使徒行傳 第 10 章

1

(THR) Tī Kai-sat-lī-a ū chı̍t lâng, miâ Ko-nî-liû, chòe Í-tāi-lī iâⁿ ê pé-chóng,

(BCL) 佇該撒利亞有一人，名哥尼流，做「意大利營」的百總。

2

(THR) i sī kèng-khiân ê lâng, kap chôan ke kèng-ùi Siōng-tè, chōe-chōe chín-chè peh-sìⁿ, siông-siông kî-tó Siōng-tè.

(BCL) 伊是敬虔的人，及全家敬畏上帝，多多賑濟百姓，常常祈禱上帝。

3

(THR) Jı̍t-sî iok-lio̍k saⁿ tiám cheng, tī īⁿ-siōng tiong bêng-bêng khòaⁿ-kìⁿ Siōng-tè ê thiⁿ-sài jı̍p-lâi chiū-kūn i, tùi i kóng, Ko-nî-liû.

(BCL) 日時，約略三點鐘，佇異象中明明看見上帝的天使入來就近伊，對伊講：「哥尼流。」

4

(THR) I chù-ba̍k khòaⁿ, chin kiaⁿ, kóng, Chú ah, ū siáⁿ-sū? Chiū kā i kóng, Lí ê kî-tó, lí ê chín-chè í-keng chiūⁿ kàu Siōng-tè ê bīn-chêng chòe kì-liām.

(BCL) 伊注目看，真驚講：「主啊，有啥事？」就給伊講：「你的祈禱，你的賑濟已經上到上帝的面前做記念。

5

(THR) Taⁿ lí tio̍h chhe lâng khì Iok-phàⁿ, chhiáⁿ hit ê Se-bûn, chheng chòe Pí-tek ê, lâi;

(BCL) 今你著差人去約帕，請彼個西門稱做彼得的來。

6

(THR) i hioh tī hôan-phê sai-hū Se-bûn tau , i ê chhù tī hái-piⁿ.

(BCL) 伊歇佇礬皮師傅西門兜，伊的厝佇海邊。」

7

(THR) Kap i kóng ōe ê thiⁿ-sài í-keng thè-khì, Ko-nî-liû chiū kiò nn̄g ê lô͘-po̍k, kap chı̍t ê kèng-khiân ê peng sî-siông kun-sûi i ê;

(BCL) 及伊講話的天使已經退去，哥尼流就叫二個奴僕及一個敬虔的兵時常跟隨伊的，

8

(THR) chiong chiah ê tāi-chì lóng kā in kóng, chiū chhe in khì Iok-phàⁿ.

(BCL) 將諸個代誌攏給講，就差去約帕。

9

(THR) Keh jı̍t, in kiâⁿ lō͘ í-keng kūn siâⁿ, iok-lio̍k jı̍t tiong-tàu, Pí-tek chiūⁿ chhù-téng kî-tó;

(BCL) 隔日，行路已經近城。約略日中晝，彼得上厝頂祈禱，

10

(THR) chin iau, ài chia̍h; lâng tú-tú teh pī-pān tǹg; Pí-tek ê sîn-hûn iû tī siōng gōa;

(BCL) 真枵，愛食。人抵抵備辦頓，彼得的神魂遊佇象外，

11

(THR) chiū khòaⁿ-kìⁿ thiⁿ khui, ū khì-kū kàng-lo̍h, chhin-chhiūⁿ tōa pak pò͘, pa̍k sì ê kak-thâu, tūi tī tōe-nı̍h:

(BCL) 就看見天開，有器具降落，親像大幅布，縛四個角頭，墜佇地裡，

12

(THR) lāi-bīn ū tōe-chiūⁿ ta̍k lūi sì-kha ê siù, thâng-thōa, kap thiⁿ tiong ê pe-chiáu.

(BCL) 內面有地上逐類四腳的獸，蟲，及天中的飛鳥；

13

(THR) Koh ū siaⁿ tùi i kóng, Pí-tek, khí-lâi; thâi lâi chia̍h.

(BCL) 閣有聲對伊講：「彼得起來，來食！」

14

(THR) Nā-sī Pí-tek kóng, Chú ah, tòan-tòan m̄-thang, in-ūi hōan-nā chho͘-sio̍k ê mı̍h kap bô chheng-khì ê, góa bē bat chia̍h.

