列王紀上 第 13 章

1

(THR) Hit-sî ū chı̍t ê Siōng-tè ê lô͘-po̍k, thàn Iâ-hô-hoa ê ōe, tùi Iû-tāi lâi kàu Pek-te̍k-lī; Iâ-lô-phò-àm tú-á khiā tī tôaⁿ-piⁿ, beh sio hiuⁿ.

(BCL) 彼時，有一個上帝的奴僕趁耶和華的話對猶大來到伯特利。耶羅波安抵仔徛佇壇邊欲燒香；

2

(THR) I thàn Iâ-hô-hoa ê ōe, kong-kek hit ê tôaⁿ, kiò kóng, Tôaⁿ ah, tôaⁿ ah, Iâ-hô-hoa án-ni kóng, Khòaⁿ ah, beh ū chı̍t ê kiáⁿ chhut-sì tī Tāi-pı̍t ê ke, miâ kiò Iok-se-a, i beh chiong soaⁿ-thâu-tôaⁿ ê chè-si, chiū-sī tī lí ê téng-bīn sio-hiuⁿ-ê, hiàn tī lí ê téng-bīn; in iā beh chiong lâng ê kut-thâu sio tī lí ê téng-bīn.

(BCL) 伊趁耶和華的話攻擊彼個壇，叫講：「壇啊，壇啊！耶和華按呢講：看啊，欲有一個子出世佇大衛的家，名叫約西亞，伊欲將山頭壇的祭司，就是佇你的頂面燒香的，獻佇你的頂面，也欲將人的骨頭燒佇你的頂面。」

3

(THR) Siâng hit-jı̍t i iā chhut chı̍t ê tiāu-thâu, kóng, Khòaⁿ ah, chit ê tôaⁿ beh phòa-lı̍h, tôaⁿ-téng ê hé-hu beh piàⁿ--lo̍h-khì; chit-ê chiū-sī Iâ-hô-hoa só͘ kóng ê tiāu-thâu.

(BCL) 像彼日，伊也出一個兆頭，講：「看啊，此個壇欲破裂，壇頂的火灰欲傾落去，此個就是耶和華所講的兆頭。」

4

(THR) Ông thiaⁿ-kìⁿ Siōng-tè ê lô͘-po̍k kong-kek Pek-te̍k-lī ê tôaⁿ só͘ kiò ê ōe, Iâ-lô-phò-àm chiū tùi tôaⁿ-téng chhun chhiú, kóng, Tio̍h lia̍h i. I só͘ chhun beh lia̍h i ê chhiú chiū ko͘-tâ, bōe-ōe kiu tò-tńg;

(BCL) 王聽見上帝的奴僕攻擊伯特利的壇所叫的話，耶羅波安就對壇頂伸手，講：「著掠伊！」伊所伸欲掠伊的手就枯焦，會勼倒轉；

5

(THR) tôaⁿ chiū phòa-lı̍h, tôaⁿ-téng ê hé-hu iā piàⁿ--lo̍h-lâi, chiàu Siōng-tè ê lô͘-po̍k thàn Iâ-hô-hoa ê ōe só͘ chhut ê tiāu-thâu.

(BCL) 壇就破裂，壇頂的火灰也傾落來，照上帝的奴僕趁耶和華的話所出的兆頭。

6

(THR) Ông ìn Siōng-tè ê lô͘-po̍k kóng, Chhiáⁿ lí kiû Iâ-hô-hoa lí Siōng-tè ê un, thòe góa kî-tó, hō͘ góa ê chhiú ho̍k-gôan. Tùi án-ni, Siōng-tè ê lô͘-po̍k kî-tó Iâ-hô-hoa, ông ê chhiú chiū ho̍k-gôan, chiàu khí-thâu ê khóan.

