歷代志上 第 16 章 - 台語漢字羅馬本

1
扛上帝的約櫃,下佇大衛所給伊搭的布棚內,也獻燒祭及平安祭佇上帝的面前。
2
大衛獻燒祭及平安祭明白,就用耶和華的名給百姓祝福,
3
閣分互以色列的眾人,無論男女,逐人互一個餅,一塊肉,一個葡萄餅。
4
大衛派幾若個利未人佇耶和華的約櫃前服事,來紀念稱謝,謳咾耶和華──以色列的上帝:
5
做頭的是亞薩,第二個是撒迦利雅,閣有雅設、示米拉末、耶悅、瑪他提雅、以利押、比拿雅、俄別以東、耶利,彈瑟彈琴;只有亞薩拍大聲的鐃鈸;
6
祭司比拿雅及雅哈悉常常佇上帝的約櫃前歕號頭。
7
彼日,大衛起頭定著用亞薩及伊的兄弟感謝耶和華:
8
恁著感謝耶和華,求叫伊的名,佇萬百姓的中間報揚伊的所做!
9
著向伊吟詩,向伊唱歌謳咾,談論伊一切奇妙的所行。
10
著因為伊聖名來誇口;尋耶和華的人,心內著歡喜。
11
著尋耶和華及伊的權能,常常尋見伊的面。
12
伊的奴僕以色列的後裔,
13
伊所揀雅各的子孫啊,恁著數念伊所做奇妙的事及伊的神蹟,及伊的嘴判斷的話。
14
伊是耶和華──咱的上帝,全地攏有伊的判斷。
15
著記念伊的約,直到永遠;伊所吩咐的話,直到萬代,
16
就是及亞伯拉罕所立的約,對以撒所咒的誓。
17
伊閣將此個約對雅各定著做律例,對以色列定著做永遠的約,
18
講:我欲將迦南地賞賜你,做恁產業的份額。
19
當時恁的人丁有限,數額少少,閣佇遐做出外;
20
對此族行到彼族,對此族到別個百姓。
21
伊無容允甚麼人欺負,為著的緣故譴責君王,
22
講:呣通摸著我受抹油者,也呣通歹款待我的先知!
23
全地攏著向耶和華唱歌!日日傳報伊的救恩。
24
佇列邦的中間講起伊的榮光,佇萬百姓的中間講起伊奇妙的所做。
25
因為耶和華做大,應該受極大的謳咾;伊佇眾上帝的頂面,應該受敬畏。
26
因為列邦的上帝攏是虛假,獨獨耶和華創造諸個天。
27
佇伊的面前有尊貴及威嚴,佇伊的所在有權能及歡喜。
28
百姓中的逐族啊,恁著將權能榮光歸互耶和華,歸互耶和華!
29
用伊的名所應該得著的榮光歸互耶和華,帶禮物來到伊的面前;著用聖潔的妝飾敬拜耶和華。
30
全地佇伊的面前愕愕惙,世界堅固搖動。
31
願天歡喜,地快樂;佇列邦中著講:耶和華做王!
32
願海及其中所充滿的攏出大聲;願田園及其中所有的攏快樂。
33
彼時,樹林內的樹木欲佇耶和華的面前出歡喜的聲,因為伊來欲審判全地。
34
恁著感謝耶和華;因為伊是好,伊的慈愛永遠佇!
35
著講:拯救阮的上帝,求你救阮,聚集阮,救阮脫離列邦人,通互阮祝謝你的聖名,掠你的受謳咾做大悅。
36
著謳咾耶和華──以色列的上帝,對永遠到永遠。眾百姓攏講:「阿們!」閣謳咾耶和華。
37
大衛留亞薩及伊的兄弟佇耶和華的約櫃前常常服事佇約櫃前,照逐日的工所著做的;
38
閣留俄別以東及的兄弟六十八人,以及耶杜頓的子俄別以東,及何薩做顧門者;
39
也留祭司撒督及伊的兄弟眾祭司佇基遍高的所在,耶和華的會幕前,
40
通佇燒祭的壇頂,逐日早暗獻燒祭互耶和華,照耶和華命令以色列人的律法一切所記載的。
41
及做陣的有希幔、耶杜頓,及其餘受揀選記名者,通感謝耶和華,因為伊的慈愛永遠佇。
42
及做陣的有希幔、耶杜頓是用號頭及鐃鈸,以及上帝的樂器來互許個唱歌者。耶杜頓的子孫是做顧門者。
43
對按呢眾百姓逐人倒去的家;大衛也倒去給伊的家祝福。

如需更多版本聖經,請到台灣聖經公會聖經網站瀏覽與查詢
台語漢字羅馬本聖經,部份字因為電腦編碼關係,需造字,無法正常顯示,您可使用「並排閱讀」功能,可同時顯示台語漢字羅馬本與巴克禮全羅,或點選連結:http://www.sl-pc.org.tw/bible/4_3,不便之處請包涵,上帝祝福您!