撒母耳記上 第 2 章

1

(THR) Hap-ná kî-tó kóng, Góa ê sim in-ūi Iâ-hô-hoa lâi khòai-lo̍k, Góa ê kak in-ūi Iâ-hô-hoa lâi kia̍h-kôaiⁿ; Góa ǹg tùi-te̍k káⁿ kóng tōa-ōe, In-ūi góa ūi-tio̍h Lí ê chín-kiù lâi hoaⁿ-hí.

(BCL) 哈拿祈禱講：我的心因為耶和華來快樂；我的角因為耶和華來抬高。我向對敵敢講大話；因為我為著你的拯救來歡喜。

2

(THR) Bô ū sèng-ê chhin-chhiūⁿ Iâ-hô-hoa; Lí í-gōa bô pa̍t ê; Iā bô chio̍h-pôaⁿ chhin-chhiūⁿ lán ê Siōng-tè.

(BCL) 無有聖者親像耶和華；你以外無別個，也無石磐親像咱的上帝。

3

(THR) Lín m̄-thang chū-khoa kóng kiau-ngō͘ ê ōe; Iā m̄-thang hō͘ lām-sám ê ōe chhut lí ê chhùi; In-ūi Iâ-hô-hoa sī tì-sek ê Siōng-tè, Lâng ê kiâⁿ-chòe hō͘ I phoe-phêng.

(BCL) 恁呣通自誇講驕傲的話，也呣通互濫糝的話出你的嘴；因為耶和華是智識的上帝，人的行做互伊批評。

4

(THR) Ióng-sū ê keng í-keng at-chı̍h; Tio̍h-tak ê lâng ēng khùi-la̍t hâ-io.

(BCL) 勇士的弓已經遏折；著觸的人用氣力縖腰。

5

(THR) Pá-chiok-ê, hō͘ lâng chhiàⁿ lâi thàn-chia̍h; Iau-ê, bô koh iau; Bōe seng-io̍k ê, siⁿ chhit ê kiáⁿ, Ū chōe-chōe kiáⁿ-ê, hóan-tńg soe-jio̍k.

(BCL) 飽足的，互人倩來趁食；枵的，無閣枵。生育的，生七個子；有多多子的，反轉衰弱。

6

(THR) Iâ-hô-hoa hō͘ lâng sí, iā hō͘ lâng o̍ah; Hō͘ lâng lo̍h im-kan, iā hō͘ lâng khí-lâi.

(BCL) 耶和華互人死，也互人活，互人落陰間，也互人起來。

7

(THR) Iâ-hô-hoa hō͘ lâng sòng-hiong, iā hō͘ lâng hó-gia̍h; Hō͘ lâng kàng-kē, iā hō͘ lâng seng-kôaiⁿ.

(BCL) 耶和華互人喪鄉，也互人好額，互人降低，也互人升高。

8

(THR) I tùi tîn-ai seng-kôaiⁿ sòng-hiong lâng, Tùi pùn-sò-tui ko-seng khiàm-kheh ê lâng, Hō͘ in kap siú-léng saⁿ-kap chē, Sòa-chiap êng-kng ê chō-ūi; In-ūi tōe ê thiāu sio̍k tī Iâ-hô-hoa, I chiong sè-kài an-tì tī hit téng-bīn.

(BCL) 伊對塵埃升高喪鄉人，對糞埽堆高升欠缺的人，互及首領相及坐，續接榮光的座位。因為地的柱屬佇耶和華；伊將世界安置佇彼頂面。

9

(THR) I beh pó-siú I sèng-ê ê kha, Hō͘ pháiⁿ-lâng tī o͘-àm-tiong chēng-chauh-chauh; In-ūi lâng óa-khò khùi-la̍t bōe-ōe khah-iâⁿ.

(BCL) 伊欲保守伊聖者的腳，互歹人佇黑暗中靜寂寂；因為人倚靠氣力會卡贏。

10

(THR) Kap Iâ-hô-hoa saⁿ-chiⁿ-ê beh siū phah-chhùi; I beh tùi thiⁿ ēng lûi phah i; Iâ-hô-hoa beh sím-phòaⁿ tōe ê ke̍k-thâu; Siúⁿ-sù khùi-la̍t hō͘ I ê ông, Kú-khí I siū boah-iû-ê ê kak.