(BCL) 王應上帝的奴僕講：「請你求耶和華──你上帝的恩，替我祈禱，互我的手復原。」對按呢上帝的奴僕祈禱耶和華，王的手就復原，照起頭的款。

7

(THR) Ông kā Siōng-tè ê lô͘-po̍k kóng, Chhiáⁿ lí kap góa tò-khì góan tau, chia̍h tiám-sim; góa iā beh ēng mı̍h sàng lí.

(BCL) 王給上帝的奴僕講：「請你及我倒去阮兜食點心，我也欲用物送你。」

8

(THR) Siōng-tè ê lô͘-po̍k kā ông kóng, Lí chiū nā ēng lí ông-kiong ê chı̍t-pòaⁿ hō͘ góa, góa iā m̄ kap lí khì, iā m̄ tī chit só͘-chāi chia̍h-piáⁿ lim-chúi.

(BCL) 上帝的奴僕給王講：「你就若用你王宮的一半互我，我也呣及你去，也呣佇此所在食餅飲水；

9

(THR) In-ūi Iâ-hô-hoa ê ōe án-ni hoan-hù góa kóng, Lí m̄-thang chia̍h-piáⁿ, m̄-thang lim-chúi, iā m̄-thang tùi lí ê gôan-lō͘ tò-lâi.

(BCL) 因為耶和華的話按呢吩咐我講，你呣通食餅，呣通飲水，也呣通對你的原路倒來。」

10

(THR) I chiū tùi pa̍t-tiâu lō͘ khì, bô tùi lâi Pek-te̍k-lī hit-tiâu tò-khì.

(BCL) 伊就對別條路去，無對來伯特利彼條倒去。

11

(THR) Ū chı̍t ê lāu sian-ti tiàm tī Pek-te̍k-lī, i ê kiáⁿ kàu, ēng Siōng-tè ê lô͘-po̍k tng-jı̍t tī Pek-te̍k-lī só͘-kiâⁿ-ê kā i kóng, kap tùi ông só͘ kóng it-chhè ê ōe, lóng kā lāu-pē kóng.

(BCL) 有一個老先知踮佇伯特利，伊的子到，用上帝的奴僕當日佇伯特利所行的給伊講，及對王所講一切的話攏給老父講。

12

(THR) Lāu-pē tùi in kóng, I tùi toh-lo̍h chı̍t tiâu lō͘ khì. In-ūi i ê kiáⁿ bat khòaⁿ-kìⁿ tùi Iû-tāi lâi Siōng-tè ê lô͘-po̍k só͘ khì ê lō͘.

(BCL) 老父對講：「伊對叨落一條落去？」因為伊的子曾看見對猶大來上帝的奴僕所去的路。

13

(THR) I chiū hoan-hù i ê kiáⁿ kóng, Lín kā góa pī-pān lû. In pī-pān lû hó, i chiū khiâ i;

(BCL) 伊就吩咐伊的子講：「恁給我備辦驢。」備辦驢好，伊就騎伊，

14

(THR) khì jip Siōng-tè ê lô͘-po̍k, tú-tio̍h i chē tī siōng-chhiū kha; chiū mn̄g i kóng, Lí sī tùi Iû-tāi lâi Siōng-tè ê lô͘-po̍k á m̄-sī? I kóng, Góa chiū-sī.

(BCL) 去路上帝的奴僕，抵著伊坐佇橡樹腳，就問伊講：「你是對猶大來上帝的奴僕抑呣是？」伊講：「我就是。」

15

(THR) I chiū kā i kóng, Chhiáⁿ lí kap góa tò-khì góan tau chia̍h-piáⁿ.

(BCL) 伊就給伊講：「請你及我倒去阮兜食餅。」

16

(THR) I chiū kóng, Góa bōe-ōe kep lí tò-khì, bōe-ōe jı̍p lí ê ke, iā bōe-ōe tī chit só͘-chāi kap lí chia̍h-piáⁿ lim-chúi.

