Sat-ka-lī-a 第 9 章 - 巴克禮全羅

1

Iâ-hô-hoa be̍k-sī ê ōe kàu tī Hap-tek-la̍h, iā beh thêng-hioh tī Tāi-má-sek; (in-ūi sè-kan lâng kap Í-sek-lia̍t ta̍k chi-phài ê ba̍k-chiu lóng ǹg Iâ-hô-hoa), kap óa-kūn ê Hap-má;

2

í-kı̍p Chhui-lô Se-tùn, in-ūi i ū tōa tì-hūi.

3

In-ūi Chhui-lô ūi ka-kī khí ōe-só͘, chek-chū gûn chhin-chhiūⁿ thô͘-soa, chek-chū hó-kim chhin-chhiūⁿ koe-lō͘ ê thô͘-bê.

4

Khòaⁿ ah, Chú beh kóaⁿ i chhut, iā beh pāi-hōai i ê hái-kôan; i beh hō͘ hé sio-bia̍t.

5

A-sı̍t-ki-lûn beh khòaⁿ-kìⁿ lâi kiaⁿ; Ka-sat khòaⁿ-kìⁿ, iā chin kan-khó͘; Í-kek-lûn iā khòaⁿ-kìⁿ, in-ūi sit-bāng lâi kiàn-siàu; Ka-sat tek-khak bô koh ū kun-ông, A-sı̍t-ki-lûn bô lâng khiā-khí.

6

Cha̍p-chéng-lâng beh khiā-khí tī A-sı̍t-tu̍t; Góa beh tû-bia̍t Hui-lī-sū lâng ê kiau-ngō͘.

7

Góa beh tû--khì i chhùi-lāi kâⁿ huih ê bah, kap i chhùi-khí tiong khó-ò͘ⁿ ê mı̍h; i só͘ chhun ê lâng beh kui lán ê Siōng-tè; i beh tī Iû-tāi chhin-chhiūⁿ cho̍k-tiúⁿ; Í-kek-lûn beh chhin-chhiūⁿ Iâ-pò͘-su ê lâng.

8

Góa beh chat-iâⁿ ûi Góa ê chhù, tí-tng kun-peng, tì-kàu bô lâng óng-lâi; pō-gio̍k ê lâng iā bô tùi in hia keng-kè; in-ūi Góa taⁿ chhin-ba̍k khòaⁿ-kìⁿ i.

9

Sek-an ê cha-bó͘-kiáⁿ ah, tio̍h tōa-tîm hoaⁿ-hí, Iâ-lō͘-sat-léng ê cha-bó͘-kiáⁿ ah, tio̍h chhut hoaⁿ-hí ê siaⁿ; khòaⁿ ah, lí ê ông lâi chiū-kūn lí; i sī kong-gī koh kiâⁿ chín-kiù, un-jiû, koh khiâ-lû kap lû só͘ siⁿ ê lû-á-kiáⁿ.

10

Góa beh tû--khì Í-hoat-liân ê chiàn-chhia kap Iâ-lō͘-sat-léng ê chiàn-bé, kau-chiàn ê keng iā beh tû--khì; I beh tùi lia̍t-kok thôan hô-pêng; I ê kôan-pèng beh tùi chit ê hái kàu hit ê hái, tùi Tōa-hô kàu tōe-ke̍k.

11

Lūn-kàu lí, Góa ēng lí ê iok ê huih, tháu-pàng lí hiah ê siū-lia̍h-khì koaiⁿ ê lâng chhut bô chúi ê chíⁿ.

12

Lín hiah ê siū-lia̍h-khì koaiⁿ iā ū ǹg-bāng ê lâng ah, tio̍h tò--lâi ōe-só͘; Góa kin-á-jı̍t thôan-pò͘, beh ka-pē hêng lí.

13

Góa ēng Iû-tāi chòe Góa só͘ bán ê keng, ēng Í-hoat-liân chòe an tī keng ê chìⁿ; Sek-an ah, Góa beh kek-tōng lí ê peh-sìⁿ kong-kek Ngá-ôan ê peh-sìⁿ, hō͘ lí chhin-chhiūⁿ ióng-sū ê to-kiàm.

14

Iâ-hô-hoa beh chhut-hiān tī in ê téng-bīn; I ê chìⁿ beh siā-chhut chhin-chhiūⁿ sih-nà; Chú Iâ-hô-hoa beh pûn sàu-kak, chē lâm-hng ê kńg-lê-hong lâi kiâⁿ.

15

Bān-kun ê Iâ-hô-hoa beh pó-hō͘ in; in beh thun-bia̍t tùi-te̍k, thún-ta̍h só͘ hiat-lâi ê chio̍h; in beh lim lâi hoah, chhin-chhiūⁿ lim-chiú; in beh chhin-chhiūⁿ tóe-móa ê óaⁿ, chhin-chhiūⁿ tôaⁿ-téng hiah ê kak.

16

Hit-jı̍t Iâ-hô-hoa in ê Siōng-tè beh chín-kiù in, chhin-chhiūⁿ I ê peh-sìⁿ ê iûⁿ-kûn; in-ūi in beh chhin-chhiūⁿ bián-liû ê pó-chio̍h, kú-khí kôaiⁿ-kôaiⁿ tī I ê tōe-chiūⁿ.

17

I ê jîn-chû tōa kàu cháiⁿ-iūⁿ! I ê súi hó-khòaⁿ kàu cháiⁿ-iūⁿ! ngó͘-kok beh hō͘ siàu-liân lâng ióng-kiāⁿ, sin-chiú hō͘ chāi-sek-lú iā án-ni.