提摩太前書 第 1 章

1

(THR) Pó-lô chòe Ki-tok Iâ-so͘ ê sù-tô͘, chiàu kiù lán ê Siōng-tè kap hō͘ lán ū ǹg-bāng ê Ki-tok Iâ-so͘ só͘ bēng-lēng ê, phoe kià hō͘ Thê-mô͘-thài,

(BCL) 保羅做基督耶穌的使徒，照救咱的上帝及互咱有向望的基督耶穌所命令的，

2

(THR) chiū-sī tī sìn chòe góa chin ê kiáⁿ ê; gōan lí tùi Pē Siōng-tè kap lán ê Chú Ki-tok Iâ-so͘ tit-tio̍h un-tián, lîn-bín, pêng-an.

(BCL) 批寄互提摩太，就是佇信做我真的子的。願你對父上帝及咱的主基督耶穌得著恩典、憐憫、平安！

3

(THR) Góa khì Má-kî-tùn ê sî bat khǹg lí iû-gôan tòa Í-hut-só͘, hō͘ lí thang hoan-hù kúi-nā lâng bo̍h-tit thôan pa̍t hō ê kàu,

(BCL) 我去馬其頓的時，曾勸你猶原住以弗所，互你通吩咐幾若人莫得傳別號的教，

4

(THR) iā bo̍h-tit ài thiaⁿ bô iáⁿ-chiah ê ōe, kap bû-kiông-chīn ê cho̍k-phó͘; hōan-nā chit hō sī siⁿ-chhut piān-lūn, m̄ sī hō͘ Siōng-tè tī sìn só͘ an-pâi ê tit-tio̍h chiâⁿ.

(BCL) 也莫得愛聽無影跡的話及無窮盡的族譜；凡若此號是生出辯論，呣是互上帝佇信所安排的得著成。

5

(THR) Nā-sī kài-bēng ê chong-chí sī jîn-ài, chit ê jîn-ài sī tùi chheng-khì ê sim, kap bô thang chek-pī ê liông-sim, kap bô ké ê sìn siⁿ-chhut,

(BCL) 若是誡命的宗旨是仁愛；此個仁愛是對清氣的心及無通責備的良心，及無假的信生出。

6

(THR) ū lâng sit-lo̍h chiah-ê, hóan-tńg ǹg phû-phiò ê tâm-lūn;

(BCL) 有人失落諸個，反轉向浮漂的談論，

7

(THR) in ài chòe kàu-hoat-su, iā bōe hiáu-tit ka-kī só͘ kóng ê, í-kı̍p só͘ chip ê giân-lūn, sī ūi-tio̍h sím-mı̍h.

(BCL) 愛做教法師，也曉得家己所講的，以及所集的言論是為著甚麼。

8

(THR) Lán chai lu̍t-hoat sī hó, to̍k-to̍k lâng tio̍h ha̍p-hoat lâi ēng i,

(BCL) 咱知律法是好，獨獨人著合法來用伊；

9

(THR) iā tio̍h chai lu̍t-hoat ê siat-lı̍p m̄ sī ūi-tio̍h gī ê lâng, chiū-sī ūi-tio̍h put-hoat kap bô sūn-ho̍k ê, bô kèng-khiân kap hōan-chōe ê, bô sèng-kiat kap chho͘-sio̍k ê, phah-sí pē phah-sí bú ê, thâi-sí lâng ê,

(BCL) 也著知律法的設立呣是為著義的人，就是為著不法及無順服的，無敬虔及犯罪的，無聖潔及粗俗的，拍死父拍死母的，死人的，

10

(THR) kiâⁿ-îm ê, hò͘ⁿ lâm-sek ê, chòe hòan-sau ê, kóng pe̍h-chha̍t ê, lām-sám chiù-chōa ê, á-sī ū sím-mı̍h pa̍t hāng ge̍k chèng-kàu ê sū,

(BCL) 行淫的，好男色的，做販俏的，講白賊的，濫糝咒誓的，抑是有甚麼別項逆正教的事。

11

(THR) che sī chiàu tōa hok-khì ê Siōng-tè kau-thok góa êng-kng ê hok-im só͘ kóng ê.