(BCL) 若是彼得講：「主啊，斷斷呣通！因為凡若粗俗的物及無清氣的，我未曾食。」

15

(THR) Tē jī pái ū siaⁿ koh tùi i kóng, Siōng-tè só͘ hō͘ i chheng-khì ê, lí bo̍h-tit lia̍h chòe chho͘-sio̍k.

(BCL) 第二擺有聲閣對伊講：「上帝所互伊清氣的，你莫得掠做粗俗。」

16

(THR) Án-ni saⁿ pái; hit ê khì-kū liâm-piⁿ siu chiūⁿ thiⁿ.

(BCL) 按呢三擺，彼個器具連鞭收上天。

17

(THR) Pí-tek sim-lāi teh tiû-tû só͘ khòaⁿ-kìⁿ ê īⁿ-siōng sím-mı̍h ì-sù, tú-tú hit tia̍p Ko-nî-liû só͘ chhe lâi ê lâng, ū mn̄g kàu Se-bûn ê chhù, khiā tī mn̂g-gōa,

(BCL) 彼得心內躊躇，所看見的異象甚麼意思。抵抵彼霎哥尼流所差來的人有問到西門的厝，徛佇門外，

18

(THR) Chhut siaⁿ teh mn̄g khòaⁿ ū Se-bûn, chheng chòe Pí-tek ê, hioh tī chia á bô.

(BCL) 出聲問：「看有西門稱做彼得的歇佇遮抑無？」

19

(THR) Pí-tek iáu teh siūⁿ īⁿ-siōng ê sî, Sèng Sîn kā i kóng, Ū saⁿ lâng teh chhē lí.

(BCL) 彼得猶想異象的時，聖神給伊講：「有三人尋你。

20

(THR) Taⁿ tio̍h khí-lâi, lo̍h-khì, kap in khì, m̄ bián giâu-gî; in-ūi sī góa chhe in.

(BCL) 今著起來，落去，及去，呣免僥疑，因為是我差。」

21

(THR) Pí-tek lo̍h-khì, kìⁿ hiah ê lâng, kóng, Góa chiū-sī lín só͘ chhē ê lâng; lín lâi sī ūi-tio̍h siáⁿ-sū?

(BCL) 彼得落去見許個人，講：「我就是恁所尋的人，恁來是為著啥事？」

22

(THR) In chiū kóng, Pé-chóng Ko-nî-liû sī gī lâng, koh kèng-ùi Siōng-tè, hō͘ Iû-thài chôan kok só͘ o-ló, hōng sèng ê thiⁿ-sài chí-sī i, tio̍h chhiáⁿ lí kàu i ê chhù, sòa thiaⁿ lí ê ōe.

(BCL) 就講：「百總哥尼流是義人，閣敬畏上帝，互猶太全國所謳咾。奉聖的天使指示伊，著請你到伊的厝，續聽你的話。」

23

(THR) Pí-tek chiū chhiáⁿ in jı̍p-lâi, lâu in hioh-teh. Keh jı̍t khí-sin kap in khì, koh ū Iok-phàⁿ ê hiaⁿ-tī kúi-nā lâng kap i tâng kiâⁿ.

(BCL) 彼得就請入來，留歇。隔日，起身及去，閣有約帕的兄弟幾若人及伊同行；

24

(THR) Koh keh jı̍t, jı̍p Kai-sat-lī-a. Ko-nî-liû í-keng chū-chı̍p i ê chhin-lâng kap hó pêng-iú, teh thèng-hāu in.

(BCL) 閣隔日，入該撒利亞，哥尼流已經聚集伊的親人及好朋友聽候。

25

(THR) Pí-tek tú-á jı̍p-khì ê sî, Ko-nî-liû ngiâ-chih i, phak tī i ê kha-chêng, lâi pài i.

(BCL) 彼得抵仔入去的時，哥尼流迎接伊，仆佇伊的腳前，來拜伊。

26

(THR) Chóng-sī Pí-tek khan i khí-lâi, kóng, Khí-lâi; góa ka-kī iā sī lâng.

