希伯來書 第 2 章 - 台語漢字羅馬本

1

所以咱著益發致意所聽見的，驚了咱會致到溜去。

2

因為對天使所傳的道理尚且是堅固；也見若干犯違逆的代誌攏抵著應該受的報應。

3

咱若忽略即呢大的拯救，豈會逃閃嗎？此個拯救既然是主起頭講的，聽見的人干證到實實互咱。

4

閣上帝用諸個神蹟、奇事、逐項的權能，及聖神的賞賜，攏照家己的旨意，及相及干證。

5

因為阮所講來的世界，上帝未曾互伊降服佇天使。

6

獨獨有干證佇某所在的講：人是甚麼，互你數念伊？人的子是甚麼，互你看顧伊？

7

你互伊略仔卡輸天使，閣用榮光尊貴，互伊做冕旒，閣設立伊佇你的手所造者的頂面，

8

互萬物攏降服佇伊的腳下。已經互萬物攏降服伊，就無剩一項物無降服伊。總是到今咱猶未看見萬物攏降服伊。

9

獨獨看見彼個略仔卡輸天使的耶穌；為著受死的艱苦，得著榮光尊貴做冕旒，通對上帝的恩，為著眾人受死。

10

因為萬物所為著伊、萬物所對伊的，導多多子到佇榮光，就互救的首領，對苦難來成完全，本是合宜。

11

因為彼個互人成聖的及許個得著成聖的，攏對一個出。所以伊稱做兄弟無掠做見誚，

12

講：我欲報揚你的名佇我的兄弟，謳咾你佇會中；

13

閣講：我欲倚靠伊；閣講：看啊，我及上帝所互我的子兒。

14

今諸個子兒既然相同有血肉的體，伊本身亦平平有，欲用死來廢無有死的權勢的，就是魔鬼，

15

亦欲互一生驚畏死到親像做奴才者，攏得著解放。

16

因為伊無牽救天使，是牽救亞伯拉罕的後裔。

17

所以，凡事伊著及兄弟相同，通佇上帝的事做憐憫忠信的祭司頭，因為百姓的罪獻挽回的祭。

18

因為伊已經受苦來抵著試，就會幫助諸個受試的人。