以西結書 第 48 章 - 台語漢字羅馬本

1

支派的名照下底所記的：對極北的界，對希特倫的路到哈馬出入的所在，佇大馬色境界哈薩以難。向北近倚哈馬的地對東到西，但一份。

2

倚近但的地界，對東到西，亞設一份。

3

倚近亞設的地界，對東到西，拿弗他利一份。

4

倚近拿弗他利的地界，對東到西，瑪拿西一份。

5

倚近瑪拿西的地界，對東到西，以法蓮一份。

6

倚近以法蓮的地界，對東到西，流便一份。

7

倚近流便的地界，對東到西，猶大一份。

8

倚近猶大的地界，對東到西，是恁所獻的地，闊二萬五千竿尺。對東到西，長及許個份的一個相同，聖所佇彼中間。

9

恁所獻互耶和華的地著長二萬五千竿尺，闊一萬。

10

所獻的聖地著歸互祭司，北勢長二萬五千，西勢闊一萬，東勢闊一萬，南勢長二萬五千。耶和華的聖所佇彼中央。

11

著歸互撒督的子孫中成做聖的祭司，就是顧守我所交代的。當以色列人行迷路的時，無行迷路親像利未人行迷路。

12

此個著歸互，就是對所獻的全地中獻互做至聖者。倚近利未人的地界。

13

利未人所得著的地著長二萬五千，闊一萬，及祭司的地界相同，攏總長二萬五千，闊一萬。

14

此個地呣通賣，呣通對換，起頭熟的物呣通歸互別人，因為是歸佇耶和華做聖者。

15

所剩五千闊的地，是佇彼個二萬五千的頭前，著做平常的路用，通起城起厝做郊野的地。城著佇中央。

16

伊的寸尺就是按呢：北面四千五百，南面四千五百，東面四千五百，西面四千五百。

17

城著郊野，向北二百五十，向南二百五十，向東二百五十，向西二百五十。

18

以外所剩的，長及所獻的聖地相同，向東一萬，向西一萬，閣及所獻的聖地相同；其中所出產欲互城內做工的人做食物。

19

對以色列眾支派的中間，佇城內做工者，欲佇遐種作。

20

恁所獻的全地：長二萬五千，闊二萬五千。恁所獻的聖地及屬佇城的地，是四方的。

21

所獻的聖地以及屬佇城的地，雙旁剩的地著歸佇人君。所獻的地佇彼二萬五千的頭前到東勢的界，閣向西佇彼二萬五千的，頭前到西勢的界，及許個份的地相同，攏歸佇人君。所獻的聖地及殿的聖地攏佇彼內面，

22

閣對利未人的業，對屬佇城的業（是屬人君的的中間），佇猶大的界及便雅憫的界的中間，攏歸人君的。

23

論到其餘的支派，對東到西，便雅憫一份。

24

倚近便雅憫的地界對東到西，西緬一份。

25

倚近西緬的地界對東到西，以薩迦一份。

26

倚近以薩迦的地界對東到西，西布倫一份。

27

倚近西布倫的地界對東到西，迦得一份。

28

倚近迦得的地界南旁向南彼個地界對他瑪到米利巴加低斯的水，到埃及的溪到大海。

29

這是恁著拈鬮分互以色列的支派做業的地，逐個所得著的業就是按呢。這是主耶和華所講的。

30

對城出去的路是照下面所記的：佇北面照所量的四千五百竿尺。

31

城許個門著照以色列支派的名。北面有三個門，流便的門一個，猶大的門一個，利未的門一個；

32

東面四千五百，有三個門，約瑟的門一個，便雅憫的門一個，但的門一個；

33

南面四千五百，有三個門，西緬的門一個，以薩迦的門一個，西布倫的門一個；

34

西面四千五百，有三個門，迦得的門一個，亞設的門一個，拿弗他利的門一個。

35

城四圍共一萬八千。對彼日以後，城的名叫做「耶和華佇遐。」