提摩太前書 第 4 章

1

(THR) Nā-sī Sèng Sîn bêng-bêng kóng, tī āu-lâi ê sî-kî beh ū lâng pōe-biū sìn, ì-hiòng hiah ê bê-he̍k lâng ê sîn, kap kúi ê kà-sī,

(BCL) 若是聖神明明講，佇後來的時期，欲有人悖謬信，意向許個迷惑人的神及鬼的教示。

2

(THR) tùi pe̍h-chha̍t lâng ê ké-hó, in ê liông-sim chhin-chhiūⁿ hō͘ jia̍t ê thih kù-tio̍h,

(BCL) 對白賊人的假好；的良心親像互熱的鐵灸著。

3

(THR) kìm-chí kè-chhōa, kìm-kài chia̍h-mı̍h, chiū-sī Siōng-tè só͘ chhòng-chō, hō͘ sìn lâi bêng-pe̍k chin-lí ê lâng, ēng chiok-siā lâi hióng-siū ê.

(BCL) 禁止嫁娶，禁戒食物，就是上帝所創造，互信來明白真理的人用祝謝來享受的。

4

(THR) In-ūi Siōng-tè só͘ chhòng-chō ê mı̍h lóng sī hó, nā chiok-siā lâi niá-siū i, chiū bô chı̍t hāng thang khì-sak.

(BCL) 因為上帝所創造的物攏是好，若祝謝來領受伊，就無一項通棄拺，

5

(THR) In-ūi tùi Siōng-tè ê ōe kap kî-tó chiū chiâⁿ-sèng.

(BCL) 因為對上帝的話及祈禱就成聖。

6

(THR) Nā chiong chiah ê sū tiám-chhíⁿ hiaⁿ-tī, chiū lí beh chòe Ki-tok Iâ-so͘ hó ê chhe-ēng, ēng sìn-tō ê ōe kap lí só͘ sūn-thàn hó ê kà-sī ê ōe lâi tit-tio̍h pôe-iúⁿ.

(BCL) 若將諸個事點醒兄弟，就你欲做基督耶穌好的差用，用信道的話及你所順趁好的教示的話來得著培養。

7

(THR) Tio̍h khì-sak chho͘-sio̍k ê ōe kap lāu hū-jîn-lâng ê phàⁿ-kó͘. Tio̍h ka-kī liān-sı̍p kàu tī kèng-khiân.

(BCL) 著棄拺粗俗的話及老婦仁人的冇古，著家己練習到佇敬虔。

8

(THR) In-ūi liān-sı̍p seng-khu hit ê lī-ek sī sió-khóa, nā-sī kèng-khiân chiū hōan sū ū lī-ek; in-ūi ū hiān-sî kap chiong-lâi o̍ah-miā ê èng-ún.

(BCL) 因為「練習身軀，彼個利益是小可；若是敬虔，就凡事有利益，因為有現時及將來活命的應允。」

9

(THR) Chit kù ōe sī thang sìn, thang chiâu-chn̂g chiap-la̍p ê.

(BCL) 此句話是通信，通齊全接納的。

10

(THR) In-ūi lán tio̍h-bôa chhut-la̍t sī ūi-tio̍h chit-ê, in-ūi lán ê ǹg-bāng chāi-tī chin-o̍ah ê Siōng-tè, I sī chèng lâng ê Kiù-chú, tī chiah ê sìn ê lâng koh khah sī.

(BCL) 因為咱著磨出力，是為著此個，因為咱的向望在佇真活的上帝；伊是眾人的救主，佇諸個信的人閣卡是。

11

(THR) Chiah ê sū lí tio̍h bēng-lēng lâi kà-sī.

(BCL) 諸個事，你著命令來教示。

12

(THR) Bo̍h-tit in-ūi lí ê siàu-liân hō͘ lâng khòaⁿ-khin; tio̍h tī kóng ōe, tī kiâⁿ chòe, tī jîn-ài, tī sìn, tī chheng-khì, chòe sìn ê lâng ê bô͘-iūⁿ.

(BCL) 莫得因為你的少年，互人看輕，著佇講話、佇行做、佇仁愛、佇信、佇清氣，做信的人的模樣。

13

(THR) Tio̍h tì-ì tha̍k-chheh, khòan-bián kà-sī, kàu tī góa lâi.

(BCL) 著致意讀冊、勸勉、教示，到佇我來。

14

(THR) Lí sim-lāi ê un-sù, tùi sian-ti ê ōe kap tiúⁿ-ló-hōe hōaⁿ chhiú lâi hō͘ lí ê, lí m̄ thang hut-lio̍k.

(BCL) 你心內的恩賜，對先知的話及長老會按手來互你的，你呣通忽略。

15

(THR) Lí tio̍h tì-ì choan-sim tī chiah ê sū, hō͘ lí ê chìn-pō͘ hián-bêng tī chèng lâng.

(BCL) 你著致意專心佇諸個事，互你的進步顯明佇眾人。

16

(THR) Tio̍h kín-sīn lí pún-sin í-kı̍p lí ê kà-sī, siông-siông koan-sim tī chiah ê sū; in-ūi án-ni kiâⁿ, chiū beh kiù lí pún-sin kap thiaⁿ lí ê lâng.

(BCL) 著謹慎你本身以及你的教示，常常關心佇諸個事；因為按呢行，就欲救你本身，及聽你的人。

Bible Color Mark

• 台語漢字羅馬本
• 巴克禮全羅