士師記 第 10 章 - 台語漢字羅馬本

1

亞比米勒了後，有以薩迦人朵多的孫、普瓦的子陀拉起來，拯救以色列人。伊踮佇以法蓮山地的沙密。

2

伊做以色列的士師二十三年，就死，埋葬佇沙密。

3

伊了後有基列人睚珥起來，做以色列的士師二十二年。

4

伊有三十個子，騎三十隻的驢仔。有三十座城，名叫哈倭特睚珥，到今仔日，攏是佇基列地。

5

睚珥死，就埋葬佇加們。

6

以色列人閣行耶和華所看做歹的事，去服事諸個巴力及亞斯他錄，以及亞蘭的上帝、西頓許個上帝、摩押的上帝、亞捫人的上帝、非利士人的上帝，棄拺耶和華，無服事伊。

7

耶和華受氣以色列人，賣佇非利士人的手及亞捫人的手。

8

對彼年，擾亂壓制以色列人十八年，就是佇約但彼旁、眾以色列人徛起佇亞摩利人的地就是佇基列的。

9

亞捫人閣過約但河去攻擊猶大、便雅憫、以法蓮族。以色列人就盡在窘迫。

10

以色列人哀求耶和華講：「阮得罪你；因為有棄拺阮的上帝，去服事諸個巴力。」

11

耶和華對以色列人講：「我豈無救恁脫離埃及人、亞摩利人、亞捫人、及非利士人嗎？

12

西頓人、亞瑪力人、馬雲人，也攏壓制恁；恁哀求我，我也拯救恁脫離的手。

13

恁竟然放拺我，服事別個上帝！所以我無閣救恁。

14

恁去哀求恁所揀的上帝；恁抵著患難的時，通互救恁！」

15

以色列人對耶和華講：「阮犯罪啦，出在你的意思款待阮！獨獨求你今仔日救阮。」

16

就對中間除去外邦的上帝，服事耶和華。耶和華的心因為以色列人的艱苦，就憂悶。

17

當彼時亞捫人聚集，紮營佇基列。以色列人也聚集，紮營佇米斯巴。

18

基列的百姓及眾首領大家相及議論講：「是誰會代先去攻擊亞捫人，彼人欲做基列眾百姓的頭人。」