撒母耳記下 第 1 章

1

(THR) Sò-lô sí-liáu, iā Tāi-pı̍t thâi-sí A-má-le̍k lâng tò-lâi ê sî, Tāi-pı̍t tòa tī Sé-kek-la̍h nn̄g-jı̍t.

(BCL) 掃羅死了，也大衛死亞瑪力人倒來的時，大衛住佇洗革拉二日。

2

(THR) Kàu tē-saⁿ jı̍t, khòaⁿ ah, ū chı̍t-lâng tùi iâⁿ-pôaⁿ, tùi Sò-lô hia, lâi, i-chiûⁿ thiah-lı̍h, thâu-khak sám thô͘-hún, kàu Tāi-pı̍t hia, chiū phak tī tōe--nih pài i.

(BCL) 到第三日，看啊，有一人對營盤對掃羅遐來，衣裳拆裂，頭殼摻土粉，到大衛遐就仆佇地裡拜伊。

3

(THR) Tāi-pı̍t mn̄g i kóng, Lí tùi toh-lo̍h lâi? I ìn kóng, Góa tùi Í-sek-lia̍t ê kun-iâⁿ cháu-lâi.

(BCL) 大衛問伊講：「你對叨落來？」伊應講：「我對以色列的軍營走來。」

4

(THR) Tāi-pı̍t koh mn̄g i, kóng, Tāi-chì cháiⁿ-iūⁿ? chhiáⁿ lí kā góa kóng. I ìn kóng, Peh-sìⁿ tùi chiàn-tīn tô-cháu, peh-sìⁿ chōe-chōe tó-teh sí--khì; Sò-lô kap i ê kiáⁿ Iok-ná-tan iā sí.

(BCL) 大衛閣問伊講：「代誌怎樣？請你給我講。」伊應講：「百姓對戰陣逃走，百姓多多倒死去；掃羅及伊的子約拿單也死。」

5

(THR) Tāi-pı̍t kā tùi i kóng ê siàu-liân lâng kóng, Lí cháiⁿ-iūⁿ chai Sò-lô kap i ê kiáⁿ Iok-ná-tan sí ah?

(BCL) 大衛給對伊講的少年人講：「你怎樣知掃羅及伊的子約拿單死啊？」

6

(THR) Kā i kóng ê siàu-liân lâng kóng, Góa ngó͘-jiân kàu Ki-lī-pho soaⁿ, khòaⁿ-kìⁿ Sò-lô òa(**óa) tī i ê chhiuⁿ, ū chiàn-chhia bé-peng jip-óa i.

(BCL) 給伊講的少年人講：「我偶然到基利波山，看見掃羅倚佇伊的槍，有戰車、馬兵倚伊。

7

(THR) I o̍at-thâu khòaⁿ góa, chiū kiò góa; góa ìn kóng, Góa tī-chia.

(BCL) 伊越頭看我，就叫我。我應講：『我佇遮。』

8

(THR) I mn̄g góa kóng, Lí sī sím-mı̍h lâng? Góa ìn kóng, Góa sī A-má-le̍k lâng.

(BCL) 伊問我講：『你是甚麼人？』我應講：『我是亞瑪力人。』

9

(THR) I koh kā góa kóng, Chhiáⁿ lí kūn-óa góa lâi thâi-sí góa, in-ūi góa chin thòng-khó͘, góa ê sìⁿ-miā iáu hó-hó.

(BCL) 伊閣給我講：『請你近倚我，來死我；因為我真痛苦，我的生命猶好好。』

10

(THR) Góa chiū kūn-óa i, lâi thâi-sí i, in-ūi góa chai i tó--lo̍h-khì liáu, tek-khak bōe o̍ah; góa chiū the̍h i thâu-khak--nih ê bián-liû, kap i ê chhiú-khôan, tòa kàu góa ê chú chia.

(BCL) 我就近倚伊，來死伊，因為我知伊倒落去了的確活，我就提伊頭殼裡的冕旒、及伊的手環帶到我的主遮。」

11

(THR) Tāi-pı̍t chiū thiah-lı̍h saⁿ, kun-tè i ê lâng iā sī án-ni.

(BCL) 大衛就拆裂衫，跟隨伊的人也是按呢，

12

(THR) Ūi-tio̍h Sò-lô kap i ê kiáⁿ Iok-ná-tan kap Iâ-hô-hoa ê peh-sìⁿ, kap Í-sek-lia̍t ke, pi-ai thî-khàu kìm-chia̍h kàu jı̍t-àm, in-ūi in tó tī to-ē.

(BCL) 為著掃羅及伊的子約拿單，及耶和華的百姓及以色列家，悲哀啼哭，禁食到日暗，因為倒佇刀下。

13

(THR) Tāi-pı̍t kā tùi i kóng ê siàu-liân lâng kóng, Lí tùi toh-lo̍h lâi? Ìn kóng, Góa sī chhut-gōa lâng ê kiáⁿ, A-má-le̍k lâng.

(BCL) 大衛給對伊講的少年人講：「你對叨落來？」應講：「我是出外人的子亞瑪力人。」

14

(THR) Tāi-pı̍t tùi i kóng, Lí chhun-chhiú thâi-sí Iâ-hô-hoa só͘ boah-iû-ê, cháiⁿ-iūⁿ bô kiaⁿ ah?