(BCL) 及耶和華相爭的，欲受拍碎；伊欲對天用雷拍伊，耶和華欲審判地的極頭，賞賜氣力互伊的王，舉起伊受抹油者的角。

11

(THR) Í-lī-ka-ná tò-khì La̍h-má kàu i ê ke. Hit ê gín-ná tī chè-si Í-lī ê bīn-chêng ho̍k-sāi Iâ-hô-hoa.

(BCL) 以利加拿倒去拉瑪到伊的家。彼個囝仔佇祭司以利的面前服事耶和華。

12

(THR) Í-lī hiah ê kiáⁿ sī húi-lūi, m̄-bat Iâ-hô-hoa.

(BCL) 以利許個子是匪類，呣識耶和華。

13

(THR) Chè-si tī peh-sìⁿ ê lē, chiū-sī kìⁿ-nā lâng hiàn-chè teh chú-bah ê sî, chè-si ê lô͘-po̍k chiū lâi, chhiú kia̍h saⁿ-jiáu ê chhe;

(BCL) 祭司佇百姓的例就是：見若人獻祭，煮肉的時，祭司的奴僕就來，手抬三爪的叉，

14

(THR) ēng chhe chhah-jı̍p poah, á-sī tiáⁿ, á-sī thih-tiō, á-sī e, kìⁿ-nā só͘ chhe-chhut-lâi ê bah, chè-si lóng the̍h chòe ka-kī-ê; in tī Sī-lô chhin-chhiūⁿ án-ni khóan-thāi kìⁿ-nā lâi hia ê Í-sek-lia̍t lâng.

(BCL) 用叉插入　，抑是鼎，抑是鐵銚，抑是鍋，見若所叉出來的肉，祭司攏提做家己的。佇示羅親像按呢款待見若來遐的以色列人。

15

(THR) Koh tī bē sio iû-lâ ê tāi-seng, chè-si ê lô͘-po̍k chiū lâi, kā hiàn-chè ê lâng kóng, Lí tio̍h ēng bah hō͘ chè-si thang pek, in-ūi i m̄-ài lí kè-chú ê bah, sī ài chhiⁿ-ê.

(BCL) 閣佇未燒油膋的代先，祭司的奴僕就來給獻祭的人講：「你著用肉互祭司，通。因為伊呣愛你過煮的肉，是愛生的。」

16

(THR) Hit-lâng nā tùi i kóng, Beh tāi-seng sio iû, jiân-āu thang chiàu lí ê sim só͘ ài the̍h-khì, i chiū kóng, M̄ ah, chit-tia̍p tio̍h hō͘ góa; nā m̄, góa beh kiông-kiông the̍h-khì.

(BCL) 彼人若對伊講：「欲代先燒油，然後通照你的心所愛提去。」伊就講：「呣啊，此霎著互我；若呣，我欲強強提去。」

17

(THR) Án-ni hiah ê siàu-liân lâng ê chōe tī Iâ-hô-hoa ê bīn-chêng chin-tāng; in-ūi lâng iàm-ò͘ⁿ Iâ-hô-hoa ê chè-sū.

(BCL) 按呢，許個少年人的罪佇耶和華的面前真重，因為人厭惡耶和華的祭祀。

18

(THR) Hit-sî Sat-bó͘-jíⁿ iáu sòe-hàn, chhēng iù-tōe-pò͘ ê í-hut-tek, tī Iâ-hô-hoa ê bīn-chêng ho̍k-sāi.

(BCL) 彼時，撒母耳猶細漢，穿幼苧布的以弗得，佇耶和華的面前服事。

19

(THR) Koh i ê lāu-bú ta̍k-nî kā i chòe chı̍t-niá sòe-niá ê tn̂g-saⁿ; kap i ê tiōng-hu chiūⁿ-lâi hiàn nî-chè ê sî, tòa-lâi hō͘ i.

(BCL) 閣伊的老母逐年給伊做一領細領的長衫，及伊的丈夫上來獻年祭的時帶來互伊。

20

(THR) Í-lī kā Í-lī-ka-ná kap i ê bó͘ chiok-hok, kóng, Gōan Iâ-hô-hoa tùi chit ê hū-jîn-lâng koh siúⁿ-sù lí hō͘-è, lâi thòe só͘ hêng hō͘ Iâ-hô-hoa ê. In chiū tò-khì pún só͘-chāi.