(BCL) 伊就講：「我會及你倒去，會入你的家，也會佇此所在及你食餅飲水；

17

(THR) In-ūi Iâ-hô-hoa ê ōe án-ni kā góa kóng, Lí tī-hia m̄-thang chia̍h-piáⁿ, m̄-thang lim-chúi, iā m̄-thang tùi lí khì ê lō͘ tò-lâi.

(BCL) 因為耶和華的話按呢給我講：『你佇遐呣通食餅呣通飲水，也呣通對你去的路倒來。』」

18

(THR) I chiū kā i kóng, Góa iā sī sian-ti, kap lí chı̍t-iūⁿ; ū thiⁿ-sài ēng Iâ-hô-hoa ê ōe kā góa kóng, Lí chhōa i kap lí tò-khì lí ê chhù, hō͘ i chia̍h-piáⁿ lim-chúi. Che lóng sī phiàn i.

(BCL) 伊就給伊講：「我也是先知，及你一樣。有天使用耶和華的話給我講：『你導伊及你倒去你的厝，互伊食餅飲水。』」這攏是騙伊。

19

(THR) I chiū kap i tò-khì, tī i ê ke chia̍h-piáⁿ lim-chúi.

(BCL) 伊就及伊倒去，佇伊的家食餅飲水。

20

(THR) Nn̄g-lâng chē-toh ê sî, Iâ-hô-hoa ê ōe lîm-kàu hit ê chhōa i tò-lâi ê sian-ti.

(BCL) 二人坐桌的時，耶和華的話臨到彼個導伊倒來的先知，

21

(THR) I chiū kiò hit ê tùi Iû-tāi lâi Siōng-tè ê lô͘-po̍k kóng, Iâ-hô-hoa án-ni kóng, In-ūi lí ûi-pōe Iâ-hô-hoa ê ōe, bô siú Iâ-hô-hoa lí Siōng-tè só͘ bēng-lēng lí ê bēng-lēng,

(BCL) 伊就叫彼個對猶大來上帝的奴僕講：「耶和華按呢講：因為你違背耶和華的話，無守耶和華──你上帝所命令你的命令，

22

(THR) chiū tò-lâi chia̍h-piáⁿ lim-chúi tī I só͘ hoan-hù lí kóng, Tī-hia m̄-thang chia̍h-piáⁿ m̄-thang lim-chúi ê só͘-chāi, só͘-í lí ê sin-si bōe thang jı̍p lí lia̍t-chó͘ ê bōng.

(BCL) 就倒來，食餅飲水佇伊所吩咐你講佇遐呣通食餅呣通飲水的所在，所以你的身屍通入你列祖的墓。」

23

(THR) Chia̍h-piáⁿ lim-chúi liáu-āu, i chiū kā i só͘ tòa tò-lâi ê sian-ti pī-pān lû.

(BCL) 食餅飲水了後，伊就給伊所帶倒來的先知備辦驢。

24

(THR) I khì-liáu, tī lō͘--nih ū chı̍t chiah sai tú-tio̍h chiū kā-sí i; sin-si pàng tī lō͘--nih, lû khiā tī i ê sin-piⁿ, sai iā khiā tī i ê sin-si ê sin-piⁿ.

(BCL) 伊去了，佇路裡有一隻獅抵著，就咬死伊，身屍放佇路裡，驢徛佇伊的身邊，獅也徛佇伊的身屍的身邊。

25

(THR) Ū lâng tùi hia keng-kè, khòaⁿ-kìⁿ sin-si pàng tī lō͘--nih, sai iā khiā tī sin-si ê piⁿ-thâu, chiū lâi lāu sian-ti só͘ tiàm ê siâⁿ, kóng-khí chit ê sū.

(BCL) 有人對遐經過，看見身屍放佇路裡，獅也徛佇身屍的邊頭，就來老先知所踮的城講起此個事。

26

(THR) Hit ê chhōa i tùi lō͘ tò-lâi ê sian-ti thiaⁿ-kìⁿ chiū kóng, Che sī hit ê Siōng-tè ê lô͘-po̍k, ûi-ke̍h Iâ-hô-hoa ê ōe--ê, só͘-í Iâ-hô-hoa chiong i kau hō͘ sai; sai peh-thiah i, kā-sí i, sī chiàu Iâ-hô-hoa tùi i kóng ê ōe.

