創世紀 第 24 章 - 台語漢字羅馬本

1
亞伯拉罕歲壽長年老,耶和華佇一切的事攏賜福互亞伯拉罕。
2
亞伯拉罕對伊家內管理全業的老奴僕講:「請將你的手下佇我的大腿下。
3
我欲教你指耶和華──就是天的上帝,地的上帝來咒誓,我徛起迦南人的中間,你呣通給我的子娶的查某子做某。
4
你著去我的本地本族,給我的子以撒娶一個某。」
5
奴僕應伊講:「設使查某囝仔呣肯隨我來此所在,我就著將你的子帶倒去你所對遐出來的地嗎?」
6
亞伯拉罕給伊講:「你著謹慎,呣通導我的子倒去遐。
7
天的上帝──耶和華曾導我離開老父的家及本族的地,對我講話,亦對我咒誓講:『我欲將此個地賞賜你的後裔。』伊欲差伊的使者佇你的面前,你就通對遐給我的子娶一個某。
8
設使查某囝仔呣肯隨你來,我教你咒的誓就及你無干涉,獨獨呣通帶我的子倒去遐。」
9
奴僕就將伊的手下佇主人亞伯拉罕的大腿下,為著此個事對伊咒誓。
10
彼個奴僕對伊主人的駱駝中取十隻駱駝,續帶伊主人逐樣的財寶,起身去米所波大米,到拿福的城。
11
日欲暗,眾查某囝仔出來汲水,伊就互駱駝跪佇城外的井邊。
12
伊講:「我的主人亞伯拉罕的上帝──耶和華啊!求你施恩互我的主人亞伯拉罕,互我今仔日有好遭遇。
13
我今徛佇井邊,城內人的查某囝仔出來汲水。
14
我欲對一個查某囝仔講:『請放落你的水瓶,互我飲水』,伊若講:『請飲!我亦欲互你的駱駝飲』,願彼個查某囝仔是你所定著互你的奴僕以撒做某。按呢,我就知你施恩互我的主人。」
15
話猶講未息,利百加肩頭背水瓶出來。伊是彼土利生的;彼土利是亞伯拉罕的小弟拿福的某密迦的子。
16
彼個查某囝仔面貌極其娞,猶是在室女,亦未曾有人親近伊。伊落去井邊,汲滿伊的瓶,就起來。
17
奴僕走進前迎接伊講:「求你將瓶內的水淡薄仔我飲。」
18
查某囝仔講:「我的主請飲。」就趕緊放水瓶落來,靠佇手裡互伊飲。
19
互伊飲明白,閣講:「我亦欲給你的駱駝汲水,互飲夠額。」
20
伊就趕緊將瓶內的水傾佇槽裡,閣走到井裡汲水,就給伊所有的駱駝汲。
21
彼個人注目看伊,恬恬無講話,愛知耶和華賞賜伊順事的路抑無。
22
駱駝飲明白,彼人就提一個金環,重半舍客勒,二個金手環,重十舍客勒,互彼個查某囝仔,
23
講:「你是是誰的查某子?請給我講,恁老父的家有所在通互阮歇抑無?」
24
伊就給伊講:「我是密迦對拿福所生的子彼土利的查某子」;
25
伊閣對伊講:「阮有草料米糧充足,亦有所在通歇。」
26
彼人就俯頭敬拜耶和華,講:
27
「著謳咾我的主亞伯拉罕的上帝──耶和華,伊用慈愛誠實款待我的主人攏無停止。論到我,耶和華佇路上引導我,到我的主人兄弟的家。」
28
查某囝仔走倒去,照諸個話給老母通家的人講。
29
利百加有一個兄,名叫拉班,伊出去去井邊,就近彼人。
30
伊看見彼個環,閣看見手環佇小妹的手,亦聽見小妹利百加的話,講彼人對我講按呢按呢。伊就去彼人遐,看見彼人猶徛佇駱駝邊,倚近水井,
31
就給伊講:「你此個得著耶和華賜福者,請入來,啥事徛佇外面?我已經備辦厝,及駱駝的所在。」
32
彼人就入伊的厝。伊就解駱駝所載的,閣用草料米糧飼駱駝,捧水互彼人以及跟隨的人洗腳,
33
將食物排佇伊的面前,互伊食,總是伊講:「我無欲食,聽候我講明我的使命。」拉班講:「請你講。」
34
伊就講:「我是亞伯拉罕的奴僕。
35
