Ngá-ko 第 5 章 - 巴克禮全羅

1

Góa ê sió-bē, góa ê sin-niû ah, góa jı̍p góa ê hn̂g-lāi, Bán góa ê bu̍t-io̍h kap góa ê hiuⁿ-liāu, Chia̍h góa ê bı̍t-pô͘ kap góa ê bı̍t; Lim góa ê chiú kap góa ê ni; Góa chiah ê pêng-iú, tio̍h lâi chia̍h; Góa só͘ lôan-ài-ê, lâi lim, koh lim chōe-chōe.

2

Góa khùn, góa ê sim iáu cheng-sîn; Che sī góa lôan-ài-ê ê siaⁿ, i phah-mn̂g, kóng, Góa ê sió-bē, góa só͘ thiàⁿ-ê, góa ê kap, Góa ê sûn-chôan-ê, kiû lí kā góa khui-mn̂g; In-ūi góa ê thâu-khak lō͘-chúi móa-móa; Góa ê thâu-mn̂g hō͘ mî--sî ê lō͘-chúi tih-tâm.

3

Góa í-keng thǹg góa ê saⁿ, beh cháiⁿ-iūⁿ koh chhēng? Góa í-keng sóe góa ê kha, cháiⁿ-iūⁿ thang koh phah lâ-sâm ah?

4

Góa só͘ lôan-ài--ê, tùi mn̂g-khang chhun-chhiú jı̍p--lâi; Góa ê sim-tn̂g ūi-tio̍h i lâi kek-tōng.

5

Góa khí-lâi, beh kā góa só͘ lôan-ài-ê khui-mn̂g; Góa ê nn̄g ki chhiú ê bu̍t-io̍h tih--lo̍h-khì, Góa ê chńg-thâu-á ū bu̍t-io̍h-chiap tih tī mn̂g-chhòaⁿ pìⁿ.

6

Góa kā góa só͘ lôan-ài-ê khui-mn̂g; Chóng-sī góa só͘ lôan-ài-ê í-keng o̍at-tńg-sin khì lah; Góa ūi-tio̍h i ê ōe, sîn put-hū-thé; Góa chhē i iā chhē-bōe-tio̍h; góa kiò i, i iā bô ìn.

7

Siâⁿ-lāi sûn-cha ê lâng tú-tio̍h góa, Phah góa, siong góa; Kò͘ siâⁿ-chhiûⁿ ê lâng chhiúⁿ góa moa seng-khu ê kun.

8

Iâ-lō͘-sat-léng ê chèng cha-bó͘-gín-ná ah, Góa chhiat-chhiat hoan-hù lí, nā tú-tio̍h góa só͘ lôan-ài-ê, tio̍h kā i kóng, Góa in-ūi ài-chêng tì-pīⁿ.

9

Lí chit ê lú-kài-tiong tē-it súi-ê ah, Lí só͘ lôan-ài-ê, pí pa̍t-ê só͘ lôan-ài-ê ū sím-mı̍h khah-iâⁿ? Lí só͘ lôan-ài-ê, pí pa̍t-ê só͘ lôan-ài-ê ū sím-mı̍h khah-iâⁿ, Lí chiah án-ni chhiat-chhiat hoan-hù góan?

10

Góa só͘ lôan-ài-ê, sī pe̍h koh âng, Sī bān-lâng-tiong ê tē-it-ê.

11

I ê thâu-khak chhin-chhiūⁿ siōng-hó ê kim, I ê thâu-mn̂g sûi--lo̍h-lâi, o͘ chhin-chhiūⁿ o͘-a.

12

I ê ba̍k-chiu chhin-chhiūⁿ khoe-piⁿ ê kap, Ēng ni sóe i, an-tì ha̍p-sek.

13

I ê chhùi-phóe chhin-chhiūⁿ phang-hoe kui-pâi, chhin-chhiūⁿ phang-chháu ê tâi, I ê chhùi-tûn chhin-chhiūⁿ pek-ha̍p-hoe, koh tih-lo̍h bu̍t-io̍h-chiap.

14

I ê nn̄g-chhiú chhin-chhiūⁿ kim-khôan siuⁿ n̂g-ge̍k; I ê seng-khu chhin-chhiūⁿ tiau-khek ê chhiūⁿ-gê, chiu-ûi siuⁿ lâm-pó-chio̍h.

15

I ê kha-thúi chhin-chhiūⁿ sia̍h-chio̍h, an tī hó-kim ê chō; I ê khóan-sit chhin-chhiūⁿ Lī-pa-lùn, Koh chin-súi chhin-chhiūⁿ pek-hiuⁿ-chhiū.

16

I ê ōe ke̍k-kî tiⁿ, i ôan-chôan thang thiàⁿ; Iâ-lō͘-sat-léng ê chèng cha-bó͘-gín-ná ah, Che sī góa só͘ lôan-ài-ê, che sī góa ê pêng-iú.