列王紀下 第 2 章

1

(THR) Iâ-hô-hoa beh ēng kńg-lê-hong chiap Í-lī-a chiūⁿ-thiⁿ ê sî, Í-lī-a kap Í-lī-sa tùi Kiat-kah khì.

(BCL) 耶和華欲用捲螺風接以利亞上天的時，以利亞及以利沙對吉甲去。

2

(THR) Í-lī-a kā Í-lī-sa kóng, Lí chhiáⁿ tiàm chia, in-ūi Iâ-hô-hoa chhe góa khì Pek-te̍k-lī. Í-lī-sa kóng, Góa kí éng-o̍ah ê Iâ-hô-hoa, kap lí ê o̍ah-miā lâi chiù-chōa, góa bô beh lī-khui lí; nn̄g-lâng chiū lo̍h-khì Pek-te̍k-lī.

(BCL) 以利亞給以利沙講：「你且踮遮，因為耶和華差我去伯特利。」以利沙講：「我指永活的耶和華，及你的活命來咒誓，我無欲離開你。」二人就落去伯特利。

3

(THR) Tī Pek-te̍k-lī hiah ê sian-ti ê ha̍k-seng chhut-lâi kìⁿ Í-lī-sa kā i kóng, Iâ-hô-hoa kin-á-jı̍t beh chhú lí ê ló-su lī-khui lí khì, lí chai mah? I kóng, Sī, góa chai, lín bo̍h chòe-siaⁿ.

(BCL) 佇伯特利許個先知的學生出來見以利沙，給伊講：「耶和華今仔日欲取你的老師離開你去，你知嗎？」伊講：「是，我知，恁莫做聲。」

4

(THR) Í-lī-a kā i kóng, Í-lī-sa ah, lí chhiáⁿ tiàm chia, in-ūi Iâ-hô-hoa chhe góa khì Iâ-lī-ko. I kóng, Góa kí éng-o̍ah ê Iâ-hô-hoa, kap lí ê o̍ah-miā, lâi chiù-chōa, góa bô beh lī-khui lí. In chiū kàu Iâ-lī-ko.

(BCL) 以利亞給伊講：「以利沙啊，你且踮遮，因為耶和華差我去耶利哥。」伊講：「我指永活的耶和華，及你的活命來咒誓，我無欲離開你。」就到耶利哥。

5

(THR) Tī Iâ-lī-ko hiah ê sian-ti ê ha̍k-seng chiū-kūn Í-lī-sa, kā i kóng, Iâ-hô-hoa kin-á-jı̍t beh chhú lí ê ló-su lī-khui lí khì, lí chai mah? I kóng, Sī, góa chai, lín bo̍h chòe-siaⁿ.

(BCL) 佇耶利哥許個先知的學生就近以利沙，給伊講：「耶和華今仔日欲取你的老師離開你去，你知嗎？」伊講：「是，我知，恁莫做聲。」

6

(THR) Í-lī-a kā Í-lī-sa kóng, Lí chhiáⁿ tiàm chia, in-ūi Iâ-hô-hoa chhe góa khì Iok-tàn. Í-lī-sa kóng, Góa kí éng-o̍ah ê Iâ-hô-hoa, kap lí ê o̍ah-miā, lâi chiù-chōa, góa bô beh lī-khui lí. In nn̄g-lâng chiū saⁿ-kap khì.

(BCL) 以利亞給以利沙講：「你且踮遮，因為耶和華差我去約但。」以利沙講：「我指永活的耶和華，及你的活命來咒誓，我無欲離開你。」二人就相及去。

7

(THR) Ū sian-ti ê ha̍k-seng gō͘-cha̍p lâng khì, hn̄g-hn̄g khiā tī in ê tùi-bīn; nn̄g-lâng tī Iok-tàn hô-piⁿ teh khiā.

