歷代志下 第 18 章

1

(THR) Iok-sa-hoat ū chōe-chōe hè-châi kap êng-kng, chiū kap A-hap kiat-chhin.

(BCL) 約沙法有多多貨財及榮光，就及亞哈結親。

2

(THR) Kè kúi-nā nî, i lo̍h-khì Sat-má-lī-a kìⁿ A-hap; A-hap ūi-tio̍h i kap tè i ê peh-sìⁿ, thâi chōe-chōe gû, iûⁿ, khǹg i kap i saⁿ-kap khì Ki-lia̍t ê La̍h-bo̍at.

(BCL) 過幾若年，伊落去撒瑪利亞見亞哈；亞哈為著伊及隨伊的百姓多多牛羊，勸伊及伊相及去基列的拉末。

3

(THR) Í-sek-lia̍t ông A-hap kā Iû-tāi ông Iok-sa-hoat kóng, Lí beh kap góa khì Ki-lia̍t ê La̍h-bo̍at á-m̄? Ìn kóng, Góa chhin-chhiūⁿ lí, góa ê peh-sìⁿ chhin-chhiūⁿ lí ê peh-sìⁿ, góan beh kap lí khì kau-chiàn.

(BCL) 以色列王亞哈給猶大王約沙法講：「你欲及我去基列的拉末抑呣？」應講：「我親像你，我的百姓親像你的百姓，阮欲及你去交戰。」

4

(THR) Iok-sa-hoat kā Í-sek-lia̍t ông kóng, Chhiáⁿ lí tāi-seng mn̄g Iâ-hô-hoa ê ì-sù.

(BCL) 約沙法給以色列王講：「請你代先問耶和華的意思。」

5

(THR) Í-sek-lia̍t ông chiū chū-chı̍p sian-ti sì-pah lâng, mn̄g in kóng, Góan tio̍h chiūⁿ khì Ki-lia̍t ê La̍h-bo̍at lâi kau-chiàn, á-sī tio̍h soah ah? In ìn kóng, Thang chiūⁿ-khì; in-ūi Siōng-tè beh ēng in kau tī ông ê chhiú.

(BCL) 以色列王就聚集先知四百人，問講：「阮著上去基列的拉末來交戰，抑是著息啊？」應講：「通上去，因為上帝欲用交佇王的手。」

6

(THR) Iok-sa-hoat kóng, Tī-chia kiám bô iáu ū Iâ-hô-hoa ê sian-ti hō͘ lán thang tùi i lâi mn̄g mah?

(BCL) 約沙法講：「佇遮豈無猶有耶和華的先知，互咱通對伊來問嗎？」

7

(THR) Í-sek-lia̍t ông kā Iok-sa-hoat kóng, Iáu ū chı̍t-lâng lán thang tùi i lâi mn̄g Iâ-hô-hoa; chóng-sī góa òan-hūn i, in-ūi i só͘ chhàm-gú góa ê, bô chı̍t-hāng hó, chí-ū siông-siông kóng chai-ē nā-tiāⁿ. Chit lâng sī Im-la̍h ê kiáⁿ Bí-kai-ngá. Iok-sa-hoat kóng, Chhiáⁿ ông bo̍h-tit án-ni kóng.

(BCL) 以色列王給約沙法講：「猶有一人，咱通對伊來問耶和華。總是我怨恨伊；因為伊所讖語我的，無一項好，只有常常講災禍若定。此人是音拉的子米該雅。」約沙法講：「請王莫得按呢講。」

8

(THR) Í-sek-lia̍t ông chiū tiàu chı̍t ê koaⁿ-ôan lâi, kóng, Lí khì kiò Im-la̍h ê kiáⁿ Bí-kai-ngá kín-kín lâi.

