以弗所書 第 1 章

1

(THR) Tùi Siōng-tè ê chí-ì chòe Ki-tok Iâ-so͘ ê sù-tô͘, Pó-lô, phoe kià hō͘ tiàm Í-hut-só͘ chiah ê sèng-tô͘, tiong-sìn tī Ki-tok Iâ-so͘ ê;

(BCL) 對上帝的旨意，做基督耶穌的使徒保羅，批寄互以弗所諸個聖徒，忠信佇基督耶穌的。

2

(THR) . gōan lín tùi lán ê Pē Siōng-tè kap Chú Iâ-so͘ Ki-tok tit-tio̍h un-tián pêng-an.

(BCL) 願恁對咱的父上帝及主耶穌基督得著恩典、平安！

3

(THR) . Gōan lán ê Chú Iâ-so͘ Ki-tok ê Siōng-tè, iā sī I ê Pē, tit-tio̍h o-ló; I tī Ki-tok bat siúⁿ-sù lán tī thiⁿ-nı̍h ta̍k hāng sio̍k tī sîn ê hok-khì;

(BCL) 願咱的主耶穌基督的上帝也是伊的父得著謳咾！伊佇基督曾賞賜咱佇天裡逐項屬佇神的福氣：

4

(THR) . chiū-sī chiàu I chhòng-chō sè-kan ê tāi-seng tī Ki-tok kéng lán, hō͘ lán tī I ê bīn-chêng chiâⁿ-chòe sèng, bô thang hiâm;

(BCL) 就是照伊創造世間的代先，佇基督揀咱，互咱佇伊的面前成做聖，無通嫌；

5

(THR) . I chiàu I ê chí-ì só͘ hoaⁿ-hí ê, ēng jîn-ài tāi-seng tiāⁿ-tio̍h lán tùi Iâ-so͘ Ki-tok tit-tio̍h chòe kiáⁿ, lâi kui tī I,

(BCL) 伊照伊的旨意所歡喜的，用仁愛代先定著咱對耶穌基督得著做子來歸佇伊，

6

(THR) . hō͘ I un-tián ê êng-kng tit-tio̍h o-ló; chit ê un-tián chiū-sī I tī só͘ thiàⁿ ê Kiáⁿ siúⁿ-sù lán ê;

(BCL) 互伊恩典的榮光得著謳咾；此個恩典就是伊佇所疼的子賞賜咱的。

7

(THR) . tiàm-tī I lán tùi I ê huih tit-tio̍h sio̍k-hôe, sià-bián chōe-kòa, chiàu I un-tián ê pù-ū;

(BCL) 佇伊咱對伊的血得著贖回，赦免罪過，照伊恩典的富有。

8

(THR) . I chiong chit ê un-tián, ēng ta̍k iūⁿ ê tì-hūi kap kiàn-sek, siúⁿ-sù lán kàu móa-móa;

(BCL) 伊將此個恩典用逐樣的智慧及見識，賞賜咱到滿滿；

9

(THR) . í-keng hō͘ lán chai I chí-ì ê ò-biāu, chiàu I ê hó-ì, chiū-sī I tī pún-sin só͘ tāi-seng tiāⁿ-tio̍h ê,

(BCL) 已經互咱知伊旨意的奧妙，照伊的好意，

10

(THR) . beh tī chiah ê jı̍t-kî ôan-móa ê sî, siat-hoat hō͘ bān mı̍h, put-lūn tī thiⁿ-nı̍h ê tī tōe-nı̍h ê, lóng tī Ki-tok lâi ha̍p-it;

(BCL) 就是伊佇本身所代先定著的，欲佇諸個日期圓滿的時，設法互萬物不論佇天裡的、佇地裡的，攏佇基督來合一。

11

(THR) . tiàm-tī I lán iā chiâⁿ-chòe ke-gia̍p, chiū-sī tāi-seng siū tiāⁿ-tio̍h ê, chiàu hit ê thàn ka-kī ê chí-ì kiâⁿ bān-hāng-ū ê ê ì-sù,

(BCL) 佇伊咱也成做家業；就是代先受定著的，照彼個趁家己的旨意、行萬項有者的意思，

12

(THR) . beh hō͘ I ê êng-kng tùi góan tāi-seng ǹg-bāng tī Ki-tok ê lâng tit-tio̍h o-ló;

