撒母耳記上 第 15 章

1

(THR) Sat-bó͘-jíⁿ kā Sò-lô kóng, Iâ-hô-hoa chhe góa ēng iû boah lí, siat-lı̍p lí chòe-ông, tī-lí I ê peh-sìⁿ Í-sek-lia̍t, só͘-í lí tio̍h thiaⁿ Iâ-hô-hoa só͘ kóng ê ōe.

(BCL) 撒母耳給掃羅講：「耶和華差我用油抹你設立你做王，治理伊的百姓以色列；所以你著聽耶和華所講的話。

2

(THR) Bān-kun ê Iâ-hô-hoa án-ni kóng, Í-sek-lia̍t lâng chhut Ai-kı̍p ê sî, A-má-le̍k lâng cháiⁿ-iūⁿ khóan-thāi in, cháiⁿ-iūⁿ chia̍t in ê lō͘, Góa lóng kì-tit;

(BCL) 萬軍的耶和華按呢講：『以色列人出埃及的時，亞瑪力人怎樣款待，怎樣截的路，我攏記得。

3

(THR) taⁿ lí tio̍h khì phah A-má-le̍k, it-chīn bia̍t-bô in só͘-ū-ê, bo̍h-tit pó-sioh in; chiong lâm, lú, gín-ná, chia̍h-lin-ê, kap gû, iûⁿ, lo̍k-tô, kap lû, it-chīn thâi-sí in.

(BCL) 今你著去拍亞瑪力，一盡滅無所有的，莫得保惜，將男女、囝仔、食奶的、及牛、羊、駱駝，及驢一盡死。』」

4

(THR) Sò-lô chiū chio-chı̍p peh-sìⁿ tī Thê-la̍h-in, tiám-sǹg in, kiōng pō͘-peng jī-cha̍p bān, Iû-tāi lâng chı̍t-bān.

(BCL) 掃羅就招集百姓佇提拉因，點算，共步兵二十萬，猶大人一萬。

5

(THR) Sò-lô kàu A-má-le̍k ê siâⁿ, bâi-ho̍k tī soaⁿ-kok-tiong.

(BCL) 掃羅到亞瑪力的城，埋伏佇山谷中。

6

(THR) Sò-lô kā Ki-nî lâng kóng, Lín lo̍h-khì lī-khui A-má-le̍k lâng, bián-tit góa chiong lín kap in chòe-chı̍t-ē châu-bia̍t; in-ūi Í-sek-lia̍t lâng chhut Ai-kı̍p ê sî, lín bat hó khóan-thāi in; tùi án-ni Ki-nî lâng lī-khui A-má-le̍k lâng khì.

(BCL) 掃羅給基尼人講：「恁落去離開亞瑪力人，免得我將恁及做一下剿滅；因為以色列人出埃及的時，恁曾好款待。」對按呢基尼人離開亞瑪力人去。

7

(THR) Sò-lô phah A-má-le̍k lâng, tùi Hap-hui-la̍h kàu Ai-kı̍p thâu-chêng ê Su-jíⁿ.

(BCL) 掃羅拍亞瑪力人，對哈腓拉到埃及頭前的書珥，

8

(THR) I o̍ah-o̍ah lia̍h A-má-le̍k ông A-kah, ēng to it-chīn thâi-sí i ê chèng peh-sìⁿ.

(BCL) 伊活活掠亞瑪力王亞甲，用刀一盡死伊的眾百姓。

9

(THR) Chóng-sī Sò-lô kap peh-sìⁿ pó-sioh A-kah, iā pó-sioh siōng-hó ê iûⁿ, gû, gû-á, iûⁿ-á, kap it-chhè hó ê mı̍h, m̄-khéng châu-bia̍t i; kìⁿ-nā hā-chiān m̄-chiâⁿ-mı̍h-ê, lóng it-chīn thâi-sí.