(BCL) 以色列王就召一個官員來，講：「你去叫音拉的子米該雅緊緊來。」

9

(THR) Í-sek-lia̍t ông kap Iû-tāi ông Iok-sa-hoat ta̍k-ê chē i ê chō-ūi, chhēng lé-ho̍k, chē tī Sat-má-lī-a siâⁿ-mn̂g-kháu khoah ê só͘-chāi; chèng sian-ti ta̍k-ê tī in ê bīn-chêng chhàm-gú.

(BCL) 以色列王及猶大王約沙法逐個坐伊的座位，穿禮服坐佇撒瑪利亞城門口闊的所在，眾先知逐個佇的面前讖語。

10

(THR) Ki-ná-ná ê kiáⁿ Se-tí-ka chòe thih-kak, kóng, Iâ-hô-hoa án-ni kóng, Lí beh ēng chiah-ê tak A-lân lâng, kàu in bia̍t-bô.

(BCL) 基拿拿的子西底家做鐵角，講：「耶和華按呢講：『你欲用諸個觸亞蘭人，到滅無。』」

11

(THR) Chèng sian-ti lóng án-ni chhàm-gú kóng, Thang chiūⁿ-khì Ki-lia̍t ê La̍h-bo̍at, beh tek-sèng; in-ūi Iâ-hô-hoa beh chiong i kau tī ông ê chhiú.

(BCL) 眾先知攏按呢讖語講：「通上去基列的拉末，欲得勝，因為耶和華欲將伊交佇王的手。」

12

(THR) Hit-ê khì kiò Bí-kai-ngá ê sù-chiá kā i kóng, Khòaⁿ ah, chèng sian-ti lóng kóng chı̍t-iūⁿ ōe, tùi ông kóng hó-sū; kiû lí só͘ kóng-ê kap in saⁿ-tâng, pîⁿ-pîⁿ kóng hó-ōe.

(BCL) 彼個去叫米該雅的使者給伊講：「看啊，眾先知攏講一樣話對王講好事，求你所講的及相同，平平講好話。」

13

(THR) Bí-kai-ngá kóng, Góa kí éng-o̍ah ê Iâ-hô-hoa chiù-chōa lâi kóng, góa ê Siōng-tè kóng sím-mı̍h, góa beh kóng i.

(BCL) 米該雅講：「我指永活的耶和華咒誓來講，我的上帝講甚麼，我欲講伊。」

14

(THR) Bí-kai-ngá kàu ông ê bīn-chêng, ông mn̄g i kóng, Bí-kai-ngá ah, góan tio̍h chiūⁿ-khì Ki-lia̍t ê La̍h-bo̍at lâi kau-chiàn, á-sī tio̍h soah ah? I ìn kóng, Thang chiūⁿ-khì, beh tek-sèng; in-ūi in beh siū kau-hù tī lín ê chhiú.

(BCL) 米該雅到王的面前，王問伊講：「米該雅啊，阮著上去基列的拉末來交戰，抑是著息啊？」伊應講：「通上去，欲得勝，因為欲受交付佇恁的手」。

15

(THR) Ông tùi i kóng, Góa tio̍h kúi-pái kah lí chiù-chōa, lí thok Iâ-hô-hoa ê miâ, chí-ū tio̍h ēng chin-sı̍t kā góa kóng.

(BCL) 王對伊講：「我著幾擺教你咒誓，你託耶和華的名只有著用真實給我講。」

16

(THR) Bí-kai-ngá kóng, Góa khòaⁿ-kìⁿ Í-sek-lia̍t chèng peh-sìⁿ sì-sòaⁿ tī soaⁿ--nih, chhin-chhiūⁿ bô bo̍k-chiá ê iûⁿ chı̍t-poaⁿ; Iâ-hô-hoa án-ni kóng, Chiah-ê bô chú-lâng; in ta̍k-ê thang pêng-an tò-khì in ê ke.