(BCL) 以利給以利加拿及伊的某祝福，講：「願耶和華對此個婦仁人閣賞賜你後裔，來替所還互耶和華的。」就倒去本所在。

21

(THR) Iâ-hô-hoa khòaⁿ-kò͘ Hap-ná; i chiū hôai-īn siⁿ saⁿ ê kiáⁿ, nn̄g ê cha-bó͘-kiáⁿ. Gín-ná Sat-bó͘-jíⁿ iā tī Iâ-hô-hoa ê bīn-chêng chiām-chiām tōa-hàn.

(BCL) 耶和華看顧哈拿，伊就懷孕生三個子，二個查某子。囝仔撒母耳也佇耶和華的面前漸漸大漢。

22

(THR) Í-lī chin-lāu, thiaⁿ-kìⁿ i ê kiáⁿ tùi Í-sek-lia̍t chèng-lâng só͘ kiâⁿ it-chhè ê sū, koh thiaⁿ-kìⁿ in kap hōe-bō͘ mn̂g-chêng chòe-kang ê hū-jîn-lâng su-thong.

(BCL) 以利真老，聽見伊的子對以色列眾人所行一切的事，閣聽見及會幕門前做工的婦仁人私通，

23

(THR) I chiū kā in kóng, Lín siáⁿ-sū kiâⁿ chiah ê sū ah? góa tùi chiah ê chèng peh-sìⁿ thiaⁿ-kìⁿ lín ê pháiⁿ só͘ kiâⁿ;

(BCL) 伊就給講：「恁啥事行諸個事啊？我對諸個眾百姓聽見恁的歹所行。

24

(THR) góa ê kiáⁿ ah, m̄-thang án-ni; in-ūi góa só͘ thiaⁿ-kìⁿ ê hong-siaⁿ sī m̄-hó; lín hō͘ Iâ-hô-hoa ê peh-sìⁿ hōan-chōe.

(BCL) 我的子啊，呣通按呢！因為我所聽見的風聲是呣好，恁互耶和華的百姓犯罪。

25

(THR) Lâng nā tek-chōe lâng, Siōng-tè sím-phòaⁿ i; lâng nā tek-chōe Iâ-hô-hoa, chī-chūi thòe i kî-tó? Nā-sī in m̄-thiaⁿ lāu-pē ê ōe; in-ūi Iâ-hô-hoa chûn-ì beh thâi in.

(BCL) 人若得罪人，上帝審判伊；人若得罪耶和華，是誰替伊祈禱？」若是呣聽老父的話，因為耶和華存意欲。

26

(THR) Gín-ná Sat-bó͘-jíⁿ chiām-chiām tōa-hàn, tit-tio̍h Iâ-hô-hoa kap lâng ná thiàⁿ i.

(BCL) 囝仔撒母耳漸漸大漢，得著耶和華及人愈疼伊。

27

(THR) Ū Siōng-tè ê lô͘-po̍k lâi kìⁿ Í-lī, tùi i kóng, Iâ-hô-hoa án-ni kóng, Lí ê chó͘-kong ê ke, chêng tī Ai-kı̍p Hoat-ló ê ke chòe lô͘-po̍k ê sî, Góa kiám bô tùi i chhut-hiān mah?

(BCL) 有上帝的奴僕來見以利，對伊講：「耶和華按呢講：『你的祖公的家前佇埃及法老的家做奴僕的時，我豈無對伊出現嗎？

28

(THR) Góa kiám bô tùi Í-sek-lia̍t chèng chi-phài, kéng i chòe Góa ê chè-si, tī Góa ê tôaⁿ-téng hiàn-chè, sio-hiuⁿ, chhēng í-hut-tek tī Góa ê bīn-chêng; Í-sek-lia̍t cho̍k só͘ hiàn ê hé-chè Góa kiám bô lóng hō͘ i ê chó͘-kong ê ke mah?

