以斯帖記 第 6 章

1

(THR) Hit-mî ông bōe-khùn-tit, kah lâng the̍h le̍k-sú ê chheh lâi; in chiū tī ông ê bīn-chêng tha̍k i.

(BCL) 彼暝王睏得，教人提歷史的冊來，就佇王的面前讀伊。

2

(THR) Tú-tio̍h chheh--nih ū siá kóng, Ông kò͘-mn̂g ê thài-kàm tiong ū nn̄g lâng, Phek-thàm kap Thê-lia̍t, kè-bô͘ beh hāi A-hap-sûi-ló͘ ông; Bo̍k-tí-kái pò-kò chit ê sū.

(BCL) 抵著冊裡有寫講：王顧門的太監中有二人，辟探及提列，計謀欲害亞哈隨魯王，末底改報告此個事。

3

(THR) Ông kóng, Ūi-tio̍h chit ê sū, ēng sím-mı̍h êng-kng chun-kùi siúⁿ-sù Bo̍k-tí-kái ah? Su-hāu ông ê jîn-sîn ìn kóng, Bô siúⁿ-sù i sím-mı̍h.

(BCL) 王講：「為著此個事，用甚麼榮光尊貴賞賜末底改啊？」伺候王的人臣應講：「無賞賜伊甚麼。」

4

(THR) Ông kóng, Chī-chūi tī īⁿ-lāi; hit-sî Hap-bān jı̍p ông-kiong ê gōa-īⁿ, beh kiû ông tiàu Bo̍k-tí-kái tī i só͘ kā i khiā ê chhâ-kè.

(BCL) 王講：「是誰佇院內？」（彼時哈曼入王宮的外院，欲求王吊末底改佇伊所給伊　的柴架。）

5

(THR) Ông ê jîn-sîn kā i kóng, Hap-bān khiā tī īⁿ-lāi. Ông kóng, Kah i jı̍p-lâi.

(BCL) 王的人臣給伊講：「哈曼徛佇院內。」王講：「教伊入來。」

6

(THR) Hap-bān chiū jı̍p-khì; ông mn̄g i kóng, Ông só͘ ài êng-kng i ê lâng, tio̍h cháiⁿ-iūⁿ khóan-thāi i? Hap-bān sim-lāi siūⁿ kóng, Ông só͘ ài êng-kng i ê lâng, chī-chūi ōe iâⁿ-kè góa?

(BCL) 哈曼就入去。王問伊講：「王所愛榮光伊的人，著怎樣款待伊？」哈曼心內想講：「王所愛榮光伊的人，是誰會贏過我？」

7

(THR) Hap-bān chiū ìn ông kóng, Ông só͘ ài êng-kng i ê lâng,

(BCL) 哈曼就應王講：「王所愛榮光伊的人，

8

(THR) tio̍h chiong ông só͘ chhēng ê ông-ho̍k, ông só͘ khiâ ê bé, thâu-khak-téng tì bián-liû ê;

(BCL) 著將王所穿的王服，王所騎的馬，頭殼頂戴冕旒的，

9

(THR) tio̍h chiong chit ê i-ho̍k kap bé kau tī ông chı̍t-ê ke̍k chun-kùi ê jîn-sîn ê chhiú, hō͘ in ēng hit niá saⁿ hō͘ ông só͘ ài êng-kng i ê lâng chhēng, koh hō͘ i khiâ-bé piàn-iû siâⁿ-lāi ê koe-lō͘, tī i ê thâu-chêng soan-pò͘ kóng, Ông só͘ ài êng-kng ê lâng, beh án-ni khóan-thāi i.

(BCL) 著將此個衣服及馬交佇王一個極尊貴的人臣的手，互用彼領衫互王所愛榮光伊的人穿，閣互伊騎馬，遍遊城內的街路佇伊的頭前宣佈講：王所愛榮光的人，欲按呢款待伊。」

10

(THR) Ông kā Hap-bān kóng, Lí kín-kín khì, chiong chit ê i-ho̍k kap bé, chiàu lí só͘ kóng ê, khóan-thāi hit ê chē tī ông ê mn̂g ê Iû-tāi lâng Bo̍k-tí-kái; kìⁿ-nā lí só͘ kóng-ê m̄-thang chió chı̍t-hāng.

(BCL) 王給哈曼講：「你緊緊去將此個衣服及馬，照你所講的，款待彼個坐佇王的門的猶大人末底改。見若你所講的，呣通少一項。」

11

(THR) Hap-bān chiū tòa i-ho̍k kap bé lâi, koh hō͘ Bo̍k-tí-kái chhēng i; iā hō͘ i khiâ-bé, piàn-iû tī siâⁿ-lāi ê koe-lō͘, tī i ê thâu-chêng soan-pò͘ kóng, Ông só͘ ài êng-kng i ê lâng, beh án-ni khóan-thāi i.

(BCL) 哈曼就帶衣服及馬來，閣互末底改穿伊，也互伊騎馬，遍遊佇城內的街路，佇伊的頭前宣佈講：「王所愛榮光伊的人，欲按呢款待伊。」

12

(THR) Bo̍k-tí-kái tò-lâi ông ê mn̂g. Hap-bān iu-būn, tà i ê thâu-khak, kín-kín tò--khì in chhù.

(BCL) 末底改倒來王的門，哈曼憂悶罩伊的頭殼，緊緊倒去厝，

13

(THR) Hap-bān chiong i it-chhè só͘ tú-tio̍h-ê lóng kā i ê bó͘ Sè-lī-su kap i hiah ê pêng-iú kóng; i hiah ê tì-sek ê lâng, kap i ê bó͘ Sè-lī-su, kā i kóng, Lí só͘ khí-thâu sit-pāi tī i bīn-chêng ê Bo̍k-tí-kái, i nā kó-jiân sī Iû-tāi ê chióng-cho̍k, lí tek-khak bōe iâⁿ i, beh tī i ê bīn-chêng sit-pāi kàu tóe.

(BCL) 哈曼將伊一切所抵著的攏給伊的某細利斯及伊許個朋友講。伊許個智識的人及伊的某細利斯給伊講：「你所起頭失敗佇伊面前的末底改，伊若果然是猶大的種族，你的確贏伊，欲佇伊的面前失敗到底。」

14

(THR) In iáu teh kap i kóng-ōe ê sî, ông ê thài-kàm lâi, kah Hap-bān kín-kín khì hù Í-su-thiap só͘ siat ê iân-sia̍h.

(BCL) 猶及伊講話的時，王的太監來教哈曼緊緊去赴以斯帖所設的筵席。

Bible Color Mark

• 台語漢字羅馬本
• 巴克禮全羅