(BCL) 米該雅講：「我看見以色列眾百姓四散佇山裡，親像無牧者的羊一般。耶和華按呢講：『諸個無主人，逐個通平安倒去的家。』」

17

(THR) Í-sek-lia̍t ông kā Iok-sa-hoat kóng, Góa kiám bô kā lí kóng, Chit lâng só͘ beh chhàm-gú góa ê, bô kóng hó-ōe, chí-ū chai-ē nā-tiāⁿ?

(BCL) 以色列王給約沙法講：「我豈無給你講，此人所欲讖語我的，無講好話，只有災禍若定？」

18

(THR) Bí-kai-ngá kóng, Só͘-í lín tio̍h thiaⁿ Iâ-hô-hoa ê ōe; góa khòaⁿ-kìⁿ Iâ-hô-hoa chē tī pó-chō, thiⁿ-téng ê bān-kun khiā tī I ê chó-iū.

(BCL) 米該雅講：「所以恁著聽耶和華的話。我看見耶和華坐佇寶座，天頂的萬軍徛佇伊的左右。

19

(THR) Iâ-hô-hoa kóng, Chī-chūi beh ín-iú Í-sek-lia̍t ông A-hap, hō͘ i chiūⁿ-khì Ki-lia̍t ê La̍h-bo̍at, sí tī-hia ah? Chit-ê kóng án-ni, hit-ê kóng àn-ni.

(BCL) 耶和華講：『是誰欲引誘以色列王亞哈互伊上去基列的拉末死佇遐啊？』此個講按呢，彼個講按呢。

20

(THR) Āu-lâi ū chı̍t ê sîn chhut-lâi, khiā tī Iâ-hô-hoa ê bīn-chêng, kóng, Góa beh ín-iú i. Iâ-hô-hoa mn̄g i kóng, Lí beh ēng sím-mı̍h hoat-tō͘?

(BCL) 後來，有一個神出來，徛佇耶和華的面前講：『我欲引誘伊。』耶和華問伊講：『你欲用甚麼法度？』

21

(THR) I kóng, Góa beh chhut-khì chòe pe̍h-chha̍t ê sîn, tī i chèng sian-ti ê chhùi. Iâ-hô-hoa kóng, Lí beh ín-iú i, iā beh chiâⁿ--i; chhut-khì lâi chòe án-ni.

(BCL) 伊講：『我欲出去做白賊的神，佇伊眾先知的嘴。』耶和華講：『你欲引誘伊，也欲成伊！出去來做按呢！』。

22

(THR) Taⁿ Iâ-hô-hoa ēng pe̍h-chha̍t ê sîn jı̍p tī lí chiah ê sian-ti ê chhùi. Iâ-hô-hoa lūn-kàu lí ū kóng chai-ē.

(BCL) 今耶和華用白賊的神入佇你諸個先知的嘴，耶和華論到你有講災禍。」

23

(THR) Ki-ná-ná ê kiáⁿ Se-tí-ka chìn-chêng, siàn Bí-kai-ngá ê chhùi-phóe, kóng, Iâ-hô-hoa ê sîn tùi toh-lo̍h chı̍t-tiâu-lō͘ lī-khui góa lâi kap lí kóng ah?

(BCL) 基拿拿的子西底家進前搧米該雅的嘴　，講：「耶和華的神對叨落一條路離開我來及你講啊？」

24

(THR) Bí-kai-ngá kóng, Khòaⁿ ah, lí jı̍p lāi-pâng ka-kī bih, hit-jı̍t chiū beh khòaⁿ-kìⁿ.

(BCL) 米該雅講：「看啊，你入內房家己匿，彼日就欲看見。」

25

(THR) Í-sek-lia̍t ông kóng, Tio̍h tòa Bí-kai-ngá khì kau siâⁿ-siú A-bûn, kap ông ê kiáⁿ Iok-a-si, kóng,

(BCL) 以色列王講：「著帶米該雅去，交城首亞們及王的子約阿施，講：

26

(THR) Ông án-ni kóng, Ēng chit lâng koaiⁿ tī kaⁿ--nih, ēng kan-khó͘ ê piáⁿ kan-khó͘ ê chúi hō͘ i chia̍h, thèng-hāu góa pêng-an tò-lâi.

