Sat-ka-lī-a 第 13 章 - 巴克禮全羅

1

Tng hit-jı̍t beh ūi-tio̍h Tāi-pı̍t ê ke kap Iâ-lō͘-sat-léng khiā-khí ê peh-sìⁿ khui chı̍t ê chúi-chôaⁿ, sóe-tû chōe-ok kap lâ-sâm.

2

Bān-kun ê Iâ-hô-hoa kóng, Tng hit-jı̍t, Góa beh tùi chit ê tōe-hng tû-khì ngó͘-siōng ê miâ, bô koh hō͘ lâng kì-liām; iā beh hō͘ sian-ti kap ù-òe ê sîn lī-khui chit só͘-chāi.

3

Nā ū lâng chhàm-gú, siⁿ i ê pē-bú beh kā i kóng, Lí bōe tit-tio̍h o̍ah, in-ūi lí thok Iâ-hô-hoa ê miâ kóng pe̍h-chha̍t; siⁿ i ê pē-bú, tī i chhàm-gú ê sî, beh chiong i chha̍k-thàu.

4

Hit-jı̍t hiah ê sian-ti, ta̍k-ê tī in chhàm-gú ê sî, beh ūi-tio̍h in ê īⁿ-siōng lâi kiàn-siàu, bô koh chhēng ū mn̂g ê saⁿ lâi phiàn lâng;

5

i beh kóng, Góa m̄-sī sian-ti, góa sī choh-sit lâng; góa tùi sòe-hàn chiū chòe lâng ê lô͘-po̍k.

6

Ū lâng beh mn̄g i kóng, Lí nn̄g chhiú ê tiong-kan sī sím-mı̍h siong ah? I beh ìn kóng, Che sī góa tī pêng-iú ê ke-tiong só͘ siū ê siong.

7

Bān-kun ê Iâ-hô-hoa kóng, To-kiàm ah, tio̍h khí-lâi kong-kek Góa ê bo̍k-chiá, iā kong-kek hit-ê kap Góa chòe tâng-phōaⁿ ê lâng; phah bo̍k-chiá, iûⁿ-kûn chiū sì-sòaⁿ; hiah-ê bî-sòe--ê, Góa beh o̍at-tńg chhiú kàu tī in.

8

Iâ-hô-hoa kóng, Chit ê chôan-tōe ê lâng, nn̄g-hūn beh siū chián-tû lâi sí; chı̍t-hūn beh lâu--teh.

9

Góa beh hō͘ chit-ê saⁿ-hūn-chı̍t keng-kè hé, thòan-liān in chhin-chhiūⁿ thòan-liān gûn, chhì-liān in chhin-chhiūⁿ chhì-liān kim; in beh kiû-kiò Góa ê miâ, Góa beh ìn in; Góa beh kóng, Che sī Góa ê peh-sìⁿ; in iā beh kóng, Iâ-hô-hoa sī góa ê Siōng-tè.