(BCL) 有先知的學生五十人去，遠遠徛佇的對面；二人佇約但河邊徛。

8

(THR) Í-lī-a the̍h i ê gōa-saⁿ kńg--khí-lâi, phah hiah ê chúi, chúi chiū hun siang-pêng; nn̄g-lâng kiâⁿ ta-tōe kè-khì.

(BCL) 以利亞提伊的外衫捲起來，拍許個水，水就分雙旁，二人行乾地過去。

9

(THR) Kè-khì liáu, Í-lī-a kā Í-lī-sa kóng, Góa iáu-bē siū-chhú lī-khui lí khì, góa beh kā lí chòe sím-mı̍h? lí taⁿ tio̍h kiû. Í-lī-sa kóng, Kiû lí chiong kám-tōng lí ê sîn hō͘ góa siang-hūn.

(BCL) 過去了，以利亞給以利沙講：「我猶未受取離開你去，我欲給你做甚麼？你今著求。」以利沙講：「求你將感動你的神互我雙份。」

10

(THR) Í-lī-a kóng, Lí só͘ kiû--ê, oh--tit ah; chóng-sī góa siū-chhú lī-khui lí ê sî, lí nā khòaⁿ-kìⁿ góa, chiū beh tit-tio̍h; nā bô, chiū bōe tit-tio̍h.

(BCL) 以利亞講：「你所求的得啊！總是我受取離開你的時，你若看見我，就欲得著，若無，就得著。」

11

(THR) In teh-kiâⁿ teh-kóng, hut-jiân ū hé-chhia hé-bé, keh-khui in nn̄g-lâng; Í-lī-a chiū chē kńg-lê-hong chiūⁿ-thiⁿ.

(BCL) 行講，忽然有火車火馬隔開二人，以利亞就坐捲螺風上天。

12

(THR) Í-lī-sa khòaⁿ-kìⁿ, chiū kiò kóng, Góa ê pē ah, góa ê pē ah, Í-sek-lia̍t ê chiàn-chhia kap i bé-peng ah. Āu-lâi bô koh khòaⁿ-kìⁿ i; chiū the̍h ka-kī ê saⁿ lâi thiah chòe nn̄g-pêng.

(BCL) 以利沙看見，就叫講：「我的父啊！我的父啊！以色列的戰車及伊馬兵啊！」後來無閣看見伊。就提家己的衫來拆做二旁。

13

(THR) I khioh Í-lī-a ka-la̍uh lo̍h-lâi ê gōa-saⁿ, tò-tńg-khì khiā tī Iok-tàn hô-piⁿ.

(BCL) 伊拾以利亞磕落落來的外衫，倒轉去徛佇約但河邊。

14

(THR) I ēng Í-lī-a ka-la̍uh lo̍h-lâi ê gōa-saⁿ phah chúi, kóng, Í-lī-a ê Siōng-tè Iâ-hô-hoa tī toh-lo̍h? phah chúi liáu-āu, chúi chiū pun siang-pêng; Í-lī-sa chiū kè-khì.

(BCL) 伊用以利亞磕落落來的外衫拍水，講：「以利亞的上帝──耶和華佇叨落？」拍水了後，水就分雙旁，以利沙就過去。

15

(THR) Sian-ti ê ha̍k-seng, tiàm tī Iâ-lī-ko tī i ê tùi-bīn ê, khòaⁿ-kìⁿ i, chiū kóng, Kám-tōng Í-lī-a ê sîn tiàm tī Í-lī-sa lah; in chiū lâi ngiâ-chih i, phak-lo̍h tī i ê bīn-chêng.

(BCL) 先知的學生踮佇耶利哥佇伊的對面的，看見伊就講：「感動以利亞的神踮佇以利沙啦。」就來迎接伊，仆落佇伊的面前，

16

(THR) Kā i kóng, Lí khòaⁿ ah, lí ê lô͘-po̍k chia ū chòng-sū gō͘-cha̍p lâng; kiû lí chún in khì chhē lí ê ló-su; kiaⁿ-liáu Iâ-hô-hoa ê Sîn leh i, hiat tī bó͘ ê soaⁿ, bó͘ ê soaⁿ-kok. I kóng, M̄-thang chhe.