(BCL) 『王按呢講：用此人關佇監裡，用艱苦的餅，艱苦的水互伊食，聽候我平安倒來。』」

27

(THR) Bí-kai-ngá kóng, Lí nā chin-chiàⁿ pêng-an tò-lâi, chiū-sī Iâ-hô-hoa bô thok góa kóng. Koh kóng, Chiah ê peh-sìⁿ ah, lín lóng tio̍h thiaⁿ.

(BCL) 米該雅講：「你若真正平安倒來，就是耶和華無託我講」；閣講：「諸個百姓啊，恁攏著聽！」

28

(THR) Í-sek-lia̍t ông kap Iû-tāi ông Iok-sa-hoat chiūⁿ-khì Ki-lia̍t ê La̍h-bo̍at.

(BCL) 以色列王及猶大王約沙法上去基列的拉末。

29

(THR) Í-sek-lia̍t ông kā Iok-sa-hoat kóng, Góa beh kái-chong chiūⁿ-tīn, lí thang chhēng ông-ho̍k. Í-sek-lia̍t ông chiū kái-chong, in chiū chiūⁿ-tīn.

(BCL) 以色列王給約沙法講：「我欲改裝上陣，你通穿王服。」以色列王就改裝，就上陣。

30

(THR) A-lân ông ū hoan-hù i ê chiàn-chhia ê koaⁿ-tiúⁿ kóng, Bô-lūn tōa-sòe m̄-thang kap in kau-chiàn, chí-ū kap Í-sek-lia̍t ông kau-chiàn.

(BCL) 亞蘭王有吩咐伊的戰車的官長講：「無論大細，呣通及交戰，只有及以色列王交戰。」

31

(THR) Chiàn-chhia ê koaⁿ-tiúⁿ khòaⁿ-kìⁿ Iok-sa-hoat chiū kóng, Che sī Í-sek-lia̍t ông, chiū o̍at-kè--khì beh kap i kau-chiàn. Iok-sa-hoat chiū háu-kiù, Iâ-hô-hoa chiū pang-chān i; Siōng-tè iā kám-tōng in lī-khui i.

(BCL) 戰車的官長看見約沙法就講，這是以色列王，就越過去欲及伊交戰。約沙法就哮救，耶和華就幫助伊，上帝也感動離開伊。

32

(THR) Chiàn-chhia ê koaⁿ-tiúⁿ khòaⁿ-kìⁿ m̄-sī Í-sek-lia̍t ông chiū o̍at-tńg bô tui i.

(BCL) 戰車的官長看見呣是以色列王，就越轉無追伊。

33

(THR) Ū chı̍t-lâng ngó͘-jiân khui-keng, siā-jı̍p Í-sek-lia̍t ông chiàn-kah ê kap-chōa; ông kā kóaⁿ-chhia--ê kóng, Lí o̍at-tńg chhiú, tòa góa chhut-tīn; in-ūi góa tio̍h tāng-siong lah.

(BCL) 有一人偶然開弓，射入以色列王戰甲的合鑆。王給趕車者講：「你越轉手，帶我出陣，因為我著重傷啦！」

34

(THR) Hit-jı̍t kau-chiàn ê sè-bīn ná béng-lia̍t; Í-sek-lia̍t ông bián-kióng khiā tī chhia--nih, tí-tng A-lân lâng, kàu ê-hng; chha-put-to jı̍t-lo̍h ê sî, chiū sí.

(BCL) 彼日交戰的勢面愈猛烈，以色列王勉強徛佇車裡抵當亞蘭人，到下昏。差不多日落的時，就死。

Bible Color Mark

• 台語漢字羅馬本
• 巴克禮全羅