使徒行傳 第 8 章

1

(THR) Hit jı̍t tī Iâ-lō͘-sat-léng ê kàu-hōe tú-tio̍h tōa khún-tio̍k; sù-tô͘ í-gōa, lóng sì-sòaⁿ tī Iû-thài, Sat-má-lī-a chiah ê tōe-hng.

(BCL) 彼日，佇耶路撒冷的教會抵著大窘逐，使徒以外，攏四散佇猶太、撒瑪利亞諸個地方。

2

(THR) Ū kèng-khiân ê lâng bâi-chòng Sū-thê-hóan, ūi-tio̍h i tûi heng tōa thî-khàu.

(BCL) 有敬虔的人埋葬司提反，為著伊搥胸大啼哭。

3

(THR) Sò-lô tōa hām-hāi kàu-hōe, jı̍p ta̍k lâng ê ke, thoa in ê lâm-lú, sàng-kau lo̍h kaⁿ.

(BCL) 掃羅大陷害教會，入逐人的家，拖的男女送交落監。

4

(THR) Tùi án-ni hiah ê sì-sòaⁿ ê lâng piàn kiâⁿ, thôan hok-im ê tō-lí.

(BCL) 對按呢許個四散的人遍行傳福音的道理。

5

(THR) Hui-le̍k lo̍h-khì Sat-má-lī-a ê siâⁿ, ēng Ki-tok thôan hō͘ in.

(BCL) 腓利落去撒瑪利亞的城，用基督傳互。

6

(THR) Chèng lâng thiaⁿ-kìⁿ, koh khòaⁿ-kìⁿ só͘ kiâⁿ ê sîn-jiah, chiū tâng sim ì-hiòng Hui-le̍k ê ōe.

(BCL) 眾人聽見，閣看見所行的神蹟，就同心意向腓利的話。

7

(THR) In-ūi chōe-chōe lâng ū hōan-tio̍h siâ-sîn, hiah ê siâ-sîn tōa siaⁿ âu-kiò chhut-khì; piàn-sūi ê, pái-kha ê, ia̍h chōe-chōe tit-tio̍h i-hó.

(BCL) 因為多多人有患著邪神，許個邪神大聲喉叫，出去；半旞的、跛腳的，亦多多得著醫好。

8

(THR) Hit ê siâⁿ-lāi tōa hoaⁿ-hí.

(BCL) 彼個城內大歡喜。

9

(THR) Chóng-sī ū chı̍t lâng, miâ kiò Se-bûn, pêng-sò͘ tī siâⁿ-lāi kiâⁿ siâ-su̍t, chū-khoa chòe tōa, hō͘ Sat-má-lī-a ê peh-sìⁿ gông-ngia̍h;

(BCL) 總是有一人，名叫西門，平素佇城內行邪術，自誇做大，互撒瑪利亞的百姓卬愕；

10

(THR) tùi sòe kàu tōa, bô m̄ ì-hiòng i, kóng, Chit lâng sī Siōng-tè ê kôan-lêng, chiū-sī hit ê chheng chòe Tōa ê.

(BCL) 對細到大無呣意向伊，講：「此人是上帝的權能就是彼個稱做大者。」

11

(THR) In ì-hiòng i ê iân-kò͘, sī in-ūi i kú-kú ēng siâ-su̍t hō͘ in gông-ngia̍h.

(BCL) 意向伊的緣故，是因為伊久久用邪術，互卬愕。

12

(THR) Kàu in sìn Hui-le̍k só͘ thôan ê hok-im, lūn Siōng-tè ê kok kap Iâ-so͘ Ki-tok ê miâ, chiū ū lâm-lú siū sóe-lé.

(BCL) 到信腓利所傳的福音，論上帝的國及耶穌基督的名，就有男女受洗禮。

13

(THR) Se-bûn ka-kī iā sìn; í-keng siū sóe-lé, siông-siông kun-sûi Hui-le̍k; khòaⁿ i só͘ kiâⁿ chiah ê sîn-jiah tōa kôan-lêng, chiū gông-ngia̍h.

(BCL) 西門家己也信；已經受洗禮，常常跟隨腓利，看伊所行諸個神蹟大權能，就卬愕。

14

(THR) Tī Iâ-lō͘-sat-léng ê sù-tô͘ thiaⁿ-kìⁿ Sat-má-lī-a í-keng chiap-la̍p Siōng-tè ê tō-lí, chiū chhe Pí-tek Iok-hān khì in hia.

