傳道書 第 11 章 - 台語漢字羅馬本

1
著將你的米糧撒佇水面,因為過多多日就欲得著。
2
份額著分做七抑八,因為你呣知將來有甚麼災禍到地上。
3
雲若有雨滿滿,就傾落佇地上。樹若倒向南,抑是向北,樹倒佇甚麼所在,就定定佇遐。
4
看風勢的,無欲撒種;看雲色的,無欲收割。
5
風所吹的路,你呣知,骨骸佇孕婦的胎怎樣生長,你也呣知;按呢,行萬事的上帝所做的,你猶原得著知。
6
早起時著撒你的種子,下昏時也呣通停你的手,因為你呣知此個彼個叨落一個欲茂盛;抑是二個欲平平好。
7
光真正是好,目睭看見光也是通歡喜。
8
人活多多年,就著快樂多多年;總是也著想到黑暗的日子。因為日子欲多多,所欲來的攏是空虛。
9
少年人啊,你佇少年的時著快樂。佇少年的日子,互你的心安慰你,也著照你的心所愛的,及目睭所看見的來行;總是著知,為著這一切的事,上帝欲審判你。
10
所以,著互憂悶離開你的心,也對你的身軀除去歹代;因為少年及壯年,攏是空虛。

台語漢字羅馬本聖經,部份字因為電腦編碼關係,需造字,無法正常顯示,您可使用「並排閱讀」功能,可同時顯示台語漢字羅馬本與巴克禮全羅,或點選連結:http://www.sl-pc.org.tw/bible/4_3,不便之處請包涵,上帝祝福您!