希伯來書 第 13 章 - 台語漢字羅馬本

1

兄弟的相疼著久長。

2

莫得記得接待人客；因為對按呢曾有接待著天使，亦呣知的。

3

著數念諸個受關者，親像及相同關；數念受暴虐者，是恁亦有身軀。

4

婚姻，人人著尊重，床無垃墋；因為私通行淫的人，上帝欲審判伊。

5

心志呣通貪財，掠所有的做夠額；因為上帝有講：「我決斷無放拺你，決斷無離開你。」

6

所以咱通好膽講：主就是幫助我的，我無欲驚惶；人欲啥法得我奈何？

7

前引導恁、用上帝的道理傳互恁的人，恁著數念，看行做的結局，來學的信。

8

耶穌基督昨日、今仔日同一樣，直到代代。

9

恁莫得互插雜各樣的教所遷徙；因為心對恩典來堅固才是好，呣是對許個食物。因為用工佇許個物的無利益。

10

咱有祭壇，服事佇會幕的無權通食伊。

11

因為精牲的血互祭司頭帶入聖所來贖罪；許個精牲的身體就燒佇營外。

12

所以，耶穌因為欲用家己的血互百姓成聖，亦受苦佇城門外。

13

按呢，咱亦著出營外，來就近伊，受伊所受的凌辱。

14

因為佇遮咱無久長佇的城，是尋彼個將來的。

15

所以著對耶穌，常常用謳咾做祭獻互上帝，這就是承認主名的嘴唇所結的果子。

16

獨獨行好及相供給，恁呣通記得，因為此號的祭是上帝所歡喜的。

17

引導恁的，恁著聽趁順服；因為為著恁的靈魂警醒，是將來著家己排列的。恁著互用歡喜來做，無用吐氣；因為此個無利益恁。

18

恁著替阮祈禱，阮信家己有照良心，凡事愛照正直來行。

19

我益發勸恁行按呢，互我通卡緊閣就近恁。

20

今願平安的上帝，就是曾佇永遠的約的血、對死人中導羊群的大牧者──咱的主耶穌閣起來，

21

互恁佇逐項好事完全，來行伊的旨意；閣對耶穌基督佇咱的心內行代誌，得著歡喜佇伊的面前。願榮光歸佇伊，代代無息。阿們！

22

兄弟啊，我寫短短的批互恁，勸恁接納我勸勉的話。

23

恁著知，咱的兄弟提摩太已經得著解放；伊若緊緊來，我欲及伊去見恁。

24

請恁請安諸個引導恁的人及眾聖徒。有意大利的人請安恁。

25

願恩典及恁眾人佇。阿們！