
加拉太書 第 1 章 - 台語漢字羅馬本
- 1
- 保羅做使徒(呣是出佇人,也呣是對人,就是對耶穌基督,及互伊對死人中復活的父上帝)
- 2
- 今及同佇的眾兄弟,批寄互加拉太諸個教會。
- 3
- 願恁對父上帝及咱的主耶穌基督得著恩典、平安!
- 4
- 伊為著咱的罪獻家己,欲救咱出現今歹的世代,就是照咱的父上帝的旨意。
- 5
- 願榮光歸伊到代代。阿們!
- 6
- 前佇基督的恩召恁的,恁離開伊到即緊,去趁別樣的福音,是我所奇怪。
- 7
- 彼個別個呣是福音,不過有人攪擾恁,愛拍亂基督的福音若定。
- 8
- 今設使阮,抑是對天來的天使,傳福音互恁,各樣佇阮所曾傳互恁的,伊著受咒詛。
- 9
- 親像阮前曾講的,今我閣講伊,若有人傳福音互恁,各樣佇恁所曾受的,伊著受咒詛。
- 10
- 我今是對人諂媚嗎?抑是對上帝啊?抑是我求互人歡喜啊?我若猶久愛互人歡喜,就呣是基督的奴僕。
- 11
- 兄弟啊,我報恁知,論我平素所傳的福音彼個呣是照人的意思。
- 12
- 因為我未曾對人受著,也無受人教示,是對耶穌基督的啟示。
- 13
- 恁曾聽見我前佇猶太教所行做的,就是窘逐上帝的教會真殄來陷害伊。
- 14
- 閣我佇猶太教,比本族同輩的多多人卡進步,為著我祖宗的遺傳閣卡熱心。
- 15
- 若是對阮老母的胎分別我,用伊的恩典召我的上帝,
- 16
- 既然歡喜將伊的子顯明佇我,欲互我宣傳伊佇外邦,我就無及人參詳,
- 17
- 也無上耶路撒冷就近許個代先我做使徒的,獨獨去亞拉伯,閣倒轉來大馬色。
- 18
- 三年後,我上耶路撒冷去探磯法,及伊住十五日。
- 19
- 其餘的使徒,除去主的兄弟雅各以外,我攏無見著。
- 20
- 今我所寫互恁的,我佇上帝的面前無白賊。
- 21
- 後來我到敘利亞及基利家的地方。
- 22
- 彼時,屬猶太地佇基督諸個教會猶久呣識我的面。
- 23
- 干單聽見講前窘逐咱的,今傳伊平素所陷害的教。
- 24
- 就因為我歸榮光上帝。
如需更多版本聖經,請到台灣聖經公會聖經網站瀏覽與查詢 |
台語漢字羅馬本聖經,部份字因為電腦編碼關係,需造字,無法正常顯示,您可使用「並排閱讀」功能,可同時顯示台語漢字羅馬本與巴克禮全羅,或點選連結:http://www.sl-pc.org.tw/bible/4_3,不便之處請包涵,上帝祝福您! |