列王紀上 第 6 章 - 台語漢字羅馬本

1

以色列人出埃及地了後四百八十年，所羅門做以色列王第四年西弗月，就是二月，動工起耶和華的殿。

2

所羅門王為耶和華所起的殿，長六十肘，闊二十肘，高三十肘。

3

彼塊厝殿前的廊長二十肘，及伊的厝的闊平，佇厝的頭前伊的闊十肘；

4

閣為著厝做窗，有關死的窗仔子。

5

倚佇厝的牆，四圍起樓，就是倚佇厝的牆的四圍，前殿後殿攏是按呢，起邊房佇四圍；

6

樓的下層闊五肘，中層闊六肘，三層闊七肘。佇厝的外面做幫牆佇伊的四圍，互楹仔無插入殿的牆。

7

殿起的時，是用山中拍好的石。起殿的時，鎚、斧頭，及別號鐵器的聲音攏無聽見。

8

邊仔中房的門，就是佇殿的正旁，對捲螺梯上中層，對中層上到第三層。

9

對按呢起殿到好，就用柏香柴的楹，柏香柴的板遮蓋殿。

10

閣倚佇歸間的殿有起樓，各高五肘，諸個攏用柏香柴靠佇殿裡。

11

耶和華的話臨到所羅門講：

12

「論到你所起此間殿，你若行我的律例，趁我的法度，守我一切的誡命，照按呢行，我就欲照我所應允你的父大衛的話應驗佇你。

13

我欲踮佇以色列人的中間，也無放拺我的百姓以色列。」

14

所羅門起殿已經明白。

15

用柏香柴的板起做殿的內重牆，對殿的土腳到楹仔，攏用柴蓋伊的內重，閣用松樹板舖殿的土腳。

16

閣佇殿的後面，用柏香柴板起二十肘，對土腳到楹仔給伊做佇內面做後殿，就是至聖所。

17

後殿前的殿，深四十肘。

18

殿內的柏香柴攏有刻匏仔及花蕊；殿內攏是柏香柴，無看見一塊石。

19

厝的內面有備辦後殿，欲佇遐安置耶和華的約櫃。

20

後殿的內面長二十肘，闊二十肘，高二十肘，攏用好金安伊；也用柏香柴蓋壇。

21

厝內所羅門攏用好金安伊，後殿的頭前牽金鍊仔，也用好金安伊。

22

全殿攏安金，到彼間殿攏起好；倚佇後殿的壇，也攏安金。

23

佇後殿的內面，伊用橄欖柴做二個兵，逐個高十肘。

24

兵此旁的翅五肘，兵彼旁的翅五肘，對此旁的翅尾到彼旁的翅尾共十肘；

25

彼個兵也是十肘，二個兵的寸尺、款式攏相同。

26

此個兵高十肘，彼個兵也是按呢。

27

將兵下佇後殿的內面；兵的翅展開，此個兵一個翅到此旁的牆，彼個兵一個翅到彼旁的牆，佇殿內二個翅相接；

28

伊閣用金安許個兵。

29

彼個殿四圍的牆，內外攏有雕刻，就是雕刻兵、棗樹，及花蕊的款式。

30

殿的地板，內外攏安金。

31

閣用橄欖柴做入後殿的門、伊的門楣、門豎；鎮牆的五份一。

32

用橄欖柴所造二個門扇頂面刻兵、棗樹，及花蕊的款式，攏安金，閣用金鑲兵及棗樹的頂面。

33

閣用橄欖柴做入殿的門豎，鎮牆的四份一。

34

用松樹柴做雙旁的門扇。此旁門的二扇，會拗得；彼旁門的二扇，也會拗得。

35

頂面刻兵、棗樹，及花蕊的款式，攏安金，閣用金鑲佇雕刻的工的頂面。

36

伊閣用拍好的石三勻、柏香柴一勻來起內院。

37

第四年西弗月，下耶和華殿的地基。

38

到十一年布勒月，就是八月，殿堂所有一切照伊的款式造成。伊起造共七年久。