歷代志下 第 19 章

1

(THR) Iû-tāi ông Iok-sa-hoat pêng-an tò-khì Iâ-lō͘-sat-léng kàu i ê chhù.

(BCL) 猶大王約沙法平安倒去耶路撒冷，到伊的厝。

2

(THR) Sian-kiàn Hap-ná-nî ê kiáⁿ Iâ-hō͘ chhut-lâi ngiâ-chih Iok-sa-hoat ông, kā i kóng, Lí pang-chān pháiⁿ-lâng, thiàⁿ òan-hūn Iâ-hô-hoa ê lâng, ha̍p-gî mah? In-ūi án-ni Iâ-hô-hoa ê siū-khì lîm-kàu lí.

(BCL) 先見哈拿尼的子耶戶出來迎接約沙法王，給伊講：「你幫助歹人，疼怨恨耶和華的人合宜嗎？因為按呢耶和華的受氣臨到你。

3

(THR) Nā-sī lí iáu ū hó-sū tī-teh; in-ūi lí tùi chit ê tōe-hng tû-khì A-su-tha-lio̍k, koh tiāⁿ-tio̍h lí ê sim chhē Siōng-tè.

(BCL) 若是你猶有好事佇，因為你對此個地方除去亞斯他錄，閣定著你的心尋上帝。」

4

(THR) Iok-sa-hoat tiàm tī Iâ-lō͘-sat-léng; āu-lâi koh chhut-khì sûn-sī peh-sìⁿ ê tiong-kan, tùi Pia̍t-sī-pa kàu Í-hoat-liân soaⁿ-tōe, chhōa peh-sìⁿ kui-ǹg Iâ-hô-hoa in lia̍t-chó͘ ê Siōng-tè.

(BCL) 約沙法踮佇耶路撒冷，後來閣出去巡視百姓的中間，對別是巴到以法蓮山地，導百姓歸向耶和華──列祖的上帝；

5

(THR) Koh siat-lı̍p sím-phòaⁿ-koaⁿ tī kéng-lāi, tī Iû-tāi kian-kò͘ ê siâⁿ; ta̍k ê siâⁿ lóng án-ni.

(BCL) 閣設立審判官佇境內佇猶大堅固的城，逐個城攏按呢，

6

(THR) Kā hiah ê sím-phòaⁿ-koaⁿ kóng, Kín-sīn lín ê só͘-chòe; in-ūi lín sím-phòaⁿ m̄-sī ūi-tio̍h lâng, sī ūi-tio̍h Iâ-hô-hoa; lín sím-phòaⁿ ê sî, I kap lín tī-teh.

(BCL) 給許個審判官講：「謹慎恁的所做；因為恁審判呣是為著人，是為著耶和華。恁審判的時，伊及恁佇。

7

(THR) Taⁿ lín tio̍h kiaⁿ-ùi Iâ-hô-hoa; kín-sīn chòe tāi-chì; in-ūi Iâ-hô-hoa lán ê Siōng-tè bô-ū put-gī, bô phian-thán, bô siū pò͘-lō͘.

(BCL) 今恁著驚畏耶和華，謹慎做代誌；因為耶和華──咱的上帝無有不義，無偏袒，無收賄賂。」

8

(THR) Iok-sa-hoat tùi Lī-bī lâng, kap chè-si, kap Í-sek-lia̍t cho̍k-tiúⁿ tiong, siat-lı̍p lâng, tī Iâ-lō͘-sat-léng ūi Iâ-hô-hoa phòaⁿ-tòan tāi-chì, kap saⁿ-kò. In chiū tò-khì Iâ-lō͘-sat-léng.

(BCL) 約沙法對利未人及祭司，及以色列族長中設立人，佇耶路撒冷為耶和華判斷代誌，及相告，伊就倒去耶路撒冷。

9

(THR) I koh bēng-lēng in kóng, Lín tio̍h kiaⁿ-ùi Iâ-hô-hoa, chīn-tiong sêng-sı̍t sim lâi kiâⁿ chit ê tāi-chì.

(BCL) 伊閣命令講：「恁著驚畏耶和華，盡忠誠實心來行此個代誌。

10

(THR) Kìⁿ-nā lín ê hiaⁿ-tī tiàm tī in hiah ê siâⁿ--ê, nā ū oan-ke ê sū, lâi chiū-kūn lín, bô-lūn sím-mı̍h tāi-chì, he̍k-sī ūi-tio̍h lâu huih, á-sī tī lu̍t-hoat kap kài-bēng, á-sī lu̍t-lē kap hoat-tō͘ ê tiong-kan, lín tio̍h kéng-kài in, m̄-thang tek-chōe Iâ-hô-hoa, tì-kàu siū-khì lîm-kàu lín, kap lín ê hiaⁿ-tī; lín án-ni chòe, chiū bô chōe.

(BCL) 見若恁的兄弟踮佇許個城者，若有冤家的事來就近恁，無論甚麼代誌，或是為著流血，抑是佇律法及誡命，抑是律例及法度的中間，恁著警戒，呣通得罪耶和華，致到受氣臨到恁及恁的兄弟；恁按呢做，就無罪。

11

(THR) Khòaⁿ ah, kìⁿ-nā sio̍k Iâ-hô-hoa ê sū, ū chè-si-thâu A-má-lī-ngá kóan-lí lín; kìⁿ-nā sio̍k ông ê sū, ū Iû-tāi ê cho̍k-tiúⁿ Í-sı̍t-má-lī ê kiáⁿ Se-pa-tē-ngá kóan-lí lín. Tī lín ê bīn-chêng ū Lī-bī lâng chòe koaⁿ-tiúⁿ; lín tio̍h hó-táⁿ chòe tāi-chì, gōan Iâ-hô-hoa kap hó-lâng tī-teh.

(BCL) 看啊！見若屬耶和華的事，有祭司頭亞瑪利雅管理恁；見若屬王的事，有猶大的族長以實瑪利的子西巴第雅管理恁；佇恁的面前有利未人做官長。恁著好膽做代誌，願耶和華及好人佇。」

Bible Color Mark

• 台語漢字羅馬本
• 巴克禮全羅