Sat-ka-lī-a 第 7 章 - 巴克禮全羅

1

Tāi-lī-o͘ ông sì-nî káu-ge̍h, chiū-sī Ki-su-liû ge̍h, chhoe sì, Iâ-hô-hoa ê ōe lîm-kàu Sat-ka-lī-a.

2

Hit-sî Pek-te̍k-lī lâng í-keng chhe Sa-lī-sek kap Lī-kian-bí-le̍k kap tè in ê lâng khì kiû-un tī Iâ-hô-hoa,

3

iā mn̄g bān-kun ê Iâ-hô-hoa tiān-lāi ê chè-si í-kı̍p sian-ti kóng, Góa le̍k-nî í-lâi tī gō͘-ge̍h-kan thî-khàu ka-kī hun-piat, taⁿ iáu-kú tio̍h án-ni kiâⁿ mah?

4

Bān-kun ê Iâ-hô-hoa ê ōe lîm-kàu góa kóng,

5

Lí tio̍h kā chit só͘-chāi ê chèng peh-sìⁿ kap chè-si kóng, Lín chhit-cha̍p nî kú, tī gō͘-ge̍h chhit-ge̍h kìm-chia̍h pi-ai kiám-sī ūi-tio̍h Góa, ūi-tio̍h Góa, kìm-chia̍h mah?

6

Lín he̍k-sī chia̍h he̍k-sī lim, kiám m̄-sī lín teh-chia̍h, lín teh-lim mah?

7

Tng Iâ-lō͘-sat-léng kap sì-ûi ê siâⁿ ū khiā-khí ê peh-sìⁿ koh hong-sēng, lâm-hng kap pîⁿ-iûⁿ ū lâng khiā-khí ê sî, Iâ-hô-hoa thok-tiōng chêng ê sian-ti só͘ soan-thôan ê ōe, lín kiám-m̄-tio̍h thiaⁿ mah?

8

Iâ-hô-hoa ê ōe koh lîm-kàu Sat-ka-lī-a kóng, Bān-kun ê Iâ-hô-hoa bat án-ni kóng,

9

Tio̍h chiàu chin-sı̍t ê kong-pêng lâi sím-phòaⁿ, tāi-ke ēng chû-ài lîn-bín lâi saⁿ khóan-thāi;

10

m̄-thang khi-hū kóaⁿ-hū ko͘-jî, chhut-gōa lâng, kap sòng-hiong lâng; m̄-thang sim-lāi kè-bô͘ pháiⁿ-tāi lâi saⁿ-hām-hāi.

11

Chóng-sī in m̄-khéng thiaⁿ-thàn, o̍at-tńg keng-thâu pōe-ge̍k, that-ba̍t in ê hī-khang tì-kàu bōe thiaⁿ.

12

Koh hō͘ in ê sim ngī chhin-chhiūⁿ sōan-chio̍h, bián-tit thiaⁿ lu̍t-hoat, kap bān-kun ê Iâ-hô-hoa ēng I ê Sîn thok chêng ê sian-ti só͘ kóng ê ōe; só͘-í bān-kun ê Iâ-hô-hoa tōa-tōa hoat siū-khì.

13

In-ūi I bat kiò, in m̄-thiaⁿ, án-ni in beh kiò, Góa iā m̄-thiaⁿ; che sī bān-kun ê Iâ-hô-hoa kóng--ê;

14

nā-sī Góa beh ēng kńg-lê-hong chhe-sòaⁿ in kàu in só͘ m̄-bat ê lia̍t-kok. Án-ni chit ê tōe tī in khì ê liáu-āu pìⁿ-chòe pha-hng, tì-kàu bô lâng óng-lâi keng-kè; in-ūi in hō͘ thang hoaⁿ-hí ê tōe pha-hng lah.