Sat-ka-lī-a 第 14 章 - 巴克禮全羅

1

Khòaⁿ ah, Iâ-hô-hoa ê jı̍t beh kàu, lí ê hè-châi beh hō͘ lâng pun tī lín tiong-kan.

2

In-ūi Góa beh chū-chı̍p bān-kok kap Iâ-lō͘-sat-léng kau-chiàn; siâⁿ beh siū kong-phòa, chhù-the̍h beh siū chhiúⁿ-kiap, hū-jîn-lâng beh siū lêng-jio̍k; siâⁿ-lāi ê peh-sìⁿ chı̍t-pòaⁿ siū lâng lia̍h--khì; só͘ chhun ê peh-sìⁿ iû-gôan tī siâⁿ-lāi, bô tì-kàu chián-tû.

3

Hit-sî Iâ-hô-hoa beh chhut-khì kap hiah ê kok kau-chiàn, chhin-chhiūⁿ chiông-chêng lîm-tīn ê jı̍t kau-chiàn chı̍t-iūⁿ.

4

Tng hit-jı̍t, I ê kha beh khiā tī Kaⁿ-ná soaⁿ, chit ê soaⁿ tī Iâ-lō͘-sat-léng thâu-chêng ê tang-sì; Kaⁿ-ná soaⁿ beh tùi tiong-ng lı̍h-khui, tùi tang kàu sai, chiâⁿ-chòe ke̍k-tōa ê soaⁿ-kok; soaⁿ ê chı̍t-pòaⁿ î-sóa ǹg-pak, chı̍t-pòaⁿ î-sóa ǹg-lâm.

5

Lín beh tùi Góa ê soaⁿ-kok-tiong tô-cháu, in-ūi soaⁿ-kok beh thàu-kàu A-sat, lín beh tô-cháu chhin-chhiūⁿ Iû-tāi ông Ou-se-ngá ê nî-kan, ūi-tio̍h tōe-tāng ê tô-cháu chı̍t-iūⁿ; Iâ-hô-hoa góa ê Siōng-tè beh lîm-kàu, lóng-chóng ê sèng--ê kap Lí lâi.

6

Hit-jı̍t ê kng, beh m̄-chiâⁿ kng m̄-chiâⁿ àm.

7

Beh ū chı̍t ê te̍k-pia̍t jı̍t, sī Iâ-hô-hoa só͘ chai--ê, m̄-sī jı̍t, iā m̄-sī mî; kàu ê-hng-sî chiah ū kng.

8

Hit-jı̍t beh ū o̍ah-chúi tùi Iâ-lō͘-sat-léng chhut--lâi; chı̍t-pòaⁿ lâu-khì tang-hái, chı̍t-pòaⁿ lâu-khì sai-hái; tang-thiⁿ hē-thiⁿ lóng sī án-ni.

9

Iâ-hô-hoa beh tī chôan-tōe chòe ông; tng hit-jı̍t Iâ-hô-hoa to̍k-it, I ê miâ iā sī to̍k-it.

10

Chôan-tōe tùi Ka-pa kàu Iâ-lō͘-sat-léng lâm-hng ê Lîm-bûn, beh piàn chhin-chhiūⁿ A-la̍h-pa; Iâ-lō͘-sat-léng beh seng-kôaiⁿ tiàm tī i ê pún só͘-chāi, chiū-sī tùi Piān-ngá-bín ê mn̂g, kàu thâu-chı̍t-ê mn̂g ê só͘-chāi, koh kàu kak-thâu ê mn̂g, ia̍h tùi Hap-lâm-gia̍p ê lâu, tı̍t-kàu ông ê chiú-khut.

11

Beh ū lâng tiàm tī hit tiong-kan, bô koh ū chiù-chó͘; Iâ-lō͘-sat-léng beh an-jiân khiā-khí.

12

Hiah ê lia̍t-kok kap Iâ-lō͘-sat-léng kau-chiàn--ê, Iâ-hô-hoa beh ēng chit-hō ê chai-ē kong-kek in; in ê kha iáu khiā-teh ê sî, in ê bah beh hiú-nōa, ba̍k-chiu beh hiú-nōa tī ba̍k-chiu-khang, chı̍h beh hiú-nōa tī chhùi-lāi.

13

Tng hit-jı̍t Iâ-hô-hoa beh hō͘ in tiong-kan tōa jiáu-lōan; in ta̍k-lâng ēng chhiú saⁿ-khiú, koh khí-chhiú saⁿ kong-kek.

14

Iû-tāi iā beh kap Iâ-lō͘-sat-léng kau-chiàn; hit-sî sì-ûi lia̍t-kok ê hè-châi, chiū-sī kim, gûn, i-chiûⁿ, beh chū-chı̍p chōe-chōe.

15

Hit-ê só͘ beh kàu tī bé, lô, lo̍k-tô, lû, í-kı̍p iâⁿ-tiong it-chhè ê cheng-siⁿ ê chai-ē, kap chit ê chai-ē chı̍t-poaⁿ-iūⁿ.

16

Só͘-ū lâi kong-kek Iâ-lō͘-sat-léng ê lia̍t-kok chhun ê lâng, beh nî-nî chiūⁿ-lâi kèng-pài tōa ê Ông, bān-kun ê Iâ-hô-hoa, iā siú Tah-liâu-choeh.

17

Tōe-chiūⁿ bān-cho̍k-tiong, kìⁿ-nā bô chiūⁿ Iâ-lō͘-sat-léng kèng-pài tōa ê Ông, bān-kun ê Iâ-hô-hoa--ê, beh bô lo̍h-hō͘ tī in hia.

18

Ai-kı̍p cho̍k nā bô chiūⁿ-lâi, beh bô hō͘ tī in hia; beh ū chai-ē, chiū-sī Iâ-hô-hoa ēng lâi kong-kek hiah-ê bô chiūⁿ-lâi siú Tah-liâu-choeh ê lia̍t-kok-ê.

19

Che chiū-sī Ai-kı̍p ê hêng-ho̍at, iā-sī hiah-ê bô chiūⁿ-lâi siú Tah-liâu-choeh ê lia̍t-kok ê hêng-ho̍at.

20

Tng hit-jı̍t, bé ê hâm-lêng beh khek-jī kóng, Chòe sèng kui tī Iâ-hô-hoa; Iâ-hô-hoa tiān-lāi ê e, beh chhin-chhiūⁿ tôaⁿ-chêng ê óaⁿ. Kìⁿ-nā Iâ-lō͘-sat-léng kap Iû-tāi ê e, lóng beh chòe-sèng kui bān-kun ê Iâ-hô-hoa; kìⁿ-nā hiàn-chè--ê, lóng beh ēng chiah ê e, chú-bah tī hit lāi-bīn; tng hit-jı̍t, tī bān-kun ê Iâ-hô-hoa ê tiān-lāi, bô koh ū Ka-lâm lâng.