使徒行傳 第 14 章

1

(THR) In tī Í-ko-liām saⁿ-kap jı̍p Iû-thài lâng ê hōe-tn̂g, lâi káng-lūn; tì-kàu Iû-thài lâng kap Hi-lī-nî lâng chōe-chōe lâi sìn.

(BCL) 佇以哥念相及入猶太人的會堂，來講論，致到猶太人及希利尼人多多來信。

2

(THR) Nā-sī hiah ê m̄ sūn-thàn ê Iû-thài lâng iô-tāng gōa-pang lâng ê sim, hō͘ in òan-hūn chiah ê hiaⁿ-tī.

(BCL) 若是許個呣順趁的猶太人搖動外邦人的心，互怨恨諸個兄弟。

3

(THR) In chiū tiàm hia chōe-chōe jı̍t, óa-khò Chú hó-táⁿ lâi kóng; Chú siúⁿ-sù sîn-jiah kî-sū, tùi in ê chhiú lâi chiâⁿ, kan-chèng I un-tián ê tō-lí.

(BCL) 就遐多多日，倚靠主好膽來講，主賞賜神蹟奇事對的手來成，干證伊恩典的道理。

4

(THR) Siâⁿ-lāi ê chèng lâng chiū hun-pêng, ū-ê tè Iû-thài lâng, ū-ê tè sù-tô͘.

(BCL) 城內的眾人就分旁，有的隨猶太人，有的隨使徒。

5

(THR) Hit sî gōa-pang lâng, Iû-thài lâng, kap in ê sī-tōa ài oe-khoeh lêng-jio̍k, ēng chio̍h-thâu tìm in.

(BCL) 彼時，外邦人、猶太人，及的序大，愛挨夾凌辱，用石頭擲。

6

(THR) In chai, chiū tô-cháu khì Lū-ko-nî ê Lō͘-sū-tek Te̍k-pì chiah ê siâⁿ, kap chiu-ûi ê tōe-hng;

(BCL) 知，就逃走去呂高尼的路司得、特庇諸個城，及周圍的地方，

7

(THR) tī hia thôan hok-im.

(BCL) 佇遐傳福音。

8

(THR) Tī Lō͘-sū-tek ū chı̍t lâng chē-teh, siang-kha bô la̍t, sī tùi chhut-sì chiū nńg-kha, lóng bē bat kiâⁿ.

(BCL) 佇路司得有一人坐，雙腳無力，是對出世就軟腳，攏未曾行。

9

(THR) I thiaⁿ Pó-lô kóng tō-lí; Pó-lô chù-ba̍k khòaⁿ i, khòaⁿ-kìⁿ i ū sìn thang tit-tio̍h hó,

(BCL) 伊聽保羅講道理，保羅注目看伊，看見伊有信通得著好，

10

(THR) chiū tōa siaⁿ kóng, Khí-lâi, siang-kha khiā chiàⁿ, thêng sin. Hit lâng chiū thiàu-khí-lâi kiâⁿ.

(BCL) 就大聲講：「起來，雙腳徛正挺身！」彼人就跳起來行。

11

(THR) Chèng lâng khòaⁿ-kìⁿ Pó-lô só͘ chòe, chiū ēng Lū-ko-nî ê khiuⁿ-kháu tōa siaⁿ kóng, Chiah ê sîn-bêng chioh lâng ê hêng, lîm-kàu lán lah.

(BCL) 眾人看見保羅所做，就用呂高尼的腔口大聲講：「諸個神明借人的形臨到咱啦。」

12

(THR) Chiū chheng Pa-ná-pa chòe Tiu-sū; in-ūi Pó-lô chhut-thâu kóng ōe, chheng i chòe Hi-ní-bí.

(BCL) 就稱巴拿巴做宙斯，因為保羅出頭講話，稱伊做希耳米。

13

(THR) Siâⁿ-gōa Tiu-sū ê chè-si khan gû-á, the̍h hoe-khôan, kàu mn̂g chêng, beh kap chèng lâng hiàn-chè.

(BCL) 城外宙斯的祭司牽牛仔，提花環到門前，欲及眾人獻祭。

14

(THR) Nā-sī sù-tô͘ Pa-ná-pa, Pó-lô thiaⁿ-kìⁿ, chiū thiah-lı̍h saⁿ, thiàu-chhut-lâi chèng lâng ê tiong-kan, kiò kóng,

(BCL) 若是使徒巴拿巴、保羅聽見，就拆裂衫，跳出來眾人的中間，叫講：

15

(THR) Lín tāi-ke siáⁿ-sū kiâⁿ án-ni? Góan chiah-ê ia̍h sī lâng kap lín tâng chêng, thôan hok-im, hō͘ lín lī-khui chiah ê bô iáⁿ-chiah ê, lâi kui tī chin-o̍ah ê Siōng-tè, chiū-sī chhòng-chō thiⁿ, tōe, hái, kap kî-tiong bān mı̍h ê.

