帖撒羅尼迦後書 第 3 章

1

(THR) Hiaⁿ-tī ah, kiat-bé lâi kóng, lín tio̍h thòe góan kî-tó, hō͘ Chú ê tō-lí liû-hêng tit-tio̍h êng-kng, chhin-chhiūⁿ tī lín tiong-kan chı̍t iūⁿ;

(BCL) 兄弟啊，結尾來講：恁著替阮祈禱，互主的道理流行，得著榮光，親像佇恁中間一樣。

2

(THR) koh hō͘ góan tit-tio̍h thoat-lī tī bô lí ê pháiⁿ lâng; in-ūi lâng bô lóng ū sìn.

(BCL) 閣互阮得著脫離佇無理的歹人，因為人無攏有信。

3

(THR) Chú chiū-sī sìn-sı̍t, I beh kian-kò͘ lín, koh pó-hō͘ lín bián hō͘ hit ê pháiⁿ ê hām-hāi.

(BCL) 主就是信實，伊欲堅固恁，閣保護恁免互彼個歹的陷害。

4

(THR) Lūn-kàu lín, góan tī Chú chhim sìn, góan só͘ bēng-lēng ê, lín hiān-kim ū teh kiâⁿ, āu-lâi iā beh kiâⁿ i.

(BCL) 論到恁，阮佇主深信，阮所命令的，恁現今有行，後來也欲行伊。

5

(THR) Gōan Chú chhōa lín ê sim jı̍p tī Siōng-tè ê thiàⁿ kap Ki-tok ê thun-lún.

(BCL) 願主導恁的心，入佇上帝的疼，及基督的吞。

6

(THR) Hiaⁿ-tī ah, góan tī lán ê Chú Iâ-so͘ Ki-tok ê miâ bēng-lēng lín, kìⁿ-nā hiaⁿ-tī bô hoat-tō͘, bô chiàu góan só͘ thôan-siū ê lâi kiâⁿ, lín tio̍h lī-khui i.

(BCL) 兄弟啊，阮佇咱的主耶穌基督的名命令恁，見若兄弟無法度，無照阮所傳授的來行，恁著離開伊。

7

(THR) In-ūi lín ka-kī chai tio̍h cháiⁿ-iūⁿ o̍h góan; in-ūi góan tī lín tiong-kan bē bat bô hoat-tō͘;

(BCL) 因為恁家己知著怎樣學阮。因為阮佇恁中間，未曾無法度，

8

(THR) iā m̄ bat pe̍h-pe̍h chia̍h lâng; hóan-tńg sī tio̍h-bôa kan-khó͘, mî-jı̍t chòe kang, bián-tit thoa-lūi lín tiong-kan chı̍t lâng.

(BCL) 也呣曾白白食人，反轉是著磨艱苦，暝日做工，免得拖累恁中間一人。

9

(THR) M̄ sī in-ūi góan bô kôan, to̍k-to̍k sī ài ēng pún-sin chòe lín ê bô͘-iūⁿ, hō͘ lín o̍h góan.

(BCL) 呣是因為阮無權，獨獨是愛用本身做恁的模樣，互恁學阮。

10

(THR) In-ūi góan iáu kap lín tī-teh ê sî, bat án-ni bēng-lēng lín kóng, Nā ū lâng bô beh chòe kang, i iā tio̍h m̄ thang chia̍h.

(BCL) 因為阮猶及恁佇的時，曾按呢命令恁講，若有人無欲做工，伊也著呣通食。

11

(THR) Sī góan thiaⁿ-kìⁿ lín tiong-kan ū lâng só͘ kiâⁿ bô hoat-tō͘, lóng bô chòe kang, kan-ta chòe hūn-gōa ê sū.

(BCL) 是阮聽見，恁中間有人所行無法度，攏無做工，干單做份外的事。

12

(THR) Chhin-chhiūⁿ chit hō lâng góan tiàm-tī Chú Iâ-so͘ Ki-tok bēng-lēng in, koh khǹg in, tio̍h thiâm-chēng chòe kang, ka-kī thàn chia̍h.

(BCL) 親像此號人阮佇主耶穌基督命令，閣勸，著恬靜做工，家己趁食。

13

(THR) Hiaⁿ-tī ah, lín kiâⁿ hó sū, m̄ thang ià-siān.

(BCL) 兄弟啊，恁行好事呣通厭倦。

14

(THR) Nā ū lâng bô sūn-ho̍k góan chit tiuⁿ phoe só͘ kóng ê, lín tio̍h kā i kì-teh, iā m̄ thang kap i kau-pôe, hō͘ i ka-kī kiàn-siàu.

(BCL) 若有人無順服阮此張批所講的，恁著給伊記，也呣通及伊交陪，互伊家己見誚。

15

(THR) Chóng-sī bo̍h-tit khòaⁿ i chòe kiû-siû, tio̍h kéng-kài i chhin-chhiūⁿ hiaⁿ-tī.

(BCL) 總是莫得看伊做仇讎，著警戒伊親像兄弟。

16

(THR) Gōan pêng-an ê Chú, ta̍k sî ta̍k hāng sū, pún-sin siúⁿ-sù lín pêng-an. Gōan Chú kap lín chèng lâng tī-teh.

(BCL) 願平安的主逐時逐項事本身賞賜恁平安！願主及恁眾人佇！

17

(THR) Góa Pó-lô chhin-pit chhéng-an lín; tī ta̍k tiuⁿ phoe ēng chit-ê chòe kì-hō; góa chiū-sī án-ni siá.

(BCL) 我──保羅親筆請安恁。佇逐張批用此個做記號，我就是按呢寫。

18

(THR) Gōan lán ê Chú Iâ-so͘ Ki-tok ê un-tián kap lín chèng lâng tī-teh.3

(BCL) 願咱的主耶穌基督的恩典及恁眾人佇！

Bible Color Mark

• 台語漢字羅馬本
• 巴克禮全羅