撒母耳記上 第 3 章

1

(THR) Gín-ná Sat-bó͘-jíⁿ tī Í-lī ê bīn-chêng ho̍k-sāi Iâ-hô-hoa. Tng hiah ê jı̍t Iâ-hô-hoa ê ōe chin hi-hán, bô siông-siông ū khé-sī.

(BCL) 囝仔撒母耳佇以利的面前服事耶和華。當許個日，耶和華的話真稀罕，無常常有啟示。

2

(THR) Chı̍t-jı̍t Í-lī khùn tī ka-kī ê só͘-chāi, i ê ba̍k-chiu í-keng bū, khòaⁿ bōe bêng.

(BCL) 一日，以利睏佇家己的所在；伊的目睭已經霧，看明。

3

(THR) Siōng-tè ê teng iáu-bē hoa, Sat-bó͘-jíⁿ í-keng tī Iâ-hô-hoa ê tiān, tī Siōng-tè ê iok-kūi hia, teh khùn.

(BCL) 上帝的燈猶未熄，撒母耳已經佇耶和華的殿，佇上帝的約櫃遐睏。

4

(THR) Iâ-hô-hoa kiò Sat-bó͘-jíⁿ; i ìn kóng, Góa tī-chia.

(BCL) 耶和華叫撒母耳。伊應講：「我佇遮！」

5

(THR) Chiū cháu kàu Í-lī hia, kóng, Góa tī-chia, in-ūi lí kiò góa. Í-lī kóng, Góa bô kiò lí, lí tò-khì khùn. I chiū khì khùn.

(BCL) 就走到以利遐，講：「我佇遮，因為你叫我。」以利講：「我無叫你，你倒去睏。」伊就去睏。

6

(THR) Iâ-hô-hoa koh kiò Sat-bó͘-jíⁿ; Sat-bó͘-jíⁿ khí-lâi, khì Í-lī hia, kóng, Góa tī-chia, in-ūi lí kiò góa. I ìn kóng, Góa ê kiáⁿ ah, góa bô kiò lí, thang koh khì khùn.

(BCL) 耶和華閣叫撒母耳。撒母耳起來，去以利遐，講：「我佇遮，因為你叫我。」伊應講：「我的子啊，我無叫你，通閣去睏。」

7

(THR) Hit-sî Sat-bó͘-jíⁿ iáu-bē bat Iâ-hô-hoa, Iâ-hô-hoa ê ōe bē ū khé-sī i.

(BCL) 彼時撒母耳猶未識耶和華，耶和華的話未有啟示伊。

8

(THR) Iâ-hô-hoa tē-saⁿ-pái kiò Sat-bó͘-jíⁿ. Sat-bó͘-jíⁿ khí-lâi, khì Í-lī hia, kóng, Góa tī-chia, in-ūi lí kiò góa. Í-lī chiah chai sī Iâ-hô-hoa kiò gín-ná.

(BCL) 耶和華第三擺叫撒母耳。撒母耳起來，去以利遐，講：「我佇遮，因為你叫我。」以利才知是耶和華叫囝仔。

9

(THR) Tùi án-ni, Í-lī kā Sat-bó͘-jíⁿ kóng, Lí koh khì khùn; I nā koh kiò lí, lí chiū kóng, Iâ-hô-hoa ah, chhiáⁿ Lí kóng, Lí ê lô͘-po̍k thiaⁿ. Sat-bó͘-jíⁿ chiū khì khùn tī i ê só͘-chāi.

(BCL) 對按呢以利給撒母耳講：「你閣去睏；伊若閣叫你，你就講：『耶和華啊，請你講，你的奴僕聽！』」撒母耳就去，睏佇伊的所在。

10

(THR) Iâ-hô-hoa koh lâi khiā-teh, chhin-chhiūⁿ chêng kúi-nā pái kiò, Sat-bó͘-jíⁿ ah, Sat-bó͘-jíⁿ ah. Sat-bó͘-jíⁿ ìn kóng, Chhiáⁿ kóng, Lí ê lô͘-po̍k teh thiaⁿ.

(BCL) 耶和華閣來徛，親像前幾若擺叫：「撒母耳啊！撒母耳啊！」撒母耳應講：「請講，你的奴僕聽！」

11

(THR) Iâ-hô-hoa kā Sat-bó͘-jíⁿ kóng, Khòaⁿ ah, Góa tī Í-sek-lia̍t tiong beh kiâⁿ chı̍t hāng sū, hō͘ thiaⁿ-kìⁿ ê lâng, nn̄g ê hī-khang beh tiō-khí-lâi.

