創世紀 第 39 章 - 台語漢字羅馬本

台語漢字羅馬本 » 創世紀 » 第 39 章
1
約瑟互人帶落去埃及。有一個埃及人，是法老的人臣──侍衛長波提法，對許個帶伊來的以實瑪利人的手買去。
2
耶和華及伊相及佇，互伊逐項亨通，住佇伊的主人埃及人的家。
3
伊的主人看見耶和華及伊相及佇，閣耶和華互伊的手所做的攏亨通，
4
約瑟就佇主人的面前得著恩典，來服事伊，主人設立伊管理伊的家，將一切所有的交伊的手。
5
對主人設立伊管理家事及伊一切所有的，耶和華為著約瑟的緣故賜福佇彼個埃及人的家；見若家內及田裡一切所有的攏得著耶和華賜福。
6
伊將一切所有的攏交約瑟的手，除去伊所食的物以外，別項所有的攏呣知。約瑟娞閣好生做。
7
諸個代誌以後，約瑟的主母注神看伊，講：「來及我睏。」
8
約瑟呣趁，對伊的主母講：「你看，家內有甚麼佇我的手，我的主人攏呣知；伊已經將所有的交佇我的手。
9
佇此家內無一個比我卡大；你以外，伊無一項無交我，因為你是伊的某。我怎樣通行此個大歹，來得罪上帝？」
10
後來伊逐日及約瑟講話，約瑟無聽伊的話，無及伊睏，亦無及伊做堆。
11
有一日，約瑟入厝辦伊的代誌，家內的人無一個佇厝內，
12
婦仁人就伊的衫，講：「你來及我睏！」約瑟將衫放佇伊的手，走出去外面。
13
婦仁人看見約瑟將衫放佇伊手裡閣走出外面，
14
就叫家內的人來，對講：「恁看！伊帶一個希伯來人入來咱的家，欲戲弄咱。伊來我遮，欲及我睏，我就大聲喝。
15
伊聽見我出聲喝，就將伊的衫放佇我遮，走出外面。」
16
婦仁人將約瑟的衫收佇伊遐，聽候伊的主人倒來，
17
就對伊講起諸個事，講：「你所帶來咱遮彼個希伯來的奴僕到我遮欲戲弄我，
18
我出聲喝，伊將伊的衫放佇我遮，走出外面。」
19
主人聽見伊的某對伊所講的話，講「你的奴僕親像按呢款待我」，伊就受氣，
20
約瑟的主人將伊關落監，就是王的罪犯受關的所在。對按呢約瑟佇彼個監內。
21
總是耶和華及約瑟佇，施恩互伊，互伊佇管監的人的面前得著恩典。
22
管監者就將監內所有的犯人攏交約瑟的手；佇遐所做的代誌攏是伊做。
23
見若約瑟手下的代誌，管監者一概無插，因為耶和華及約瑟佇；閣伊所做的耶和華攏互伊亨通。
  • Change Bible

  • 搜尋聖經經文
  • 並排閱讀
台語漢字羅馬本聖經，部份字因為電腦編碼關係，需造字，無法正常顯示，您可使用「並排閱讀」功能，可同時顯示台語漢字羅馬本與巴克禮全羅，或點選連結：http://www.sl-pc.org.tw/bible/4_3，不便之處請包涵，上帝祝福您！