創世紀 第 8 章 - 台語漢字羅馬本

1
上帝記得挪亞及一切的活物以及及伊佇大船一切的精牲。上帝互風吹地,水就漸漸消失。
2
深淵的水源及天的孔隙攏關密,天裡的雨亦息。
3
水對地上直直退。一百五十日後,水就漸漸消。
4
七月十七日船靠佇亞拉臘的山。
5
水閣漸漸消,直直到十月,十月初一日,山頭才出現。
6
過四十日,挪亞開伊所做大船的窗仔,
7
放一隻烏鴉出去;烏鴉飛來飛去,直直到地上的水乾。
8
伊閣放一隻鴿仔出去,欲看水對地上退抑未。
9
總是鴿仔尋無歇腳的所在,就倒轉來大船挪亞遐,因為遍地面猶有水,挪亞伸手接伊,掠入大船。
10
伊閣聽候七日,閣放鴿仔出大船。
11
到下昏鴿仔倒來伊遐,嘴咬一葉新的橄欖葉,挪亞才知水對地上退啦。
12
伊閣聽候七日,放鴿仔出去,鴿仔攏無閣倒來。
13
到挪亞六百連一歲,正月初一日,地上的水攏乾。挪亞就掀開大船的蓋來看,就看見地面已經乾。
14
二月二七日,土地攏乾。
15
上帝對挪亞講:
16
「你及你的某、你的子、你的媳婦攏著出大船。
17
佇你遐見有肉體的活物,就是飛鳥、精牲,及一切趖佇地上的蟲,攏著帶出,互興旺佇地裡,生湠真多。」
18
對彼霎挪亞及伊的子、伊的某、伊的媳婦攏出來。
19
一切的走獸、一切的蟲、一切的飛鳥,見若地上所有的動物,各照伊的族類,亦攏出大船。
20
挪亞為著耶和華起一座壇,對逐樣清氣的精牲,逐樣清氣的飛鳥取來獻佇壇頂做燒祭。
21
耶和華鼻伊的芳味,耶和華心內就講:「我無閣因為人的緣故咒詛地(因為人對細漢的時心所想就歹),我無欲照我所有行的閣滅各種的活物。
22
地猶佇的時,栽種收成、寒熱、冬天夏天、日暝攏無歇。

台語漢字羅馬本聖經,部份字因為電腦編碼關係,需造字,無法正常顯示,您可使用「並排閱讀」功能,可同時顯示台語漢字羅馬本與巴克禮全羅,或點選連結:http://www.sl-pc.org.tw/bible/4_3,不便之處請包涵,上帝祝福您!