(BCL) 大衛對伊講：「你伸手死耶和華所抹油者，怎樣無驚啊？」

15

(THR) Tāi-pı̍t kiò chı̍t ê siàu-liân lâng, kóng, Lí kūn-óa khì thâi-sí i. I chiū khì phah hō͘ i sí.

(BCL) 大衛叫一個少年人，講：「你近倚去死伊。」伊就去拍互伊死。

16

(THR) Tāi-pı̍t kā i kóng, Lí ê huih kui tī lí ê thâu-khak, in-ūi lí ê chhùi ka-kī kan-chèng lí kóng, Góa thâi-sí Iâ-hô-hoa só͘ boah-iû-ê.

(BCL) 大衛給伊講：「你的血歸佇你的頭殼，因為你的嘴家己干證你講：『我死耶和華所抹油者。』」

17

(THR) Tāi-pı̍t chòe ai-ko, tui-tō Sò-lô kap i ê kiáⁿ Iok-ná-tan.

(BCL) 大衛做哀歌，追悼掃羅及伊的子約拿單，

18

(THR) Koh kóng, Chiong chit ê ai-ko kà-sī Iû-tāi lâng; chit ê ai-ko miâ kiò Keng-ko, siá tī Ngá-soah-jíⁿ ê chheh. Koa kóng,

(BCL) 閣講將此個哀歌教示猶大人。此個哀歌名叫「弓歌」，寫佇雅煞珥的冊。

19

(THR) Í-sek-lia̍t ah, lí ê êng-hián--ê siū thâi tī soaⁿ-thâu; Hāi ah, eng-hiông-ê sí kàu án-ni ah!

(BCL) 歌講：以色列啊，你的榮顯者受佇山頭！嗐啊，英雄的死到按呢啊！

20

(THR) Bo̍h-tit tī Ka-te̍k pò-kò, Bo̍h-tit tī A-sı̍t-ki-lûn ê koe-lō͘ pò-iông, Kiaⁿ-liáu Hui-lī-sū ê cha-bó͘-gín-ná hoaⁿ-hí. Kiaⁿ-liáu bô siū kat-lé ê lâng ê cha-bó͘-gín-ná tāi-ia̍t.

(BCL) 莫得佇迦特報告；莫得佇亞實基倫的街路報揚；驚了非利士的查某囝仔歡喜；驚了無受割禮的人的查某囝仔大悅。

21

(THR) Ki-lī-pho soaⁿ ah, Gōan bô lō͘-chúi, bô hō͘, tī lí hia, iā bô chhut lé-mı̍h ê chhân; In-ūi tī-hia ióng-sū ê tîn-pâi siū hiat-ka̍k, Sò-lô ê tîn-pâi, chhin-chhiūⁿ bô siū boah-iû ê.

(BCL) 基利波山啊，願無露水無雨！佇你遐也無出禮物的田！因為佇遐勇士的盾牌受擲；掃羅的盾牌親像無受抹油的。

22

(THR) Tùi siū-thâi-ê ê huih, tùi ióng-sū ê iû, Iok-ná-tan ê keng bô tò-thè, Sò-lô ê to bô khang-khang tò-tńg.

(BCL) 對受者的血，對勇士的油，約拿單的弓無倒退；掃羅的刀無空空倒轉。

23

(THR) Sò-lô kap Iok-ná-tan o̍ah ê sî thang thiàⁿ, thang hoaⁿ-hí ê; Sí ê sî iā bô pun-lī; In pí eng-chiáu khah-kín, Pí sai khah-kiông.

(BCL) 掃羅及約拿單──活的時通疼，通歡喜的，死的時也無分離──比鷹鳥卡緊，比獅卡強。

24

(THR) Í-sek-lia̍t ê cha-bó͘-kiáⁿ ah, tio̍h ūi-tio̍h Sò-lô thî-khàu, I bat hō͘ lín chhēng chu-âng-sek lâi hoaⁿ-hí; Hō͘ lín ê i-ho̍k ū n̂g-kim ê chng-thāⁿ.

(BCL) 以色列的查某子啊，著為著掃羅啼哭！伊曾互恁穿朱紅色來歡喜，互恁的衣服有黃金的妝飾。

25

(THR) Ióng-sū cháiⁿ-iūⁿ tó tī chiàn-tīn! Iok-ná-tan siū-thâi tī lí ê soaⁿ-thâu.

(BCL) 勇士怎樣倒佇戰陣！約拿單受佇你的山頭。

26

(THR) Góa ê hiaⁿ Iok-ná-tan ah, góa ūi lí siong-sim; Góa chīn-chāi hoaⁿ-hí lí; Lí ê thiàⁿ góa chin kî-biāu, Iâⁿ-kè hū-jîn-lâng ê thiàⁿ.

(BCL) 我的兄約拿單啊，我為你傷心！我盡在歡喜你！你的疼我，真奇妙，贏過婦仁人的疼。

27

(THR) Ióng-sū sí kàu án-ni, Chiàn-khì húi-bia̍t kàu án-ni!

(BCL) 勇士死到按呢！戰器毀滅到按呢！

Bible Color Mark

• 台語漢字羅馬本
• 巴克禮全羅