使徒行傳 第 11 章

1

(THR) Sù-tô͘ kap tiàm-tī Iû-thài ê hiaⁿ-tī thiaⁿ gōa-pang lâng ia̍h siū Siōng-tè ê tō-lí.

(BCL) 使徒及佇猶太的兄弟聽外邦人亦受上帝的道理。

2

(THR) Kàu Pí-tek chiūⁿ Iâ-lō͘-sat-léng ê sî, hiah ê hōng kat-lé ê lâng kap i cheng-piān, kóng,

(BCL) 到彼得上耶路撒冷的時，許個奉割禮的人及伊爭辯講：

3

(THR) Lí bat jı̍p-khì chiū-kūn bô siū kat-lé ê lâng, kap in saⁿ-kap chia̍h.

(BCL) 「你曾入去就近無受割禮的人及相及食。」

4

(THR) Nā-sī Pí-tek chiàu chhù-sū tùi in pâi-lia̍t kóng, Góa tī Iok-phàⁿ siâⁿ kî-tó;

(BCL) 若是彼得照次序對排列講：

5

(THR) sîn-hûn iû tī siōng gōa ê sî, khòaⁿ-kìⁿ īⁿ-siōng, ū chı̍t ê khì-kū chhin-chhiūⁿ tōa pak pò͘, pa̍k sì ê kak-thâu, tùi thiⁿ tūi-lo̍h kàu góa ê bīn-chêng;

(BCL) 「我佇約帕城祈禱，神魂遊佇象外的時，看見異象，有一個器具，親像大幅布，縛四個角頭，對天墜落，到我的面前。

6

(THR) góa chù-ba̍k khòaⁿ, siông-sè siūⁿ i, khòaⁿ-kìⁿ ū tōe-chiūⁿ sì-kha ê cheng-siⁿ, iá-siù, thâng-thōa, kap thiⁿ-tiong ê pe-chiáu.

(BCL) 我注目看，詳細想伊，看見有地上四腳的精牲，野獸、蟲，及天中的飛鳥。

7

(THR) Koh thiaⁿ-kìⁿ ū siaⁿ kā góa kóng, Pí-tek, khí-lâi; thâi lâi chia̍h.

(BCL) 閣聽見有聲給我講：『彼得，起來，來食！』

8

(THR) Góa kóng, Chú ah, tòan-tòan m̄-thang; in-ūi hōan-nā chho͘-sio̍k ê mı̍h, á-sī bô chheng-khì ê, lóng bē bat jı̍p góa ê chhùi.

(BCL) 我講：『主啊，斷斷呣通，因為凡若粗俗的物抑是無清氣的攏未曾入我的嘴。』

9

(THR) Nā-sī siaⁿ tē jī pái tùi thiⁿ ìn kóng, Siōng-tè só͘ hō͘ i chheng-khì ê, lí bo̍h-tit lia̍h chòe chho͘-sio̍k.

(BCL) 若是聲第二擺，對天應講：『上帝所互伊清氣的，你莫得掠做粗俗。』

10

(THR) Chhin-chhiūⁿ án-ni saⁿ pái; ta̍k hāng mı̍h chiū koh siu chiūⁿ thiⁿ.

(BCL) 親像按呢三擺，逐項物就閣收上天。

11

(THR) Hut-jiân ū saⁿ lâng tùi Kai-sat-lī-a chhe lâi chiū-kūn góa ê, tú-tú khiā tī góan só͘ tiàm ê chhù gōa.

(BCL) 忽然，有三人對該撒利亞差來就近我的，抵抵徛佇阮所的厝外。

12

(THR) Sèng Sîn kā góa kóng tio̍h kap in khì, bo̍h-tit hun-piat. Koh ū chit la̍k ê hiaⁿ-tī kap góa khì; góan lóng jı̍p hit lâng ê chhù;

(BCL) 聖神給我講著及去，莫得分別。閣有此六個兄弟及我去，阮攏入彼人的厝。

13

(THR) i chiū kā góan kóng, àn-cháiⁿ-iūⁿ bat khòaⁿ-kìⁿ chı̍t ê thiⁿ-sài khiā tī i ê chhù, tùi i kóng, Tio̍h chhe lâng kàu Iok-phàⁿ, chhiáⁿ Se-bûn, chheng chòe Pí-tek ê lâi;

(BCL) 伊就給阮講，按怎樣曾看見一個天使徛佇伊的厝，對伊講：『著差人到約帕，請西門稱做彼得的來，

14

(THR) i beh ēng ōe kā lí kóng, lí kap lí chôan ke tùi chiah ê ōe beh tit-tio̍h kiù.

(BCL) 伊欲用話給你講，你及你全家對諸個話欲得著救。』

15

(THR) Góa tú-tú teh kóng ê sî, Sèng Sîn kàng-lîm tī in, chhin-chhiūⁿ khí-thâu tī lán chı̍t iūⁿ.

(BCL) 我抵抵講的時，聖神降臨佇，親像起頭佇咱一樣。

16

(THR) Góa chiū kì-tit Chú ê ōe, kóng, Iok-hān sī ēng chúi kiâⁿ sóe-lé; to̍k-to̍k lín beh tī Sèng Sîn siū sóe.

