍t kap hoan-âng-hoe, Chhiong-pô͘ kap jio̍k-kùi, í-kı̍p chiah ê jú-hiuⁿ, Bu̍t-io̍h, tîm-hiuⁿ, kap it-chhè siōng-téng ê hiuⁿ-liāu.

15

Lí sī hn̂g-tiong ê chúi-chôaⁿ, o̍ah-chúi ê chíⁿ, Tùi Lī-pa-lùn lâu--lo̍h-lâi ê khoe-chúi.

16

Pak-hong ah, tio̍h khí-lâi, lâm-hong ah, tio̍h lâi, Chhe-lâi góa ê hn̂g, hō͘ i ê phang-bī hoat-chhut; Gōan góa só͘ lôan-ài-ê jı̍p i ê hn̂g-lāi, Chia̍h i hó ê ké-chí.