Sat-ka-lī-a 第 5 章 - 巴克禮全羅

1

Góa koh kia̍h-ba̍k khòaⁿ-kìⁿ ū chı̍t pak chhak teh pe.

2

I kā góa kóng, Lí khòaⁿ-kìⁿ sím-mı̍h? Góa ìn kóng, Góa khòaⁿ-kìⁿ chı̍t pak chhak teh pe; i ê tn̂g jī-cha̍p tiú, khoah cha̍p-tiú.

3

I chiū tùi góa kóng, Chit-ê sī chhut-khì kàu chôan-tōe-chiūⁿ ê chiù-chó͘; kìⁿ-nā thau-the̍h-ê, beh chiàu chit-pak ê chit-pêng tû-bia̍t i; kìⁿ-nā chiù-chōa-ê beh chiàu chit-pak ê hit-pêng tû-bia̍t i.

4

Bān-kun ê Iâ-hô-hoa kóng, Góa beh hō͘ i chhut-khì, i beh jı̍p thau-the̍h ê lâng ê chhù, iā jı̍p kí Góa ê miâ lām-sám chiù-chōa ê lâng ê chhù; beh tòa tī i ê chhù-lāi húi-bia̍t i, í-kı̍p i ê chhâ i ê chio̍h.

5

Kap góa kóng-ōe ê sù-chiá chhut-lâi tùi góa kóng, Lí tio̍h kia̍h-ba̍k khòaⁿ chit ê chhut-lâi-ê sī sím-mı̍h.

6

Góa kóng, Che sī sím-mı̍h ah? I kóng, Chit-ê sī chhut-khì ê i-hoat. I koh kóng, Tī chôan-tōe ê lāi-bīn, in ê hêng-chōng sī án-ni;

7

(khòaⁿ ah, ū chı̍t-phìⁿ îⁿ ê iân siū kú-khí;) koh ū hū-jîn-lâng chē tī i-hoat ê lāi-bīn.

8

I kóng, Chit-ê sī chōe-ok; chiū chiong i hiat tī i-hoat ê lāi-bīn; iā chiong hit phìⁿ ê iân khàm tī i-hoat ê chhùi.

9

Góa koh kia̍h-ba̍k khòaⁿ; khòaⁿ ah, ū nn̄g ê hū-jîn-lâng chhut-lâi, tī in ê sı̍t ū hong; in ê sı̍t chhin-chhiūⁿ ho̍h ê sı̍t; in chiong i-hoat kng--khí-lâi tī thiⁿ kap tōe ê tiong-kan.

10

Góa tùi kap góa kóng-ōe ê sù-chiá kóng, In kng i-hoat khì toh-lo̍h?

11

I kā góa kóng, Beh kā i khí chhù tī Sī-ná tōe; chhù nā piān, chiū chiong i an-tì tī ka-kī ê só͘-chāi.