(BCL) 這是照大福氣的上帝交託我榮光的福音所講的。

12

(THR) Góa kám-siā hō͘ góa ū khùi-la̍t ê, chiū-sī lán ê Chú Ki-tok Iâ-so͘, in-ūi I lia̍h góa chòe chīn-tiong, siat-lı̍p góa chòe chhe-ēng;

(BCL) 我感謝互我有氣力的就是咱的主基督耶穌，因為伊掠我做盡忠，設立我做差用。

13

(THR) góa chêng sī pòng-to̍k ê, khún-tio̍k ê, bú-bān ê, chóng-sī góa chit hō só͘ chòe sī chhut tī m̄ chai m̄ sìn, chiah tit-tio̍h lîn-bín.

(BCL) 我前是謗瀆的，窘逐的，侮慢的；總是我此號所做是出佇呣知呣信，才得著憐憫。

14

(THR) Koh lán ê Chú ê un-tián sī kek-gōa hong-sēng, hō͘ góa tī Ki-tok Iâ-so͘ ū sìn ū thiàⁿ ê sim.

(BCL) 閣咱的主的恩典是格外豐盛，互我佇基督耶穌有信有疼的心。

15

(THR) Ū chı̍t kù ōe thang sìn thang chiâu-chn̂g chiap-la̍p ê, chiū-sī Ki-tok Iâ-so͘ lîm-kàu sè-kan, beh kiù ū chōe ê lâng, kî-tiong góa sī tē it pháiⁿ.

(BCL) 有一句話通信，通齊全接納的，就是「基督耶穌臨到世間，欲救有罪的人。」其中我是第一歹。

16

(THR) Nā-sī góa tit-tio̍h lîn-bín, sī in-ūi Iâ-so͘ Ki-tok beh tī góa, tē-it pháiⁿ ê lâng, hián-bêng I it-chhè ê thun-lún, lâi chòe āu-lâi sìn-khò I tit-tio̍h éng-o̍ah ê lâng ê bô͘-iūⁿ.

(BCL) 若是我得著憐憫，是因為耶穌基督欲佇我第一歹的人顯明伊一切的吞，來做後來信靠伊得著永活的人的模樣。

17

(THR) Gōan chun-kùi êng-kng kui tī bōe húi-hōai, khòaⁿ bōe tio̍h, bān sè-tāi ê ông, to̍k-it ê Siōng-tè, kàu tāi-tāi bô chīn. À-bēng.

(BCL) 願尊貴、榮光歸佇毀壞、看著、萬世代的王、獨一的上帝，到代代無盡。阿們！

18

(THR) Góa ê kiáⁿ Thê-mô͘-thài ah, góa chiàu chêng só͘ lūn-kàu lí ê chhàm-gú, chiong chit ê kài-bēng kau-thok lí, hō͘ lí ēng chiah ê chhàm-gú lâi cheng-chiàn hit ê hó ê cheng-chiàn;

(BCL) 我的子提摩太啊，我照前所論到你的讖語，將此個誡命交託你，互你用諸個讖語來爭戰彼個好的爭戰。

19

(THR) tio̍h chûn sìn kap bô thang chek-pī ê liông-sim, ū lâng pàng-sak chit-ê, lūn-kàu sìn in chiū sit-lo̍h i, chhin-chhiūⁿ kòng-phòa chûn.

(BCL) 著存信及無通責備的良心，有人放拺此個，論到信就失落伊，親像摃破船。

20

(THR) Kî-tiong ū Hú-bí-nái kap A-le̍k-san-tāi, góa í-keng chiong in kau hō͘ Sat-tàn, hō͘ in siū kéng-kài m̄ thang húi-pòng.

(BCL) 其中有許米乃及亞力山大；我已經將交互撒但，互受警戒呣通誹謗。

Bible Color Mark

• 台語漢字羅馬本
• 巴克禮全羅