(BCL) 佇耶路撒冷的使徒聽見撒瑪利亞已經接納上帝的道理，就差彼得、約翰去遐。

15

(THR) In í-keng lo̍h-khì, chiū thòe in kî-tó, hō͘ in siū Sèng Sîn;

(BCL) 已經落去，就替祈禱，互受聖神。

16

(THR) in-ūi Sèng Sîn iáu-bē lîm-kàu in chı̍t lâng; in chí-ū siū sóe-lé, kui tī Chú Iâ-so͘ ê miâ nā-tiāⁿ.

(BCL) 因為聖神猶未臨到一人，只有受洗禮歸佇主耶穌的名若定。

17

(THR) Tùi án-ni kā in hōaⁿ chhiú, in chiū siū Sèng Sîn .

(BCL) 對按呢給按手，就受聖神。

18

(THR) Chóng-sī Se-bûn khòaⁿ-kìⁿ tùi sù-tô͘ ê hōaⁿ chhiú chiū ū Sèng Sîn hō͘ lâng, chiah chiong chîⁿ hiàn hō͘ in,

(BCL) 總是西門看見對使徒的按手，就有聖神互人，才將錢獻互，

19

(THR) kóng, Ia̍h chiong chit ê kôan hō͘ góa, tì-kàu góa ê chhiú só͘ hōaⁿ ê lâng siū-tio̍h Sèng Sîn.

(BCL) 講：「亦將此個權互我，致到我的手所按的人受著聖神。」

20

(THR) To̍k-to̍k Pí-tek tùi i kóng, Lí ê gûn kap lí saⁿ-kap bia̍t-bô, in-ūi lí phah-sǹg Siōng-tè ê siúⁿ-sù beh ēng chîⁿ lâi bóe.

(BCL) 獨獨彼得對伊講：「你的銀及你相及滅無！因為你拍算上帝的賞賜欲用錢來買。

21

(THR) Lí tī chit ê sū bô hūn, bô kan-sia̍p; in-ūi tī Siōng-tè ê bīn-chêng lí ê sim put-chèng.

(BCL) 你佇此個事無份無干涉；因為佇上帝的面前，你的心不正。

22

(THR) Só͘-í tio̍h hóan-hóe lī-khui lí chit ê pháiⁿ, lâi kiû Chú, kiám-chhái lí sim-lāi ê liām-thâu ōe tit sià-bián.

(BCL) 所以著反悔離開你此個歹，來求主，豈採你心內的念頭會得赦免。

23

(THR) In-ūi góa khòaⁿ-kìⁿ lí jı̍p tī khó͘-táⁿ ê tiong-kan, hō͘ put-gī khún-pa̍k.

(BCL) 因為我看見你入佇苦膽的中間，互不義捆縛。」

24

(THR) Se-bûn ìn kóng, Lín thòe góa kiû Chú, hō͘ lín só͘ kóng ê lóng bô kàu tī góa.

(BCL) 西門應講：「恁替我求主，互恁所講的攏無到佇我。」

25

(THR) In í-keng chòe kan-chèng lâi thôan Chú ê tō-lí, chiū tò-khì Iâ-lō͘-sat-léng; tī Sat-má-lī-a lâng chōe-chōe ê hiuⁿ-siā thôan hok-im.

(BCL) 已經做干證來傳主的道理，就倒去耶路撒冷佇撒瑪利亞人多多的鄉社傳福音。

26

(THR) Chú ê thiⁿ-sài tùi Hui-le̍k kóng, Khí-lâi, tùi lâm-sì khì, kàu tùi Iâ-lō͘-sat-léng lo̍h-khì Ka-sat ê lō͘; hia chiū-sī khòng-iá.

(BCL) 主的天使對腓利講：「起來！對南勢去，到對耶路撒冷落去迦薩的路。」遐就是曠野。

27

(THR) Chiū khí-lâi khì; tú-tn̄g ū chı̍t ê Ai-thê-o-pek lâng, chiū-sī Ai-thê-o-pek lú-ông, Kan-tāi-ki, ū kôan ê thài-kàm, chóng-kóan i ê gûn-khò͘; i í-keng kàu Iâ-lō͘-sat-léng kèng-pài;

(BCL) 就起來去，抵當有一個埃提阿伯人，就是埃提阿伯女王甘大基有權的太監，總管伊的銀庫，伊已經到耶路撒冷敬拜。

28

(THR) tò-tńg-lâi, chē tī chhia-nı̍h, teh tha̍k sian-ti Í-sài-a ê chheh.