(BCL) 總是彼得牽伊起來，講：「起來，我家己也是人。」

27

(THR) Kap i kóng ōe chiū jı̍p-khì khòaⁿ-kìⁿ chōe-chōe lâng chū-chı̍p;

(BCL) 及伊講話就入去，看見多多人聚集，

28

(THR) chiū tùi in kóng, lín chai Iû-thài lâng kap pa̍t cho̍k ê lâng chhin-kūn, á-sī lâi-óng, pún sī bô ha̍p lē; nā-sī Siōng-tè í-keng chí-sī góa, bô lūn sím-mı̍h lâng m̄-thang kóng i chòe chho͘-sio̍k bô͘ chheng-khì;

(BCL) 就對講：「恁知，猶太人及別族的人親近抑是來往本是無合例，若是上帝已經指示我，無論甚麼人呣通講伊做粗俗無清氣。

29

(THR) só͘-í góa siū chhiáⁿ, bô the-sî, chiū lâi. Taⁿ mn̄g, lín chhiáⁿ góa sím-mı̍h ì-sù.

(BCL) 所以我受請，無推辭就來。今問：恁請我甚麼意思？」

30

(THR) Ko-nî-liû kóng, Sì jı̍t chêng chit ê sî, góa tī chhù-lāi, ē-po͘ saⁿ tiám cheng, teh kî-tó; chiū hut-jiân ū chı̍t lâng, i-chiûⁿ kng-iàⁿ-iàⁿ, khiā tī góa ê bīn-chêng,

(BCL) 哥尼流講：「四日前，此個時，我佇厝內下晡三點鐘祈禱，就忽然有一人衣裳光映映，徛佇我的面前，講：

31

(THR) kóng, Ko-nî-liû, tī Siōng-tè ê bīn-chêng lí ê kî-tó í-keng thiaⁿ-kìⁿ, lí ê chín-chè í-keng tit-tio̍h kì-liām.

(BCL) 『哥尼流，佇上帝的面前你的祈禱已經聽見，你的賑濟已經得著記念。

32

(THR) Taⁿ tio̍h chhe lâng kàu Iok-phàⁿ, chhiáⁿ Se-bûn, chheng chòe Pí-tek ê, lâi; i tiàm tī hái-piⁿ, hôan-phê sai-hū Se-bûn ê chhù.

(BCL) 今著差人到約帕，請西門稱做彼得的來，伊佇海邊礬皮師傅西門的厝。』

33

(THR) Só͘-í góa liâm-piⁿ chhe lâng kàu lí hia; lí lâi chin hó. Taⁿ góan lóng tī Siōng-tè ê bīn-chêng, ài beh thiaⁿ Chú só͘ bēng-lēng lí lóng-chóng ê ōe.

(BCL) 所以我連鞭差人到你遐。你來真好；今阮攏佇上帝的面前，愛欲聽主所命令你攏總的話。」

34

(THR) Pí-tek khui chhùi, kóng, Taⁿ góa chin-chiàⁿ chai Siōng-tè bô ēng gōa-māu chhú lâng;

(BCL) 彼得開嘴講：「今我真正知上帝無用外貌取人。

35

(THR) to̍k-to̍k tī ta̍k pang-kok kìⁿ ū kèng-ùi I lâi kiâⁿ gī ê lâng, hō͘ I hoaⁿ-hí chiap-la̍p.

(BCL) 獨獨佇逐邦國見有敬畏伊、來行義的人互伊歡喜接納。

36

(THR) Siōng-tè só͘ kià hō͘ Í-sek-lia̍t kiáⁿ-sun ê ōe, tùi Iâ-so͘ Ki-tok lâi thôan hô-pêng ê hok-im, (I sī bān ū ê Chú),

(BCL) 上帝所寄互以色列子孫的話，對耶穌基督來傳和平的福音（伊是萬有的主）。

37

(THR) chit ê siau-sit lín chai sī tī Iok-hān só͘ thôan ê sóe-lé í-āu, tùi Ka-lī-lī khí kàu piàn Iû-thài;

(BCL) 此個消息恁知是佇約翰所傳的洗禮以後，對加利利起，到遍猶太。

38

(THR) chiū-sī Ná-sat-le̍k lâng Iâ-so͘, Siōng-tè ū cháiⁿ-iūⁿ ēng Sèng Sîn kap châi-lêng boah I; I chiū sì-kòe kiâⁿ chòe hó sū, i-hó kìⁿ-nā Mô͘-kúi só͘ ap-chè ê; in-ūi Siōng-tè kap I tī-teh.

