Sat-ka-lī-a 第 8 章 - 巴克禮全羅

1

Bān-kun ê Iâ-hô-hoa ê ōe lîm-kàu kóng,

2

Bān-kun ê Iâ-hô-hoa án-ni kóng, Góa ūi-tio̍h Sek-an ke̍k-kî jia̍t-sim, Góa ūi-tio̍h i jia̍t-sim, hoat-chhut tōa siū-khì.

3

Iâ-hô-hoa án-ni kóng: Góa taⁿ tò--lâi Sek-an, beh tiàm tī Iâ-lō͘-sat-léng ê tiong-kan; Iâ-lō͘-sat-léng beh chheng-chòe Sêng-sı̍t ê siâⁿ; bān-kun ê Iâ-hô-hoa ê soaⁿ beh chheng-chòe Sèng ê soaⁿ.

4

Bān-kun ê Iâ-hô-hoa án-ni kóng: Chiong-lâi beh ū lāu ê ta-po͘-lâng lāu ê hū-jîn-lâng chē tī Iâ-lō͘-sat-léng khoah ê koe-lō͘, in-ūi nî-lāu ta̍k-ê kia̍h kóaiⁿ-á.

5

Siâⁿ-lāi khoah ê koe-lō͘ beh ū ta-po͘-gín-ná cha-bó͘ gín-ná móa-móa thit-thô tī hit ê koe-lō͘-tiong.

6

Bān-kun ê Iâ-hô-hoa án-ni kóng, Tng-jı̍t só͘ chhun ê peh-sìⁿ khòaⁿ che chòe kî-kòai, Góa kiám iā khòaⁿ chòe kî-kòai mah? Che sī bān-kun ê Iâ-hô-hoa kóng--ê.

7

Bān-kun ê Iâ-hô-hoa án-ni kóng: Khòaⁿ ah, Góa beh kiù Góa ê peh-sìⁿ tùi jı̍t-chhut ê só͘-chāi iā tùi jı̍t-lo̍h ê só͘-chāi tò--lâi;

8

Góa beh chhōa in lâi, in beh khiā-khí tī Iâ-lō͘-sat-léng ê tiong-kan; in beh chòe Góa ê peh-sìⁿ, Góa beh chòe in ê Siōng-tè, pîn sêng-sı̍t kap kong-gī.

9

Bān-kun ê Iâ-hô-hoa án-ni kóng: Tng hē bān-kun ê Iâ-hô-hoa ê chhù ê tōe-ki, thang khí tiān-tn̂g, hit-jı̍t sian-ti só͘ kóng ê ōe, hiān-chāi lín thiaⁿ-kìⁿ, taⁿ tio̍h ióng-chòng lín ê chhiú.

10

Hit-jı̍t í-chêng lâng bô tit-tio̍h kang-chîⁿ, cheng-siⁿ iā bô tit-tio̍h kang-chîⁿ, koh in-ūi tùi-te̍k ê iân-kò͘, chhut-jı̍p ê lâng bô tit-tio̍h pêng-an; in-ūi Góa hō͘ chèng-lâng saⁿ kong-kek.

11

Chóng-sī Góa taⁿ khóan-thāi chiah ê chhun ê peh-sìⁿ bô beh chhin-chhiūⁿ chêng ê jı̍t; che sī bān-kun ê Iâ-hô-hoa kóng--ê.

12

In-ūi beh ū pêng-an ê chéng-chí, phû-tô-chhiū beh kiat ké-chí, tōe beh chhut thó͘-sán, thiⁿ beh lo̍h lō͘-chúi; Góa beh hō͘ chiah ê chhun ê peh-sìⁿ sêng-siū chiah-ê it-chhè.

13

Iû-tāi ke kap Í-sek-lia̍t ke ah, chêng tī lia̍t-kok-tiong ín-khí lín lâi chiù-chó͘, án-ni góa beh chín-kiù lín, hō͘ lâng ín-khí lín lâi chiok-hok; lín bo̍h-tit kiaⁿ, lín ê chhiú tio̍h ióng-chòng.

14

In-ūi bān-kun ê Iâ-hô-hoa án-ni kóng: Lín ê lia̍t-chó͘ jiá Góa ê siū-khì ê sî, Góa siūⁿ beh kàng chai-ē tī lín, iā bô thè-hóe;

15

taⁿ Góa iā án-ni siūⁿ beh si-un hō͘ Iâ-lō͘-sat-léng kap Iû-tāi ke; lín bo̍h-tit kiaⁿ; che sī Iâ-hô-hoa kóng--ê.

16

Lín só͘ eng-kai kiâⁿ-ê sī án-ni: Ta̍k-lâng kap chhù-piⁿ kóng-ōe sêng-sı̍t; tī lín ê siâⁿ-mn̂g kiâⁿ sêng-sı̍t kap hô-pêng ê sím-phòaⁿ;

17

sim-lāi m̄-thang kè-bô͘ pháiⁿ-tāi, hāi chhù-piⁿ; m̄-thang ài lām-sám chiù-chōa; in-ūi chiah ê sū lóng sī Góa só͘ òan-hūn--ê; che sī Iâ-hô-hoa kóng--ê.

18

Bān-kun ê Iâ-hô-hoa ê ōe lîm-kàu góa kóng,

19

Bān-kun ê Iâ-hô-hoa án-ni kóng: Sì-ge̍h ê kìm-chia̍h, gō͘-ge̍h ê kìm-chia̍h, chhit-ge̍h ê kìm-chia̍h, cha̍p-ge̍h ê kìm-chia̍h, tī Iû-tāi ke beh chòe hoaⁿ-hí khòai-lo̍k, tek-ì ê choeh-kî; só͘-í lín tio̍h ì-ài sêng-sı̍t kap hô-pêng.

20

Bān-kun ê Iâ-hô-hoa án-ni kóng: Chiong-lâi ū lia̍t-kok ê lâng kap chōe-chōe siâⁿ khiā-khí ê peh-sìⁿ beh kàu;

21

khiā-khí chit ê siâⁿ ê peh-sìⁿ beh kàu hit ê siâⁿ, kóng, Lán tio̍h kín-kín khì kiû Iâ-hô-hoa ê un, khì chhē bān-kun ê Iâ-hô-hoa; lūn-kàu góa, góa iā beh khì.

22

Beh ū chōe-chōe peh-sìⁿ kap kiông-tōa ê kok lâi Iâ-lō͘-sat-léng chhē bān-kun ê Iâ-hô-hoa, kiû Iâ-hô-hoa ê un.

23

Bān-kun ê Iâ-hô-hoa án-ni kóng: Tng hiah ê jı̍t tùi lia̍t-kok bān-cho̍k-tiong beh ū cha̍p-lâng khîⁿ chı̍t ê Iû-tāi lâng ê saⁿ-á-ku, khîⁿ i, kóng, Góan beh kap lín saⁿ-kap khì, in-ūi góan thiaⁿ-kìⁿ Siōng-tè kap lín tī-teh.