傳道書 第 10 章 - 台語漢字羅馬本

1
死的蝴蠅互做香料者的油發出臭味;按呢,一點仔的愚戇也會敗壞大智慧及尊貴。
2
智慧的人的心是佇伊的正手旁;愚戇的人的心是佇伊的倒手旁。
3
閣戇人行佇路裡欠缺智慧,對眾人講,伊是戇人。
4
掌權者的心神想欲攻擊你,呣通離開你的本位,因為溫和會免得大的過失。
5
我看見日光的下面有一項呣好,親像出佇掌權者的錯誤,
6
就是安置戇人佇高位;好額人坐佇低位。
7
我看見奴僕騎馬,貴族親像奴僕行佇地裡。
8
掘陷坑的,欲家己跋佇彼內面;拆牆的,欲互蛇咬著。
9
拍石的,會受石傷;破柴的,會對按呢抵著危險。
10
鐵器已經鈍,若無磨利伊的嘴,就著加出多多力;獨獨得著智慧的教示,就有利益。
11
未念咒的時,蛇若咬著人,念咒的人就無利益。
12
智慧的人的所講是恩惠的話;愚戇的嘴吞滅家己。
13
伊的嘴所講的話起頭是愚戇;伊的話的路尾是害人的癲狂。
14
戇人多多話,獨獨人呣知將來怎樣;伊身後所欲有的事是誰會給伊講啊?
15
戇人的勞碌致到互厭倦,因為入城的路,伊也呣知。
16
邦國啊,你的王若是囝仔,你的貴族早起時宴樂,你就有災禍!
17
邦國啊,你的王若是尊貴的人的子,你的貴族照時飲食,為著欲補的力,呣是因為好飲,你就有福氣!
18
因為貧憚,厝蓋塌落去;為著手貧憚,厝就漏。
19
筵席是為著歡喜來設。酒是互人快活;錢銀做萬事的路用。
20
你呣通咒詛君王,心也呣通按呢想;佇你的睏房也呣通咒詛好額人。因為空中的鳥欲傳報此個聲,有翅股的也欲講起此個事。

台語漢字羅馬本聖經,部份字因為電腦編碼關係,需造字,無法正常顯示,您可使用「並排閱讀」功能,可同時顯示台語漢字羅馬本與巴克禮全羅,或點選連結:http://www.sl-pc.org.tw/bible/4_3,不便之處請包涵,上帝祝福您!