(BCL) 「恁大家，啥事行按呢？阮諸個亦是人，及恁同情。傳福音，互恁離開諸個無影跡的，來歸佇真活的上帝，就是創造天、地、海及其中萬物者。

16

(THR) I tī tāi-seng ê sè-tāi, iông-ún bān pang kiâⁿ in ê lō͘.

(BCL) 伊佇代先的世代，容允萬邦行的路；

17

(THR) Nā-sī I bē bat bô ūi-tio̍h pún-sin hián-chhut chèng-kù, chiū-sī kiâⁿ hó sū, kā lín tùi thiⁿ lo̍h hō͘, chiàu sî chhut ké-chí, ēng jı̍t-sı̍t kap hoaⁿ-hí chhiong-móa lín ê sim.

(BCL) 若是伊未曾無為著本身顯出證據，就是行好事，給恁對天落雨，照時出果子，用日食及歡喜充滿恁的心。」

18

(THR) In kóng án-ni, lím-lím-á kìm-chí chèng lâng bô chè-hiàn in.

(BCL) 講按呢，僅僅仔禁止眾人無祭獻。

19

(THR) Chóng-sī ū Iû-thài lâng tùi An-thê-o Í-ko-liām lâi; kàu-so chèng lâng, chiū ēng chio̍h-thâu tìm Pó-lô; phah-sǹg i í-keng sí, chiū thoa i chhut siâⁿ-gōa.

(BCL) 總是有猶太人對安提阿、以哥念來，教唆眾人，就用石頭擲保羅，拍算伊已經死，就拖伊出城外。

20

(THR) Nā-sī ha̍k-seng ûi i, i chiū khí-lâi jı̍p siâⁿ; keh jı̍t kap Pa-ná-pa lī-khui hia, khì Te̍k-pì.

(BCL) 若是學生圍伊，伊就起來，入城。隔日，及巴拿巴離開遐去特庇，

21

(THR) Í-keng thôan hok-im tī hit ê siâⁿ, hō͘ chōe-chōe lâng lâi chòe ha̍k-seng, chiū tò-tńg khì Lō͘-sū-tek, Í-ko-liām, An-thê-o,

(BCL) 已經傳福音佇彼個城，互多多人來做學生，就倒轉去路司得、以哥念、安提阿，

22

(THR) kian-kò͘ ha̍k-seng ê sim, khǹg in tn̂g-tn̂g tiàm tī sìn; koh kóng, Lán tio̍h tùi chōe-chōe kan-khó͘ lâi jı̍p Siōng-tè ê kok.

(BCL) 堅固學生的心，勸長長佇信；閣講：「咱著對多多艱苦，來入上帝的國。」

23

(THR) In tī ta̍k ê kàu-hōe kā in siat-lı̍p só͘ kéng ê tiúⁿ-ló, kìm-chia̍h kî-tó, chiū chiong in kau-thok tī in só͘ sìn ê Chú.

(BCL) 佇逐個教會給設立所揀的長老，禁食祈禱，就將交託佇所信的主。

24

(THR) Chiū keng-kè Pí-se-tí, kàu Pông-hui-lī-a.

(BCL) 就經過彼西底，到旁非利亞。

25

(THR) Í-keng kóng tō-lí tī Pia̍t-ka, chiū lo̍h-khì A-tāi-lī;

(BCL) 已經講道理佇別加，就落去亞大利，

26

(THR) tùi hia tah chûn kàu An-thê-o, chiū-sī in bat tī hia siū kau-thok tī Siōng-tè ê un-tián, lâi kiâⁿ in só͘ ôan-móa ê kang.

(BCL) 對遐搭船，到安提阿。就是曾佇遐受交託、佇上帝的恩典、來行所圓滿的工。

27

(THR) Í-keng kàu, chū-chı̍p kàu-hōe, kóng-khí Siōng-tè só͘ kap in kiâⁿ it-chhè ê sū, ia̍h kóng Siōng-tè àn-cháiⁿ-iūⁿ kā gōa-pang lâng khui sìn ê mn̂g.

(BCL) 已經到，聚集教會，講起上帝所及行一切的事，亦講上帝按怎樣給外邦人開信的門。

28

(THR) Chiū kap ha̍k-seng saⁿ-kap tòa chám-jiân kú.

(BCL) 就及學生相及住嶄然久。

Bible Color Mark

• 台語漢字羅馬本
• 巴克禮全羅