(BCL) 總是掃羅及百姓保惜亞甲，也保惜上好的羊、牛、牛仔、羊仔，及一切好的物，呣肯剿滅伊。見若下賤呣成物的，攏一盡死。

10

(THR) Hit-sî Iâ-hô-hoa ê ōe lîm-kàu Sat-bó͘-jíⁿ kóng,

(BCL) 彼時耶和華的話臨到撒母耳講：

11

(THR) Góa ūi-tio̍h siat-lı̍p Sò-lô chòe-ông lâi thè-hóe, in-ūi I o̍at-tńg-khì bô tè Góa, bô chun-siú Góa ê bēng-lēng. Sat-bó͘-jíⁿ chin chhoeh-sim, thong-mî kiû Iâ-hô-hoa.

(BCL) 「我為著設立掃羅做王，來退悔；因為伊越轉去無隨我，無遵守我的命令。」撒母耳真慼心，通暝求耶和華。

12

(THR) Sat-bó͘-jíⁿ keh chá-khí, thàu-chá beh khì ngiâ-chih Sò-lô; ū lâng kā Sat-bó͘-jíⁿ kóng, Sò-lô kàu Ka-bı̍t, tī-hia ūi ka-kī khiā chio̍h-pi, koh o̍at-tńg kè-khì, lo̍h kàu Kiat-kah.

(BCL) 撒母耳隔早起，透早欲去迎接掃羅。有人給撒母耳講：「掃羅到迦密，佇遐為家己徛石碑，閣越轉過去落到吉甲。」

13

(THR) Sat-bó͘-jíⁿ kàu Sò-lô hia, Sò-lô kā i kóng, Gōan Iâ-hô-hoa sù-hok lí, góa í-keng chun-siú Iâ-hô-hoa ê bēng-lēng lah.

(BCL) 撒母耳到掃羅遐，掃羅給伊講：「願耶和華賜福你，我已經遵守耶和華的命令啦。」

14

(THR) Sat-bó͘-jíⁿ kóng, Án-ni, chiū chit ê iûⁿ me̍h-me̍h-háu jı̍p góa ê hī-khang, kap góa só͘ thiaⁿ gû teh mā, sī sím-mı̍h in-toaⁿ?

(BCL) 撒母耳講：「按呢就此個羊咩咩哮入我的耳孔，及我所聽牛哞，是甚麼因端？」

15

(THR) Sò-lô kóng, In tùi A-má-le̍k lâng hia tòa-lâi-ê; in-ūi peh-sìⁿ pó-sioh siōng-hó ê iûⁿ, gû, beh hiàn hō͘ Iâ-hô-hoa lí ê Siōng-tè; kî-û-ê góan lóng châu-bia̍t.

(BCL) 掃羅講：「對亞瑪力人遐帶來的，因為百姓保惜上好的羊、牛，欲獻互耶和華──你的上帝；其餘的，阮攏剿滅。」

16

(THR) Sat-bó͘-jíⁿ kā Sò-lô kóng, Lí tiām-tiām, góa beh chiong Iâ-hô-hoa chā-mî só͘ kā góa kóng ê, kā lí kóng. I kā i kóng, Chhiáⁿ kóng.

(BCL) 撒母耳給掃羅講：「你恬恬！我欲將耶和華昨暝所給我講的給你講。」伊給伊講：「請講。」

17

(THR) Sat-bó͘-jíⁿ kóng, Chá lí sui-jiân ka-kī khòaⁿ chòe bî-sòe, kiám m̄-sī siū siat-lı̍p chòe Í-sek-lia̍t chi-phài ê thâu mah? Iâ-hô-hoa ēng iû boah lí chòe ông, lâi tī-lí Í-sek-lia̍t;

(BCL) 撒母耳講：「早你雖然家己看做微細，豈呣是受設立做以色列支派的頭嗎？耶和華用油抹你做王來治理以色列。

18

(THR) Koh Iâ-hô-hoa chhe lí khí-sin khì, hoan-hù lí kóng, A-má-le̍k lâng sī ū-chōe ê lâng, lí khì it-chīn châu-bia̍t i, koh kap in kau-chiàn, kàu in lóng bia̍t;

(BCL) 閣耶和華差你起身去，吩咐你講，亞瑪力人是有罪的人，你去一盡剿滅伊，閣及交戰到攏滅。

19

(THR) lí siáⁿ-sū bô thàn Iâ-hô-hoa ê ōe, kóaⁿ-kín khì chhiúⁿ-mı̍h, kiâⁿ Iâ-hô-hoa só͘ khòaⁿ-chòe pháiⁿ ê sū ah?