(BCL) 給伊講：「你看啊，你的奴僕遮有壯士五十人，求你准去尋你的老師，驚了耶和華的神提伊，佇某個山某個山谷，」伊講：「呣通差。」

17

(THR) In pek i kàu hō͘ i pháiⁿ-ē, i chiū kóng, Lín thang chhe i. In chiū chhe gō͘-cha̍p lâng khì, chhē saⁿ jı̍t, iā chhē-bô.

(BCL) 迫伊到互伊歹推，伊就講：「恁通差伊。」就差五十人去，尋三日，也尋無。

18

(THR) I tī Iâ-lī-ko thèng-hāu, in tò-lâi kàu i hia; i kā in kóng, Góa kiám-bô kā lín kóng, M̄-thang khì mah?

(BCL) 伊佇耶利哥聽候倒來到伊遐；伊給講：「我豈無給恁講，呣通去嗎？」

19

(THR) Siâⁿ-lāi ê peh-sìⁿ kā Í-lī-sa kóng, Chhiáⁿ lí khòaⁿ chit ê siâⁿ ê tōe-tiám sī hó, chiàu góa ê chú só͘ khòaⁿ-kìⁿ--ê; chóng-sī chúi pháiⁿ, tì-kàu thó͘-tōe bô chhut-sán.

(BCL) 城內的百姓給以利沙講：「請你看此個城的地點是好，照我的主所看見的；總是水歹，致到土地無出產。」

20

(THR) Í-lī-sa kóng, Lín the̍h chı̍t ê sin ê pân, tóe iâm lâi hō͘ góa. In chiū the̍h lâi hō͘ i.

(BCL) 以利沙講：「恁提一個新的瓶，貯鹽來互我。」就提來互伊。

21

(THR) I chhut-khì kàu chúi-chôaⁿ, chiong iâm piàⁿ tī hit lāi-bīn, kóng, Iâ-hô-hoa án-ni kóng, Góa i-hó chit ê chúi, bô koh tùi hia ū sí-bô, á-sī bô chhut-sán.

(BCL) 伊出去到水泉，將鹽傾佇彼內面，講：耶和華按呢講：『我醫好此個水，無閣對遐有死無，抑是無出產。』」

22

(THR) Hit ê chúi chiū i-hó, kàu kin-á-jı̍t; chiàu Í-lī-sa só͘ kóng ê ōe.

(BCL) 彼個水就醫好，到今仔日，照以利沙所講的話。

23

(THR) Í-lī-sa tùi hia chiūⁿ-khì Pek-te̍k-lī, chiūⁿ-lō͘ ê sî, ū gín-ná tùi siâⁿ-lāi chhut-lâi, thí-chhiò i, tùi i kóng, Liù-hia̍h-ê, chiūⁿ-khì o͘h, liù-hia̍h-ê, chiūⁿ-khì o͘h.

(BCL) 以利沙對遐上去伯特利，上路的時，有囝仔對城內出來，恥笑伊，對伊講：「翏額的上去噢！翏額的上去噢！」

24

(THR) I o̍at-thâu khòaⁿ in, chiū hōng Iâ-hô-hoa ê miâ chiù-chó͘ in; chiū ū nn̄g chiah hîm-bú tùi chhiū-nâ-lāi chhut-lâi, peh-thiah in tiong-kan sì-cha̍p-jī ê gín-ná.

(BCL) 伊越頭看，就奉耶和華的名咒詛。就有二隻熊母對樹林內出來，擘拆中間四十二個囝仔。

25

(THR) I tùi-hia chiūⁿ Ka-bı̍t soaⁿ; koh tùi hia tò-khì Sat-má-lī-a.

(BCL) 伊對遐上迦密山，閣對遐倒去撒瑪利亞。

Bible Color Mark

• 台語漢字羅馬本
• 巴克禮全羅