(BCL) 我豈無對以色列眾支派，揀伊做我的祭司，佇我的壇頂獻祭，燒香，穿以弗得佇我的面前，以色列族所獻的火祭我豈無攏互伊的祖公的家嗎？

29

(THR) Góa só͘ bēng-lēng ê chè-sū lé-mı̍h tī Góa khiā-khí ê só͘-chāi ê, lín siáⁿ-sū thún-ta̍h i, chun-tiōng lí ê kiáⁿ khah kè-thâu chun-tiōng Góa, ēng Góa ê peh-sìⁿ Í-sek-lia̍t só͘ hiàn siōng-hó ê lé-mı̍h, lâi ka-kī pûi ah?

(BCL) 我所命令的祭祀禮物佇我徛起的所在的，恁啥事睭踏伊，尊重你的子卡過頭尊重我，用我的百姓以色列所獻上好的禮物來家己肥啊？』

30

(THR) Só͘-í Iâ-hô-hoa Í-sek-lia̍t ê Siōng-tè kóng, Góa sı̍t-chāi bat kóng, lí ê ke, lí ê lāu-pē ê ke beh éng-óan kiâⁿ tī Góa ê bīn-chêng; chóng-sī taⁿ Iâ-hô-hoa kóng, Góa koat-tòan m̄ án-ni; in-ūi chun-tiōng Góa ê, Góa beh chun-tiōng i, biáu-sī Góa ê, i beh siū khòaⁿ-khin.

(BCL) 所以，耶和華──以色列的上帝講：『我實在曾講，你的家你的老父的家欲永遠行佇我的面前；總是今耶和華講，我決斷呣按呢。因為尊重我的，我欲尊重伊；藐視我的，伊欲受看輕。

31

(THR) Khòaⁿ ah, jı̍t-chí beh kàu, Góa beh chām-tn̄g lí ê chhiú-kut, kap lí ê pē ê ke ê chhiú-kut, hō͘ lí ê ke-tiong bô chı̍t ê lāu-lâng.

(BCL) 看啊，日子欲到，我欲斬斷你的手骨及你的父的家的手骨，互你的家中無一個老人。

32

(THR) Tī Siōng-tè hō͘ Í-sek-lia̍t lâng hióng-hok ê sî, lí beh khòaⁿ-kìⁿ Góa ê chhù ê soe-pāi; tī lí ê ke-tiong beh éng-óan bô chı̍t ê lāu-lâng;

(BCL) 佇上帝互以色列人享福的時，你欲看見我的厝的衰敗。佇你的家中欲永遠無一個老人。

33

(THR) sio̍k tī lí ê lâng, Góa bô tùi Góa ê tôaⁿ châu-bia̍t ê, beh phah-pháiⁿ lí ê ba̍k-chiu, iu-siong lí ê sim; lí ke-tiong só͘ koh siⁿ ê lâng, lóng beh tiong-liân chiū sí;

(BCL) 屬佇你的人我無對我的壇剿滅的；欲拍歹你的目睭、憂傷你的心。你家中所閣生的人攏欲中年就死。

34

(THR) lí nn̄g ê kiáⁿ Hô-hut-nî Hui-nî-hap só͘ tú-tio̍h-ê, beh chòe lí ê tiāu-thâu; in nn̄g-lâng beh tâng chı̍t jı̍t sí.

(BCL) 你二個子何弗尼、非尼哈所抵著的欲做你的兆頭：二人欲同一日死。

35

(THR) Góa beh ūi ka-kī lı̍p chı̍t ê chīn-tiong ê chè-si, i beh chiàu Góa ê sim Góa ê ì lâi kiâⁿ; Góa beh ūi i kiàn-lı̍p kian-kò͘ ê ke; i beh éng-óan kiâⁿ tī Góa só͘ boah-iû-ê ê bīn-chêng.

(BCL) 我欲為家己立一個盡忠的祭司；伊欲照我的心我的意來行。我欲為伊建立堅固的家；伊欲永遠行佇我所抹油者的面前。

36

(THR) Lí ê ke só͘ chhun ê lâng lóng beh lâi kūi-pài i, kiû chı̍t ê gûn, chı̍t ê piáⁿ, kóng, Kiû lí hō͘ góa tng chè-si-chit ê chı̍t-ê, hō͘ góa thang tit-tio̍h tām-po̍h piáⁿ lâi chia̍h.

(BCL) 你的家所剩的人攏欲來跪拜伊，求一個銀，一個餅，講：求你互我當祭司職的一個，互我通得著淡薄餅來食。』」

Bible Color Mark

• 台語漢字羅馬本
• 巴克禮全羅