申命記 第 13 章 - 台語漢字羅馬本

1

「恁中間若有先知抑是夢見夢的起來，對恁顯出神蹟奇事，

2

就對恁講：『咱來去趁你平素所呣識的別個上帝，來服事。』伊所顯明的神蹟奇事就若應驗，

3

你也呣通聽彼個先知抑是彼個夢見者的話；因為耶和華──恁上帝試恁，愛知恁是盡心盡性疼耶和華──恁的上帝抑無。

4

恁著順趁耶和華──恁的上帝，敬畏伊，守伊的誡命，聽伊的話，服事伊，結聯伊。

5

彼個先知抑是彼個夢見夢的已經用話悖逆耶和華──恁的上帝，就是導恁出埃及地、贖回恁脫離做奴才的家的，按呢欲拔恁離開耶和華──你的上帝所命令你行的路，你就著互伊死。按呢對恁中間除去彼個歹。

6

「若是你同母的兄弟，抑是你的子你的查某子，抑是你心懷中的某，抑是親像你生命的朋友，暗靜引誘你，講：『咱來去服事別個上帝就是你及你的列祖平素呣識的──

7

是你四圍諸個國的上帝。』離開恁近，抑離開恁遠，對此個地極到彼個地極的，

8

你呣通趁伊，呣通聽伊，目睭呣通惜伊。你呣通可憐伊，也呣通囥密伊，

9

你的確著互伊死；你著做頭下手欲互伊死，然後眾百姓也下手。

10

你著用石頭擲互伊死，因為伊想欲拔你離開耶和華──你的上帝就是導你出埃及地做奴才的家的。

11

就以色列眾人欲聽見來驚，無閣行此號歹代佇恁中間。」

12

「佇耶和華──你上帝所賞賜你徛起諸個城的一個，你若聽見講，

13

有匪類對恁中間出，拔徛起的城的人，講：『咱來去服事別個上帝，恁前所呣識的』；

14

你就著探聽，查考，詳細問，看啊！果然是真，準準有此個可惡的事行佇恁中間，

15

你的確著用刀死徛起彼個城的百姓，將伊以及伊所有的，伊的精牲，一盡用刀滅伊。

16

你著用所搶彼個城的物疊佇街市裡，用火燒彼個城及所搶一切的物互耶和華──你的上帝；彼個城永永做土堆，無通閣起。

17

彼個應該毀滅的物攏呣通一點仔住佇你的手，互耶和華息伊的大受氣，恩典你，憐憫你，互你加添人額，照伊對你的列祖所咒誓的。

18

因為你聽耶和華──你上帝的話，守伊一切的誡命，就是我今仔日所命令你的，來行耶和華──你的上帝所看做好的。」