(BCL) 就是拿撒勒人耶穌，上帝有怎樣用聖神及才能抹伊。伊就四界行，做好事，醫好見若魔鬼所壓制的，因為上帝及伊佇。

39

(THR) Kìⁿ-nā I tī Iû-thài lâng ê tōe-hng kap Iâ-lō͘-sat-léng só͘ kiâⁿ ê, góan chòe kan-chèng; lâng chiū tiàu I tī chhâ-nı̍h, lâi hāi-sí I.

(BCL) 見若伊佇猶太人的地方及耶路撒冷所行的，阮做干證。人就吊伊佇柴裡來害死伊。

40

(THR) Kàu tē saⁿ jı̍t, Siōng-tè hō͘ I koh-o̍ah, sòa chhut-hiān,

(BCL) 到第三日，上帝互伊復活，續出現；

41

(THR) m̄ sī hō͘ chèng peh-sìⁿ khòaⁿ, sī hō͘ Siōng-tè tāi-seng só͘ kéng-sóan ūi-tio̍h I chòe kan-chèng ê lâng khòaⁿ, chiū-sī góan chiah-ê, tī I tùi sí-lâng tiong koh-o̍ah ê liáu-āu kap I saⁿ-kap lim-chia̍h ê lâng.

(BCL) 呣是互眾百姓看，是互上帝代先所揀選為著伊做干證的人看，就是阮諸個佇伊對死人中復活的了後及伊相及飲食的人。

42

(THR) I koh bēng-lēng góan thôan hō͘ peh-sìⁿ, kan-chèng chit-ê sī Siōng-tè só͘ lı̍p-tiāⁿ chòe o̍ah-lâng sí-lâng ê sím-phòaⁿ si.

(BCL) 伊閣命令阮傳互百姓，干證此個是上帝所立定，做活人、死人的審判司。

43

(THR) Chèng sian-ti ia̍h ūi-tio̍h I chòe kan-chèng, chiū-sī hōan-nā sìn I ê lâng, tùi I ê miâ tit-tio̍h chōe sià.

(BCL) 眾先知亦為著伊做干證：『就是凡若信伊的人，對伊的名得著罪赦。』」

44

(THR) Pí-tek iáu-kú teh kóng chiah ê ōe ê sî, Sèng Sîn kàng-lîm tī kìⁿ-nā thiaⁿ tō-lí ê lâng.

(BCL) 彼得猶久講諸個話的時，聖神降臨佇見若聽道理的人。

45

(THR) Hōng kat-lé ê sìn-tô͘, kap Pí-tek saⁿ-kap lâi ê, in-ūi Sèng Sîn ê siúⁿ-sù ia̍h kàng-lo̍h tī gōa-pang lâng, chiū lóng kî-kòai.

(BCL) 奉割禮的信徒，及彼得相及來的，因為聖神的賞賜亦降落佇外邦人，就攏奇怪；

46

(THR) In-ūi thiaⁿ-kìⁿ in ēng chiah ê khiuⁿ-kháu teh kóng, koh o-ló Siōng-tè chòe tōa.

(BCL) 因為聽見用諸個腔口講，閣謳咾上帝做大。

47

(THR) Pí-tek chiū ìn kóng, Chiah ê lâng í-keng siū-tio̍h Sèng Sîn, chhin-chhiūⁿ lán chı̍t iūⁿ, chī-chūi ōe kìm-tit ēng chúi kā in kiâⁿ sóe-lé ah?

(BCL) 彼得就應講：「諸個人已經受著聖神，親像咱一樣，是誰會禁得用水給行洗禮啊？」

48

(THR) Chiū bēng-lēng in tī Iâ-so͘ Ki-tok ê miâ siū sóe-lé. Tùi án-ni chhiáⁿ i tòa kúi-nā jı̍t.

(BCL) 就命令佇耶穌基督的名受洗禮。對按呢請伊住幾若日。

Bible Color Mark

• 台語漢字羅馬本
• 巴克禮全羅