Sat-ka-lī-a 第 4 章 - 巴克禮全羅

1

Hit-ê kap góa kóng-ōe ê sù-chiá koh lâi kiò góa chhíⁿ, chhin-chhiūⁿ lâng teh khùn siū kiò-chhíⁿ chı̍t-iūⁿ.

2

I kā góa kóng, Lí khòaⁿ-kìⁿ sím-mı̍h? Góa kóng, Góa khòaⁿ-kìⁿ, khòaⁿ ah, ū chı̍t ê teng-tâi, sī kui-ki ēng kim chòe--ê, téng-bīn ū chı̍t-ê iû-kūi, teng-tâi téng ū chhit chóaⁿ teng; téng-bīn ê teng-chóaⁿ, ū chhit-tiâu-kńg;

3

koh ū nn̄g-châng ê kaⁿ-ná-chhiū, chı̍t-châng tī iû-kūi ê chiàⁿ-pêng, chı̍t-châng tī iû-kūi ê tò-pêng.

4

Góa mn̄g kap góa kóng-ōe ê sù-chiá kóng, Góa ê chú ah, chiah-ê sī sím-mı̍h?

5

Kap góa kóng-ōe ê sù-chiá ìn góa kóng, Lí m̄-chai chiah-ê sī sím-mı̍h mah? Góa kóng, Góa ê chú ah, góa m̄-chai.

6

I ìn góa kóng, Che sī Iâ-hô-hoa hoan-hù Só͘-lô-pa-pek ê ōe kóng, M̄-sī ēng kôan-sè, m̄-sī ēng lêng-le̍k, chiū-sī ēng Góa ê Sîn; che sī bān-kun ê Iâ-hô-hoa kóng--ê.

7

Tōa-soaⁿ ah, lí sī sím-mı̍h? tī Só͘-lô-pa-pek ê bīn-chêng, lí beh chiâⁿ-chòe pîⁿ-tōe; i beh hō͘ chhù-kak-thâu ê chio̍h chhut-lâi, koh ū tōa hoaⁿ-hí ê siaⁿ kiò kóng, Un-hūi, un-hūi kui i.

8

Iâ-hô-hoa ê ōe koh lîm-kàu góa kóng,

9

Só͘-lô-pa-pek ê chhiú ū hē chit keng tiān ê tōe-ki, i ê chhiú ia̍h beh ôan chit ê kang; lí chiū chai bān-kun ê Iâ-hô-hoa chhe góa kàu lín chia.

10

Chī-chūi khòaⁿ-khin chit ê sió-khóa sū ê jı̍t ah? Chí(Chit) chhit-ê, sī Iâ-hô-hoa ê ba̍k-chiu, óng-lâi tī chôan-tōe, khòaⁿ-kìⁿ Só͘-lô-pa-pek ê chhiú the̍h chîn-sòaⁿ, chiū hoaⁿ-hí.

11

Góa koh mn̄g i kóng, Chit ê teng-tâi chó-iū nn̄g châng kaⁿ-ná-chhiū sī sím-mı̍h ì-sù?

12

Góa koh mn̄g i kóng, Kaⁿ-ná-chhiū ê nn̄g-ki, tùi nn̄g-tiâu kim ê kńg lâu-chhut kim-iû, sī sím-mı̍h ì-sù?

13

I ìn góa kóng, Lí m̄-chai chiah-ê sī sím-mı̍h ì-sù mah? Góa kóng, Góa ê chú ah, góa m̄-chai.

14

I kóng, Che sī nn̄g ê siū-boah-iû--ê, khiā tī phó͘ thiⁿ-ē ê Chú ê piⁿ-á.