(BCL) 彼個導伊對路倒來的先知聽見，就講：「這是彼個上帝的奴僕，違逆耶和華的話者，所以耶和華將伊交互獅；獅擘拆伊，咬死伊，是照耶和華對伊講的話。」

27

(THR) I chiū hoan-hù i ê kiáⁿ kóng, Lín kā góa pī-pān lû. In chiū pī-pān.

(BCL) 伊就吩咐伊的子講：「恁給我備辦驢。」就備辦。

28

(THR) I khì, khòaⁿ-kìⁿ i ê sin-si pàng tī lō͘--nih, lû kap sai khiā tī sin-si ê piⁿ-á, sai bô chia̍h sin-si, iā bô peh-thiah lû.

(BCL) 伊去，看見伊的身屍放佇路裡，驢及獅徛佇身屍的邊仔，獅無食身屍，也無擘拆驢。

29

(THR) Sian-ti chiū chhú Siōng-tè ê lô͘-po̍k ê sin-si, hē tī lû ê téng-bīn, chài tò-lâi, kàu lāu sian-ti ê siâⁿ, beh thî-khàu lâi bâi-chòng i.

(BCL) 先知就取上帝的奴僕的身屍下佇驢的頂面，載倒來，到老先知的城，欲啼哭來埋葬伊；

30

(THR) Chiū chiong i ê sin-si lâi chòng tī ka-kī ê bōng, lâng chiū thî-khàu i, kóng, Ai--ah, góa ê hiaⁿ ah!

(BCL) 就將伊的身屍來葬佇家己的墓，人就啼哭伊，講：「唉啊！我的兄啊！」

31

(THR) Bâi-chòng liáu-āu, i chiū kā i ê kiáⁿ kóng, Góa sí liáu-āu, lín tio̍h bâi-chòng góa tī Siōng-tè ê lô͘-po̍k só͘ bâi-chòng ê bōng-lāi, hō͘ góa ê kut-thâu óa i ê kut-thâu.

(BCL) 埋葬了後，伊就給伊的子講：「我死了後，恁著埋葬我佇上帝的奴僕所埋葬的墓內，互我的骨頭倚伊的骨頭，

32

(THR) In-ūi i ēng Iâ-hô-hoa ê ōe kiò lâi kong-kek Pek-te̍k-lī ê tôaⁿ, kong-kek Sat-má-lī-a chiah ê siâⁿ só͘ ū ê soaⁿ-thâu-biō, i ê ōe tek-khak èng-giām.

(BCL) 因為伊用耶和華的話叫來攻擊伯特利的壇，攻擊撒瑪利亞諸個城所有的山頭廟，伊的話的確應驗。」

33

(THR) Chit ê tāi-chì liáu-āu, Iâ-lô-phò-àm iû-gôan bô lī-khui i ê pháiⁿ-lō͘; koh tùi chèng peh-sìⁿ-tiong siat-lı̍p soaⁿ-thâu ê chè-si; kìⁿ ài ê, chiū hun-piat i, hō͘ i chòe soaⁿ-thâu ê chè-si.

(BCL) 此個代誌了後，耶羅波安猶原無離開伊的歹路，閣對眾百姓中設立山頭的祭司；見愛的，就分別伊，互伊做山頭的祭司。

34

(THR) Chit ê tāi-chì chiâⁿ-chòe Iâ-lô-phò-àm ê ke ê chōe, tì-kàu beh tùi tōe-chiūⁿ chián-tû i, bia̍t i.

(BCL) 此個代誌成做耶羅波安的家的罪，致到欲對地上剪除伊滅伊。

Bible Color Mark

• 台語漢字羅馬本
• 巴克禮全羅