(BCL) 我就記得主的話講：『約翰是用水行洗禮，獨獨恁欲佇聖神受洗。』

17

(THR) Taⁿ Siōng-tè kì-jiân ēng chit ê un-sù hō͘ in, chhin-chhiūⁿ tī lán sìn Chú Iâ-so͘ Ki-tok ê sî só͘ hō͘ lán ê chı̍t iūⁿ, góa sī chī-chūi, ōe chó͘-tòng Siōng-tè ah?

(BCL) 今上帝既然用此個恩賜互，親像佇咱信主耶穌基督的時所互咱的一樣；我是是誰，會阻擋上帝啊？」

18

(THR) Hiah ê lâng thiaⁿ che ōe, chiū chēng-chēng, ia̍h kui êng-kng Siōng-tè, kóng, Án-ni-siⁿ, sī Siōng-tè ia̍h hō͘ gōa-pang lâng hóan-hóe lâi tit-tio̍h o̍ah-miā.

(BCL) 許個人聽這話，就靜靜，亦歸榮光上帝，講：「按呢生，是上帝亦互外邦人反悔，來得著活命。」

19

(THR) Ūi-tio̍h Sū-thê-hóan ê sū só͘ siⁿ-khí ê khó͘-lān lâi sì-sòaⁿ ê lâng, piàn kiâⁿ kàu Hui-nî-ki, Ku-pí-lō͘, An-thê-o; bô tùi pa̍t lâng kóng tō-lí, chí ū tùi Iû-thài lâng kóng nā-tiāⁿ.

(BCL) 為著司提反的事所生起的苦難來四散的人遍行到腓尼基、居比路、安提阿；無對別人講道理，只有對猶太人講若定。

20

(THR) Nā-sī kî-tiong ū Ku-pí-lō͘, Kó͘-lī-nāi, kúi-nā lâng kàu An-thê-o, ia̍h tùi Hi-lī-nî lâng thôan Chú Iâ-so͘ ê hok-im.

(BCL) 若是其中有居比路、古利奈幾若人到安提阿，亦對希利尼人傳主耶穌的福音。

21

(THR) Chú ê chhiú kap in tī-teh; sìn lâi kui tī Chú ê, in ê siàu-gia̍h put-chí chōe.

(BCL) 主的手及佇，信來歸佇主的，的數額不止多。

22

(THR) Lūn-kàu chiah ê lâng ū siau-sit thôan kàu Iâ-lō͘-sat-léng, hō͘ kàu-hōe thiaⁿ-kìⁿ; in chiū chhe Pa-ná-pa khì An-thê-o;

(BCL) 論到諸個人有消息傳到耶路撒冷互教會聽見，就差巴拿巴，去安提阿。

23

(THR) í-keng kàu, khòaⁿ-kìⁿ Siōng-tè ê un, chiū hoaⁿ-hí; khó͘-khǹg chèng lâng ēng sim-chì kiat-liân tī Chú;

(BCL) 已經到，看見上帝的恩就歡喜，苦勸眾人，用心志，結聯佇主。

24

(THR) in-ūi i sī hó lâng, ū Sèng Sîn kap sìn móa-móa; tùi án-ni ke-thiⁿ chōe-chōe lâng kui tī Chú.

(BCL) 因為伊是好人，有聖神及信滿滿。對按呢加添多多人歸佇主。

25

(THR) I khì Tāi-sò͘ chhē Sò-lô;

(BCL) 伊去大數尋掃羅，

26

(THR) í-keng tú-tio̍h, chiū chhōa i kàu An-thê-o. In tī kàu-hōe tiong chū-chı̍p chı̍t nî kú, kà-sī chōe-chōe lâng; koh ha̍k-seng chheng chòe Ki-tok-tô͘ sī tùi An-thê-o khí.

(BCL) 已經抵著，就導伊到安提阿。佇教會中聚集一年久，教示多多人。閣學生稱做「基督徒」是對安提阿起。

27

(THR) Tng hit sî ū kúi-nā ê sian-ti tùi Iâ-lō͘-sat-léng lo̍h-khì kàu An-thê-o.

(BCL) 當彼時，有幾若個先知對耶路撒冷落去到安提阿。

28

(THR) Kî-tiong chı̍t lâng, miâ A-ka-pò͘, khí-lâi khiā, khò Sèng Sîn lâi chí-bêng phó͘ thiⁿ-ē beh tōa ki-hng; tng Kek-ló-tiu ê nî-kan kó-jiân ū chit ê sū.

(BCL) 其中一人，名亞迦布，起來徛，靠聖神來指明普天下欲大飢荒（當克勞丟的年間果然有此個事。）

29

(THR) Tùi án-ni ha̍k-seng tiāⁿ-tio̍h ì-sù, ta̍k lâng chiàu i ê le̍k-liōng, kià khì kiong-kip tiàm Iû-thài ê hiaⁿ-tī;

(BCL) 對按呢學生定著意思逐人照伊的力量，寄去供給猶太的兄弟。

30

(THR) in chiū chiàu án-ni kiâⁿ, tùi Pa-ná-pa kap Sò-lô keng-chhiú, kià kau hiah ê tiúⁿ-ló.

(BCL) 就照按呢行，對巴拿巴及掃羅經手寄交許個長老。

Bible Color Mark

• 台語漢字羅馬本
• 巴克禮全羅