(BCL) 你啥事無趁耶和華的話，趕緊去搶物，行耶和華所看做歹的事啊？」

20

(THR) Sò-lô kā Sat-bó͘-jíⁿ kóng, Góa sı̍t-chāi ū thiaⁿ-thàn Iâ-hô-hoa ê bēng-lēng, kiâⁿ Iâ-hô-hoa só͘ chhe góa kiâⁿ ê lō͘, lia̍h A-má-le̍k ông A-kah lâi, it-chīn bia̍t A-má-le̍k lâng;

(BCL) 掃羅給撒母耳講：「我實在有聽趁耶和華的命令，行耶和華所差我行的路，掠亞瑪力王亞甲來，一盡滅亞瑪力人。

21

(THR) To̍k-to̍k peh-sìⁿ tùi só͘ chhiúⁿ ê mı̍h ê tiong-kan, chhú iûⁿ, gû, eng-kai hiàn ê mı̍h ê siōng-hó ê, beh tī Kiat-kah chè-hiàn Iâ-hô-hoa lí ê Siōng-tè.

(BCL) 獨獨百姓對所搶的物的中間，取羊牛應該獻的物的上好的，欲佇吉甲祭獻耶和華──你的上帝。」

22

(THR) Sat-bó͘-jíⁿ kóng, Iâ-hô-hoa hoaⁿ-hí sio-chè chè-sū, kiám chhin-chhiūⁿ hoaⁿ-hí lâng chun-thàn Iâ-hô-hoa ê ōe mah? Khòaⁿ ah, chun-thàn iâⁿ-kè hiàn-chè, thiaⁿ-thàn sī iâⁿ-kè iûⁿ-káng ê iû.

(BCL) 撒母耳講：耶和華歡喜燒祭祭祀，豈親像歡喜人遵趁耶和華的話嗎？看啊，遵趁贏過獻祭；聽趁是贏過羊的油。

23

(THR) In-ūi pōe-pōan sī chhin-chhiūⁿ kiâⁿ siâ-su̍t ê chōe, ngī-sim sī chhin-chhiūⁿ ho̍k-sāi hu-ké, chhin-chhiūⁿ pài ngó͘-siōng; ūi-tio̍h lí khì-sak Iâ-hô-hoa ê ōe, I iā khì-sak lí, bô hō͘ lí chòe-ông.

(BCL) 因為背叛是親像行邪術的罪；硬心是親像服事虛假，親像拜偶像。為著你棄拺耶和華的話，伊也棄拺你無互你做王。

24

(THR) Sò-lô tùi Sat-bó͘-jíⁿ kóng, Góa ū-chōe, in-ūi góa ū hōan-tio̍h Iâ-hô-hoa ê bēng-lēng kap lí ê ōe, sī tùi góa kiaⁿ peh-sìⁿ, thiaⁿ in ê ōe.

(BCL) 掃羅對撒母耳講：「我有罪，因為我有犯著耶和華的命令及你的話，是對我驚百姓，聽的話。

25

(THR) Taⁿ kiû lí sià-bián góa ê chōe, kap góa tò-khì, hō͘ góa thang kèng-pài Iâ-hô-hoa.

(BCL) 今求你赦免我的罪，及我倒去，互我通敬拜耶和華。」

26

(THR) Sat-bó͘-jíⁿ kā Sò-lô kóng, Góa m̄ kap lí tò-khì; in-ūi lí khì-sak Iâ-hô-hoa ê bēng-lēng, Iâ-hô-hoa iā khì-sak lí, bô hō͘ lí chòe Í-sek-lia̍t ê ông.

