加拉太書 第 2 章 - 台語漢字羅馬本

1

過十四年，我及巴拿巴閣上耶路撒冷，也導提多相及去。

2

我是奉啟示才上去，閣將我佇外邦所傳的福音對排列；是另外對有名望的人排列，免我現今，抑是以前，所行的歸佇空空。

3

及我去的提多，是希利尼人，也無互人勉強伊受割禮；

4

是為著有暗靜引進來假的兄弟，暗靜入來偷看阮佇基督耶穌所有的自由，欲互阮成做奴僕。

5

阮未曾一時降服來讓，是欲互福音的真理長長存佇恁中間。

6

對佇許個號做有名望的人，無論前是甚麼等號的人，佇我無差。上帝無用外貌取人。究竟許個有名望的人，佇我無加添甚麼，

7

反轉是按呢，看見主託仗我傳福音互未受割禮的，親像託仗彼得傳福音互已經受割禮的。（

8

因為出力行佇彼得，互伊做受割禮者的使徒，也出力行佇我，互我做外邦的使徒；）

9

閣知所賞賜我的恩典，就雅各、磯法、約翰人看做柱石的，伸正手及我參巴拿巴相交陪，互阮去就近外邦人，也去就近受割禮的。

10

獨獨愛阮數念喪鄉人；這也是我本致意行的。

11

若是磯法到安提阿的時；我當面抵敵伊，是伊有犯罪。

12

因為有幾若人對雅各遐來，猶未到的時，伊及外邦人相及食，已經到，伊驚受割禮的人，就退開來家己分別。

13

其餘的猶太人也及伊妝做，致到連巴拿巴也對的妝做受引誘。

14

總是我看見無照直行，來趁福音的真理，就佇眾人的面前給磯法講：「你是猶太人，做人既然親像外邦人，無親像猶太人，啥事勉強外邦人學猶太人啊？」

15

咱出世做猶太人，呣是外邦的罪人；

16

既然知人得著稱做義呣是對趁律法，獨獨對信耶穌基督，咱也有信靠基督耶穌，互咱對信基督得著稱做義，呣是對趁律法；因為對趁律法無人會得著稱做義。

17

今設使咱求佇基督得著稱做義，也家己猶久顯出做有罪的人，按呢基督是罪惡的差用嗎？斷斷呣是！

18

因為我若閣起我前所毀的，就是表明家己做犯法的人。

19

因為我對律法，就向律法已經死，欲互我向上帝來活。

20

我曾及基督同釘十字架，我猶久活呣是猶原我，就是基督佇我活；閣我現今佇肉體所有的活，是在佇信上帝的子來活；伊曾疼我，替我獻家己。

21

我無廢無上帝的恩典；因為對律法若會得著義，就基督無因端來死。