阿摩司書 第 8 章

1

(THR) Chú Iâ-hô-hoa hō͘ góa khòaⁿ-kìⁿ chı̍t-hāng; góa khòaⁿ-kìⁿ chı̍t-kheng hē-thiⁿ ê ké-chí.

(BCL) 主耶和華互我看見一項：我看見一筐夏天的果子。

2

(THR) I kóng, A-mô͘-sū ah, lí khòaⁿ-kìⁿ sím-mı̍h? góa kóng, Khòaⁿ-kìⁿ chı̍t-kheng hē-thiⁿ ê ké-chí. Iâ-hô-hoa chiū tùi góa kóng, Góa ê peh-sìⁿ Í-sek-lia̍t ê bo̍at-kî kàu--lah; Góa tek-khak bô koh khoan-sù in.

(BCL) 伊講：「阿摩司啊，你看見甚麼？」我講：「看見一筐夏天的果子。」耶和華就對我講：「我的百姓以色列的末期到啦，我的確無閣寬恕。」

3

(THR) Chú Iâ-hô-hoa kóng, Hit-jı̍t kiong-tiān ê chhiùⁿ-koa beh piàn-chòe thî-khàu; beh ū chōe-chōe sin-si tī ta̍k só͘-chāi hiat-ka̍k, lâng lóng chēng-chēng.

(BCL) 主耶和華講：「彼日，宮殿的唱歌欲變做啼哭；欲有多多身屍佇逐所在擲，人攏靜靜。」

4

(THR) Lín chiah-ê ài thun-chia̍h sòng-hiong lâng, hō͘ chit só͘-chāi ê khùn-khó͘ lâng soe-pāi--ê, tio̍h thiaⁿ chit ê ōe.

(BCL) 恁諸個愛吞食喪鄉人、互此所在的困苦人衰敗者，著聽此個話！

5

(THR) Lín kóng, Ge̍h ê chhoe-it sím-mı̍h sî kè-khì, hō͘ góan thang thiò gō͘-kak? an-hioh-jı̍t sím-mı̍h sî kè-khì, hō͘ góan thang bōe be̍h, ēng sòe ê i-hoat, ēng tāng ê sià-khek-le̍k, ēng khúi-chà ê thian-pêng lâi phiàn lâng;

(BCL) 恁講：月的初一甚麼時過去，互阮通糶五穀；安息日甚麼時過去，互阮通賣麥；用細的伊法，用重的舍客勒，用詭詐的天秤來騙人，

6

(THR) thang ēng gûn bóe sòng-hiong lâng, ēng chı̍t-siang ôe ōaⁿ kêng-chhiah ê lâng, chiong pháiⁿ ê be̍h bōe hō͘ lâng?

(BCL) 通用銀買喪鄉人，用一雙鞋換窮赤的人，將歹的麥賣互人。

7

(THR) Iâ-hô-hoa kí Ngá-kok ê êng-hôa lâi chiù-chōa kóng, In lóng-chóng ê só͘-chòe, Góa éng-óan bô bōe-kì-tit.

(BCL) 耶和華指雅各的榮華來咒誓講：攏總的所做，我永遠無記得。

8

(THR) Chit ê tōe kiám bô beh in-ūi án-ni lâi iô-choah, khiā-khí hit tiong-kan--ê, kiám bô beh pi-ai mah? Chit ê tōe beh chhin-chhiūⁿ Tōa-hô tiòng--khí-lâi; iā beh tín-tāng, thè-kē chhin-chhiūⁿ Ai-kı̍p hô.

(BCL) 此個地豈無欲因為按呢來搖泏？徛起彼中間者豈無欲悲哀嗎？此個地欲親像大河漲起來，也欲振動退低親像埃及河。

9

(THR) Chú Iâ-hô-hoa kóng, Kàu hit-jı̍t, Góa beh hō͘ jı̍t-thâu tī jı̍t-tiong-tàu chiū lo̍h--khì, hō͘ tōe tī tng-thâu-pe̍h-jı̍t piàn o͘-àm.

(BCL) 主耶和華講：到彼日，我欲互日頭佇日中晝就落去，互地佇當頭白日變黑暗。

10

(THR) Góa beh hō͘ lín ê choeh-kî piàn-chòe pi-ai, koa-khek lóng piàn-chòe ai-ko, beh hō͘ chèng-lâng io hâ môa-pò͘, thâu-khak bô pòaⁿ ki mn̂g; koh hō͘ i pi-ai chhin-chhiūⁿ sí ko͘-siⁿ ê kiáⁿ, kàu-bé chhin-chhiūⁿ thòng-khó͘ ê jı̍t chı̍t-iūⁿ.

(BCL) 我欲互恁的節期變做悲哀，歌曲攏變做哀歌。欲互眾人腰縖麻布，頭殼無半支毛，閣互伊悲哀親像死孤生的子，到尾親像痛苦的日一樣。

11

(THR) Chú Iâ-hô-hoa kóng, Khòaⁿ ah, jı̍t-chí beh kàu, Góa beh hō͘ ki-hng kàu tī chit só͘-chāi, ki-hng m̄-sī in-ūi bô piáⁿ, chhùi-ta m̄-sī ūi-tio̍h bô chúi, chiū-sī in-ūi bô thang thiaⁿ Iâ-hô-hoa ê ōe.

(BCL) 主耶和華講：看啊，日子欲到，我欲互飢荒到佇此所在。飢荒呣是因為無餅，嘴乾呣是為著無水，就是因為無通聽耶和華的話。

12

(THR) In beh sì-kòe khì, tùi chit ê hái kàu hit ê hái, tùi pak kàu tang; cháu-lâi cháu-khì, chhē-kiû Iâ-hô-hoa ê ōe, ia̍h chhē-bô.

(BCL) 欲四界去，對此個海到彼個海，對北到東，走來走去，尋求耶和華的話，亦尋無。

13

(THR) Tng hit-jı̍t, súi ê chāi-sek-lú kap siàu-liân ê ta-po͘-lâng beh in-ūi chhùi-ta lâi hūn-khì.

(BCL) 當彼日，娞的在室女及少年查甫人欲因為嘴乾來昏去。

14

(THR) Hiah ê kí Sat-má-lī-a ê chōe lâi chiù-chōa, koh kí Tàn o̍ah ê Siōng-tè lâi chiù-chōa; koh kí Pia̍t-sī-pa ê o̍ah-lō͘ lâi chiù-chōa--ê, in tek-khak po̍ah-tó, éng bōe koh khí--lâi.

(BCL) 許個指撒瑪利亞的罪來咒誓，閣指但活的上帝來咒誓；閣指別是巴的活路來咒誓者。的確跋倒，永閣起來。

Bible Color Mark

• 台語漢字羅馬本
• 巴克禮全羅