(BCL) 撒母耳給掃羅講：「我呣及你倒去；因為你棄拺耶和華的命令，耶和華也棄拺你無互你做以色列的王。」

27

(THR) Sat-bó͘-jíⁿ o̍at-tńg-sin beh khì, Sò-lô chiū khiú I ê saⁿ-á-ku, saⁿ chiū thiah-tn̄g.

(BCL) 撒母耳越轉身欲去，掃羅就伊的衫仔裾，衫就拆斷。

28

(THR) Sat-bó͘-jíⁿ kā i kóng, Kin-á-jı̍t Iâ-hô-hoa hō͘ Í-sek-lia̍t kok kap lí cho̍at-tn̄g, iā sī án-ni, chiong i siúⁿ-sù lí ê chhù-piⁿ ê chı̍t-ê, pí lí khah-hó-ê.

(BCL) 撒母耳給伊講：「今仔日耶和華互以色列國及你絕斷，也是按呢，將伊賞賜你的厝邊的一個比你卡好者。

29

(THR) Í-sek-lia̍t ê tōa hián-hek ê, bô pe̍h-chha̍t, iā bô thè-hóe; in-ūi I m̄-sī sè-kan lâng, ū thè-hóe.

(BCL) 以色列的大顯赫者無白賊，也無退悔；因為伊呣是世間人，有退悔。」

30

(THR) Sò-lô kóng, Góa ū chōe; sui-jiân án-ni, kiû lí chun-tiōng góa tī góa ê peh-sìⁿ ê tióng-ló kap Í-sek-lia̍t lâng ê bīn-chêng, kap góa tò-khì, hō͘ góa kèng-pài Iâ-hô-hoa lí ê Siōng-tè.

(BCL) 掃羅講：「我有罪，雖然按呢，求你尊重我佇我的百姓的長老及以色列人的面前，及我倒去，互我敬拜耶和華──你的上帝。」

31

(THR) Sat-bó͘-jíⁿ chiū o̍at-tńg-sin tè Sò-lô khì; Sò-lô chiū kèng-pài Iâ-hô-hoa.

(BCL) 撒母耳就越轉身隨掃羅去，掃羅就敬拜耶和華。

32

(THR) Sat-bó͘-jíⁿ kóng, Lín tio̍h tòa A-má-le̍k ông A-kah lâi góa chia. A-kah chiū an-sim lâi kàu i ê bīn-chêng; A-kah kóng, Sí-bô ê kan-khó͘ tek-khak kè-khì lah.

(BCL) 撒母耳講：「恁著帶亞瑪力王亞甲來我遮。」亞甲就安心來到伊的面前，亞甲講，死無的艱苦的確過去啦。

33

(THR) Sat-bó͘-jíⁿ kóng, Lí ê to bat hō͘ hū-jîn-lâng bô kiáⁿ, án-ni lí ê lāu-bú tī hū-jîn-lâng tiong iā beh bô kiáⁿ; tùi án-ni Sat-bó͘-jíⁿ tī Kiat-kah, Iâ-hô-hoa ê bīn-chêng, chiong A-kah phòa kui-tè.

(BCL) 撒母耳講：「你的刀曾互婦仁人無子，按呢，你的老母佇婦仁人中也欲無子。」對按呢，撒母耳佇吉甲耶和華的面前將亞甲破歸塊。

34

(THR) Sat-bó͘-jíⁿ khì La̍h-má; Sò-lô chiūⁿ-khì i ê chhù, kàu Sò-lô ê Ki-pí-a.

(BCL) 撒母耳去拉瑪。掃羅上去伊的厝，到掃羅的基比亞。

35

(THR) Sat-bó͘-jíⁿ kàu i sí ê jı̍t, bô koh lâi kìⁿ Sò-lô; in-ūi Sat-bó͘-jíⁿ ūi-tio̍h Sò-lô iu-būn. Iâ-hô-hoa in-ūi siat-lı̍p Sò-lô chòe Í-sek-lia̍t ông iā thè-hóe.

(BCL) 撒母耳到伊死的日，無閣來見掃羅；因為撒母耳為著掃羅憂悶，耶和華因為設立掃羅做以色列王也退悔。

Bible Color Mark

• 台語漢字羅馬本
• 巴克禮全羅