(BCL) 欲互伊的榮光對阮代先向望佇基督的人得著謳咾。

13

(THR) . tiàm-tī I lín iā í-keng thiaⁿ-kìⁿ chin-lí ê tō, kiù lín ê hok-im, kì-jiân sìn chiū tiàm-tī I ū siū só͘ èng-ún ê Sèng Sîn khàm-ìn,

(BCL) 佇伊恁也已經聽見真理的道，救恁的福音，既然信，就佇伊有受所應允的聖神蓋印。

14

(THR) . I chiū-sī chòe lán sêng-chiap gia̍p ê chún-tǹg, kàu Siōng-tè só͘ tit-tio̍h ê gia̍p sio̍k-hôe, hō͘ I ê êng-kng tit-tio̍h o-ló.

(BCL) 伊就是做咱承接業的準當，到上帝所得著的業贖回，互伊的榮光得著謳咾。

15

(THR) . In-ūi án-ni góa kì-jiân thiaⁿ-kìⁿ lín tiong-kan tī Chú Iâ-so͘ ê sìn, kap hián-chhut tī chèng sèng-tô͘ ê jîn-ài,

(BCL) 因為按呢，我既然聽見恁中間佇主耶穌的信，及顯出佇眾聖徒的仁愛，

16

(THR) . chiū ūi-tio̍h lín kám-siā bô soah, kî-tó ê sî siàu-liām lín;

(BCL) 就為著恁感謝無息。祈禱的時數念恁，

17

(THR) . kiû lán ê Chú Iâ-so͘ Ki-tok ê Siōng-tè, êng-kng ê Pē, siúⁿ-sù lín tì-hūi khé-sī ê Sîn, lâi chhim bat Siōng-tè;

(BCL) 求咱的主耶穌基督的上帝，榮光的父，賞賜恁智慧啟示的神，來深識上帝，

18

(THR) . lín ê sim-ba̍k tit-tio̍h kng-bêng, hō͘ lín chai I tiàu lâng só͘ ǹg-bāng ê sī cháiⁿ-iūⁿ, I ê gia̍p tī sèng-tô͘ tiong êng-kng ê pù-ū kàu cháiⁿ-iūⁿ,

(BCL) 恁的心目得著光明，互恁知伊召人所向望的是怎樣，伊的業佇聖徒中榮光的富有到怎樣；

19

(THR) . koh chai I ê kôan-lêng ǹg tī lán chiah ê sìn ê lâng tōa kàu cháiⁿ-iūⁿ,

(BCL) 閣知伊的權能向佇咱諸個信的人大到怎樣，

20

(THR) . chiàu I chêng só͘ bat kiâⁿ tī Ki-tok tōa kôan-lêng tōa khùi-la̍t ê kong-iōng, hō͘ I tùi sí-lâng tiong koh-o̍ah, tī thiⁿ-nı̍h chē I ê tōa pêng,

(BCL) 照伊前所曾行佇基督大權能大氣力的功用，互伊對死人中復活，佇天裡坐伊的大旁，

21

(THR) . pôaⁿ-kè lóng-chóng pān chèng-sū ê, chiáng-kôan ê, châi-lêng ê, tī-lí ê, kap it-chhè só͘ hō ê miâ, m̄ nā tī kim-sè iā tī lâi-sè, lóng pôaⁿ-kè hn̄g-hn̄g;

(BCL) 過攏總辦政事的、掌權的、才能的、治理的，及一切所號的名；呣若佇今世也佇來世，攏過遠遠。

22

(THR) . koh hō͘ bān-hāng-ū hâng-ho̍k tī I ê kha-ē, koh chiong I chòe kóan bān-ū ê thâu, lâi siúⁿ-sù kàu-hōe;

(BCL) 閣互萬項有降服佇伊的腳下，閣將伊做管萬有的頭來賞賜教會。

23

(THR) . kàu-hōe sī I ê seng-khu, I só͘ chhiong-móa ê; I iā sī ēng bān ū chhiong-móa bān ū ê.

(BCL) 教會是伊的身軀，伊所充滿的，伊也是用萬有充滿萬有的。

Bible Color Mark

• 台語漢字羅馬本
• 巴克禮全羅