(BCL) 倒轉來，坐佇車裡，讀先知以賽亞的冊。

29

(THR) Sèng Sîn kā Hui-le̍k kóng, Chìn-chêng khì kūn-óa hit tiuⁿ chhia.

(BCL) 聖神給腓利講：「進前去！近倚彼張車。」

30

(THR) Hui-le̍k cháu-khì chiū-kūn i, thiaⁿ-kìⁿ i teh tha̍k sian-ti Í-sài-a ê chheh, chiū kóng, Lí só͘ tha̍k ê, lí ōe bêng-pe̍k mah?

(BCL) 腓利走去就近伊，聽見伊讀先知以賽亞的冊，就講：「你所讀的，你會明白嗎？」

31

(THR) I kóng, Bô lâng chí-sī góa, thái-thó ōe? Chiū chhiáⁿ Hui-le̍k chiūⁿ chhia saⁿ-kap chē.

(BCL) 伊講：「無人指示我，豈可會？」就請腓利上車，相及坐。

32

(THR) Só͘ tha̍k ê sèng-keng chiū-sī chit tōaⁿ, I hō͘ lâng khan, chhin-chhiūⁿ iûⁿ kàu siū thâi ê só͘-chāi, I bô khui chhùi, Chhin-chhiūⁿ iûⁿ-á tùi chián-mn̂g ê bô chhut siaⁿ;

(BCL) 所讀的聖經就是此段：伊互人牽，親像羊到受的所在，伊無開嘴；親像羊仔對剪毛的無出聲。

33

(THR) I pi-bî ê sî, siū bô kong-gī ê sím-phòaⁿ. I ê sè-tāi chī-chūi beh thôan-su̍t? In-ūi I ê o̍ah-miā tùi tōe-chiūⁿ siū to̍at-khì.

(BCL) 伊卑微的時，受無公義的審判。伊的世代是誰欲傳述？因為伊的活命對地上受奪去。

34

(THR) Thài-kàm ìn Hui-le̍k kóng, Chhiáⁿ mn̄g, sian-ti kóng chit ê ōe sī chí sím-mı̍h lâng? sī chí pún-sin, á-sī pa̍t lâng ah?

(BCL) 太監應腓利講：「請問，先知講此個話是指甚麼人？是指本身？抑是別人啊？」

35

(THR) Hui-le̍k chiū khui chhùi, tùi chit ê sèng-keng khí, ēng Iâ-so͘ thôan hō͘ i.

(BCL) 腓利就開嘴對此個聖經起，用耶穌傳互伊。

36

(THR) Kiâⁿ lō͘ ê sî, kàu ū chúi ê ūi; thài-kàm kóng, Lí khòaⁿ, chia ū chúi; góa siū sóe-lé ū sím-mı̍h chó͘-gāi?

(BCL) 行路的時，到有水的位，太監講：「你看，遮有水，我受洗禮有甚麼阻礙？」

37

(THR) 併tī頂節

(BCL) ｛腓利說：「你若是一心相信，就可以。」他回答說：「我信耶穌是基督是上帝的兒子。」〔台語羅馬譯本無此節！〕｝

38

(THR) Chiū hoan-hù thêng chhia; Hui-le̍k kap thài-kàm nn̄g lâng lo̍h chúi; Hui-le̍k chiū kā i kiâⁿ sóe-lé.

(BCL) 就吩咐停車，腓利及太監二人落水，腓利就給伊行洗禮。

39

(THR) Tùi chúi-nı̍h chiūⁿ-lâi ê sî, Chú ê Sîn tòa Hui-le̍k khì; thài-kàm bô koh khòaⁿ-kìⁿ i, in-ūi chòe i chiūⁿ lō͘, iā chin hoaⁿ-hí.

(BCL) 對水裡上來的時，主的神帶腓利去，太監無閣看見伊，因為做伊上路，也真歡喜。

40

(THR) Āu-lâi Hui-le̍k tī A-só-to͘ hō͘ lâng tú-tio̍h; chiū piàn kiâⁿ chiah ê siâⁿ thôan hok-im, tı̍t kàu Kai-sat-lī-a.

(BCL) 後來腓利佇亞鎖都互人抵著；就遍行諸個城傳福音，直到該撒利亞。

Bible Color Mark

• 台語漢字羅馬本
• 巴克禮全羅