耶和華大大賜福佇我的主人,互伊興旺,閣互伊羊、牛、銀、金、奴僕、女婢、駱駝,及驢。
36
我的主人的某撒拉年老的時給我的主人生一個子;我的主人亦將一切所有的互此個子。
37
我的主人教我咒誓講:『我徛起迦南人的地,你呣通給我的子娶的查某子做某。
38
你著去我的老父的家、我本族遐,給我的子娶一個某。』
39
我對我的主人講:『驚了查某囝仔呣肯隨我來。』
40
伊就給我講:『我所服事的耶和華欲差伊的使者及你相及去,互你順事的路,你就通對我的宗族、我的父的家,給我的子娶一個某。
41
獨獨愛你到我本族遐,我教你所咒的誓就及你無干涉。若呣互你,我教你咒的誓亦及你無干涉。』
42
「今仔日我到井邊,講:『我的主人亞伯拉罕的上帝──耶和華啊,你若互我所行的路順事。
43
我今徛佇水井邊,對一個出來汲水的查某囝仔講:請你將你瓶裡的水淡薄互我飲;
44
伊若講:做你飲,我亦欲給你的駱駝汲水;願彼個查某囝仔做耶和華所定著互我的主人的子做某者。』
45
我心內的話猶講未了,利百加就出來,肩頭頂背水瓶,落去井邊汲水。我就給伊講:『請你互我飲。』
46
伊就趕緊對肩頭頂放落水瓶,講:『請飲!我亦互你的駱駝飲。』我就飲;伊亦互我的駱駝飲。
47
我閣問伊講:『你是是誰的查某子?』伊應講:『我是密迦對拿福所生的子彼土利的查某子。』我就將環掛佇伊的鼻,手環掛佇伊的手。
48
我就俯頭拜耶和華,謳咾我的主亞伯拉罕的上帝──耶和華;因為伊導我行抵好的路,互我得著我的主的小弟的查某孫來互伊的子。
49
今恁若欲用慈愛誠實款待我的主人,就給我講;若呣亦給我講,互我好通向左,抑是向右。」
50
拉班及彼土利應講:「代誌出佇耶和華,阮會對你講好抑歹。
51
你看,利百加佇你的面前,通將伊導去,互你的主人的子做某,照耶和華所講。」
52
亞伯拉罕的奴僕聽見諸個話,就向耶和華仆佇地裡。
53
彼霎奴僕提出銀器、金器,及衣服送利百加,閣將寶物送伊的兄及伊的老母。
54
奴僕及隨伊的人飲食,歇暝。透早起來,就講:「請差我倒去我的主人遐。」
55
利百加的兄及伊的老母講:「容允查某囝仔及阮踮幾日,上少十日,然後伊通去。」
56
伊對講:「呣通阻擋我,耶和華已經互我順事的路,請差我去,互我倒去我的主人遐。」
57
講:「阮叫查某囝仔來探伊的話意」,
58
就叫利百加來,問伊講:「你欲及此人去嗎?」伊講:「我欲去。」
59
就差小妹利百加及伊的奶母,及亞伯拉罕的奴僕,以及隨伊的人去。
60
就給利百加祝福對伊講:阮小妹啊,願你做千萬人的老母!願你的後裔得著對敵的關隘!
61
利百加及伊的女婢起來,騎駱駝,隨彼個人,奴僕就導利百加去。
62
以撒徛起佇南地,彼時,對庇耳拉海萊的路來。
63
日欲暗,以撒出來佇田裡,靜靜想,抬目一下看,看見駱駝來。
64
利百加看見以撒,就對駱駝落來,
65
問彼個奴僕講:「佇田裡行來迎接咱者的是是誰?」奴僕講:「是我的主人。」利百加就提帕家己罩。
66
奴僕將所做一切的事給以撒講。
67
以撒就牽利百加入伊的老母撒拉的布棚,娶伊做某,閣真疼伊。以撒對老母死後,到此霎才得著安慰。

台語漢字羅馬本聖經,部份字因為電腦編碼關係,需造字,無法正常顯示,您可使用「並排閱讀」功能,可同時顯示台語漢字羅馬本與巴克禮全羅,或點選連結:http://www.sl-pc.org.tw/bible/4_3,不便之處請包涵,上帝祝福您!