馬太福音 第 24 章 - 台語漢字羅馬本

1
耶穌出殿,抵行,伊的學生就近伊,用殿堂許個厝報伊看。
2
若是伊應講:「恁無看見諸個嗎?我實在給恁講,佇遮欲無一塊石留佇石頂,也無捙落去。」
3
耶穌坐佇橄欖山的時,學生私奇就近伊講:「請給阮講,底時有諸個代誌?也你閣來,及世界的結局有甚麼兆頭?」
4
耶穌應講:「著謹慎,莫得互人迷惑。
5
因為欲有多多人佇我的名來,講:『我是基督』,來迷惑多多人。
6
恁欲聽見交戰及交戰的風聲,謹慎莫得驚;因為諸個的確有,總是末期猶未到。
7
因為百姓欲起來攻擊百姓,國欲起來攻擊國;多多所在欲有飢荒、地動。
8
諸個攏是苦痛的起頭。
9
彼時,人欲交付恁佇患難,死恁;恁因為我的名欲互萬邦怨恨。
10
也彼時,多多人欲受塞礙相解送,相怨恨;
11
閣有多多假先知欲起來,迷惑多多人。
12
因為不法大大加添,多多人的疼漸漸冷淡。
13
獨獨吞到路尾的,伊會得著救。
14
此個天國的福音欲傳到通天下,做干證佇萬邦,彼時末期就到。」
15
「所以恁看見早託先知但以理所講『彼個殘害可惡的』徛佇聖的所在(讀的人著曉悟)。
16
彼時,佇猶太的,著走去山裡;
17
佇厝頂的,莫得落來提伊家內的物;
18
佇園裡的,莫得倒去撒伊的衫。
19
當許個日,有娠孕及互嬰仔食奶的婦仁人有災禍啊!
20
恁著祈禱,免得恁的逃走,佇冬天時抑是安息日。
21
因為彼時欲有大患難,對世間的起頭到今,未曾有按呢,後來也決斷無。
22
若無減少許個日,就凡有肉體的無一個得救;獨獨為著揀的百姓,許個日欲減少。
23
彼時,若有人給恁講:『你看,基督佇遮』,抑是講:『佇遐』,恁莫得信!
24
因為欲有假基督,假先知起來,行大的神蹟及兆頭,欲是會,連揀的百姓也迷惑伊。
25
我已經代先給恁講。
26
所以人若給恁講:『你看,伊是佇曠野』,恁莫得出去!抑是講:『你看,伊是佇密厝』,恁莫得信!
27
因為親像閃爁對東勢閃,爁到西勢。人子的閣來也欲按呢。
28
身屍若佇遐,鷹鳥也欲聚集佇遐。」
29
「抵抵諸個日的患難了後,日欲黑暗,月無出光,星對天磕落,天象振動。
30
彼時,人子的兆頭欲出現佇天裡,佇地裡諸個族類攏欲啼哭。也欲看見人子,用權能、及大榮光,坐天的雲臨到。
31
伊欲差伊的天使,用號頭響亮的聲,欲對四方,此旁的天邊到彼旁的天邊,聚集伊所揀的百姓。」
32
「恁著對無花果樹取譬喻;當伊枝軟葉發的時,就知夏天近啦。
33
按呢,恁看攏總諸個事,就知已經近,到門口啦。
34
我實在給恁講,此世代決斷未過去,到諸個代誌攏成。
35
天及地欲廢無,我的話廢無。」
36
「若是論彼日,彼時,人呣知,天使也呣知,子也呣知,獨獨父知若定。
37
閣親像挪亞的日,人子的閣來也欲按呢。
38
因為大水的代先許個日,人飲食嫁娶,到挪亞入大船的日;
39
竟然呣知,到大水到一盡滅。人子的閣來也欲按呢。
40
彼時,欲有二人佇園裡,一個取去,一個放。
41
二個婦仁人挨磨,一個取去,一個放。
42
所以著張持,因為恁呣知恁的主甚麼日欲來。
43
家主若知賊甚麼更欲到,伊就張持無容允人挖空伊的厝;這是恁所知。
44
所以,恁亦著備辦便,因為恁無拍算的時,人子來啦。」
45
「是誰是盡忠智慧的奴僕,主人所設立,來管伊家內的人,通照時分米糧互?
46
主人來,抵著伊按呢行,彼個奴僕有福氣。
47
我實在給恁講,主人欲設立伊來管伊一切所有的。
48
獨獨彼個歹的奴僕若心內講:『我的主人延延』,
49
就拍許個及伊同做奴僕的,閣及醉漢相及飲食。
50
就佇無派批的日,呣知的時,彼個奴僕的主人欲到,
51
重重刑罰伊,處置伊及假好的人平等;佇遐欲有啼哭咬牙切齒。」

台語漢字羅馬本聖經,部份字因為電腦編碼關係,需造字,無法正常顯示,您可使用「並排閱讀」功能,可同時顯示台語漢字羅馬本與巴克禮全羅,或點選連結:http://www.sl-pc.org.tw/bible/4_3,不便之處請包涵,上帝祝福您!