(BCL) 耶和華給撒母耳講：「看啊，我佇以色列中欲行一項事，互聽見的人二個耳孔欲抖起來。

12

(THR) Góa lūn Í-lī ê ke só͘ kóng ê, kàu hit-jı̍t thâu-kàu-bé Góa beh èng-giām tī i.

(BCL) 我論以利的家所講的，到彼日，頭到尾我欲應驗佇伊。

13

(THR) Góa bat kā i kóng, Góa beh ūi-tio̍h i só͘ chai ê chōe, éng-óan sím-phòaⁿ i ê ke; in-ūi i ê kiáⁿ ka-kī chio chiù-chó͘, i iā bô kìm-chí in.

(BCL) 我曾給伊講我欲為著伊所知的罪永遠審判伊的家，因為伊的子家己招咒詛，伊也無禁止。

14

(THR) Só͘-í Góa ū tùi Í-lī ê ke chiù-chōa kóng, Í-lī ê ke ê chōe-kòa, sui-jiân chè-sū lé-mı̍h, éng-óan bōe-ōe sio̍k-hôe.

(BCL) 所以我有對以利的家咒誓講：『以利的家的罪過，雖然祭祀禮物，永遠會贖回。』」

15

(THR) Sat-bó͘-jíⁿ khùn kàu thiⁿ-kng, chiū khui Iâ-hô-hoa ê tiān-mn̂g. Sat-bó͘-jíⁿ m̄-káⁿ chiong īⁿ-siōng kā Í-lī kóng.

(BCL) 撒母耳睏到天光，就開耶和華的殿門，撒母耳呣敢將異象給以利講。

16

(THR) Í-lī kiò Sat-bó͘-jíⁿ, kóng, Góa ê kiáⁿ Sat-bó͘-jíⁿ ah. I ìn kóng, Góa tī-chia.

(BCL) 以利叫撒母耳講：「我的子撒母耳啊！」

17

(THR) Í-lī kóng, Iâ-hô-hoa tùi lí kóng sím-mı̍h? kiû lí m̄-thang ún-môa tī góa; nā chiong I só͘ kā lí kóng-ê tùi góa ún-ba̍t chı̍t-kù, gōan Siōng-tè ka-pē chek-ho̍at lí.

(BCL) 伊應講：「我佇遮！」以利講：「耶和華對你講甚麼？求你呣通隱瞞佇我；若將伊所給你講的對我隱密一句，願上帝加倍責罰你。」

18

(THR) Sat-bó͘-jíⁿ chiū chiong hiah ê ōe lóng kā i kóng, iā bô tùi i ún-môa. Í-lī kóng, Sī Iâ-hô-hoa, gōan I chiàu I só͘ khòaⁿ-chòe hó-ê lâi kiâⁿ.

(BCL) 撒母耳就將許個話攏給伊講，也無對伊隱瞞。以利講：「是耶和華，願伊照伊所看做好的來行。」

19

(THR) Sat-bó͘-jíⁿ chiām-chiām tōa-hàn; Iâ-hô-hoa kap i tī-teh, hō͘ i só͘ kóng-ê, bô chı̍t-kù bô èng-giām.

(BCL) 撒母耳漸漸大漢，耶和華及伊佇，互伊所講的無一句無應驗。

20

(THR) Tùi Tàn kàu Pia̍t-sī-pa, só͘ ū ê Í-sek-lia̍t lâng lóng chai Sat-bó͘-jíⁿ siat-lı̍p chòe Iâ-hô-hoa ê sian-ti.

(BCL) 對但到別是巴所有的以色列人攏知撒母耳受設立做耶和華的先知。

21

(THR) Iâ-hô-hoa koh tī Sī-lô hián-hiān, in-ūi Iâ-hô-hoa ēng Iâ-hô-hoa ê ōe tī Sī-lô hián-bêng tī Sat-bó͘-jíⁿ.

(BCL) 耶和華閣佇示羅顯現；因為耶和華用耶和華的話佇示羅顯明佇撒母耳，撒母耳的話遍傳佇以色列眾人。

Bible Color Mark

• 台語漢字羅馬本
• 巴克禮全羅