出埃及記 第 17 章

1

(THR) Í-sek-lia̍t lâng chôan-hōe thàn Iâ-hô-hoa ê bēng-lēng, chiàu lō͘-chām, tùi Sìn ê khòng-iá, chìn-chêng kiâⁿ, tī Lī-hui-tèng chat-iâⁿ, peh-sìⁿ bô chúi thang lim.

(BCL) 以色列人全會趁耶和華的命令，照路站對汛的曠野進前行，佇利非訂紮營。百姓無水通飲，

2

(THR) Peh-sìⁿ chiū kap Mô͘-se kè-kàu kóng, Hō͘ góan ū chúi thang lim. Mô͘-se kā in kóng, Lín siáⁿ-sū kap góa kè-kàu, siáⁿ-sū chhì Iâ-hô-hoa ah?

(BCL) 百姓就及摩西計較，講：「互阮有水通飲！」摩西給講：「恁啥事及我計較？啥事試耶和華啊？」

3

(THR) Peh-sìⁿ tī-hia chin chhùi-ta, ài lim chúi; chiū ai-òan Mô͘-se kóng, Lí siáⁿ-sū chhōa góan tùi Ai-kı̍p chiūⁿ-lâi, hō͘ góan kap góan ê kiáⁿ-jî, góan ê cheng-siⁿ, lóng chhùi-ta sí ah?

(BCL) 百姓佇遐真嘴乾，愛飲水，就哀怨摩西，講：「你啥事導阮對埃及上來，互阮及阮的子兒，阮的精牲攏嘴乾死啊？」

4

(THR) Mô͘-se chiū kiû-kiò Iâ-hô-hoa kóng, Góa tùi chit-ê peh-sìⁿ beh cháiⁿ-iūⁿ chòe ah? in chha-put-to beh ēng chio̍h-thâu tìm góa.

(BCL) 摩西就求叫耶和華講：「我對此個百姓欲怎樣做啊？差不多欲用石頭擲我。」

5

(THR) Iâ-hô-hoa kā Mô͘-se kóng, Lí chòe peh-sìⁿ ê thâu-chêng kiâⁿ, chhōa Í-sek-lia̍t ê tiúⁿ-ló kúi-nā lâng kap lí khì, lí ê chhiú tio̍h kia̍h chêng-jı̍t phah hô-chúi ê kóaiⁿ-á.

(BCL) 耶和華給摩西講：「你做百姓的頭前行，，導以色列的長老幾若人及你去，你的手著抬前日拍河水的柺仔。

6

(THR) Khòaⁿ ah, Góa beh khiā tī lí ê bīn-chêng, tī Hô-lia̍t ê chio̍h-pôaⁿ-téng; lí phah hit-ê chio̍h-pôaⁿ, beh ū chúi tùi hia lâu-chhut hō͘ peh-sìⁿ lim. Mô͘-se chiū tī Í-sek-lia̍t tiúⁿ-ló ê bīn-chêng án-ni kiâⁿ.

(BCL) 看啊，我欲徛佇你的面前，佇何烈的石磐頂。你拍彼個石磐，欲有水對遐流出，互百姓飲。」摩西就佇以色列長老的面前按呢行。

7

(THR) I miâ hit-ê só͘-chāi kiò Má-sat, koh kiò-chòe Bí-lī-pa; in-ūi Í-sek-lia̍t lâng kè-kàu, koh in-ūi in chhì Iâ-hô-hoa, kóng, Iâ-hô-hoa tī góan tiong-kan á-bô?

(BCL) 伊名彼個所在叫瑪撒，閣叫做米利巴；因為以色列人計較，閣因為試耶和華，講：「耶和華佇阮中間抑無？」

8

(THR) Hit-sî A-má-le̍k lâng lâi kàu Lī-hui-tèng, kap Í-sek-lia̍t lâng kau-chiàn.

(BCL) 彼時，亞瑪力人來到利非訂，及以色列人交戰。

9

(THR) Mô͘-se kā Iok-su-a kóng, Lí thòe lán kéng lâng chhut-khì kap A-má-le̍k lâng kau-chiàn; bîn-á-jı̍t góa chhiú-nı̍h beh kia̍h Siōng-tè ê kóaiⁿ-á, khiā tī soaⁿ-téng.

(BCL) 摩西給約書亞講：「你替咱揀人出去，及亞瑪力人交戰。明仔日我手裡欲抬上帝的柺仔，徛佇山頂。」

10

(THR) Tùi hit-tia̍p Iok-su-a chiàu Mô͘-se só͘ kā i kóng-ê kiâⁿ; kap A-má-le̍k lâng kau-chiàn; Mô͘-se, A-lûn kap Hō͘-jíⁿ lóng chiūⁿ soaⁿ-téng.

(BCL) 對彼霎約書亞照摩西所給伊講的行，及亞瑪力人交戰。摩西、亞倫，及戶珥攏上山頂。

11

(THR) Mô͘-se chhiú kia̍h-khí ê sî, Í-sek-lia̍t lâng chiū khah-iâⁿ; chhiú sûi-lo̍h-khì ê sî, A-má-le̍k lâng chiū khah-iâⁿ.

(BCL) 摩西手抬起的時，以色列人就卡贏，手垂落去的時，亞瑪力人就卡贏。

12

(THR) Chóng-sī Mô͘-se chhiú sng; in chiū sóa chio̍h, lâi hē tī i ê ē-bīn; i chē tī chio̍h-téng, A-lûn kap Hō͘-jíⁿ hû i ê chhiú, chı̍t-ê tī chit-pêng, chı̍t-ê tī hit-pêng; i ê chhiú chiū chū-chāi, tı̍t-tı̍t kàu jı̍t-lo̍h.

(BCL) 總是摩西手酸，就徙石，來下佇伊的下面，伊坐佇石頂。亞倫及戶珥扶伊的手，一個佇此旁，一個佇彼旁，伊的手就自在，直直到日落。

13

(THR) Iok-su-a ēng to thâi A-má-le̍k ông kap i ê peh-sìⁿ.

(BCL) 約書亞用刀亞瑪力王及伊的百姓。

14

(THR) Iâ-hô-hoa kā Mô͘-se kóng, Góa beh chiong A-má-le̍k ê miâ-jī tùi thiⁿ-ē ôan-chôan chhat-bia̍t i; lí tio̍h ēng chit-ê siá tī chheh-nı̍h chòe kì-liām, koh kóng hō͘ Iok-su-a thiaⁿ.

(BCL) 耶和華給摩西講：「我欲將亞瑪力的名字對天下完全擦滅伊；你著用此個寫佇冊裡做紀念，閣講互約書亞聽。」

15

(THR) Mô͘-se khí chı̍t chō tôaⁿ, hō i ê miâ kiò Iâ-hô-hoa-nî-se;

(BCL) 摩西起一座壇，號伊的名叫「耶和華尼西」，

16

(THR) koh kóng, Iâ-hô-hoa í-keng chiù-chōa, Iâ-hô-hoa beh tāi-tāi kap A-má-le̍k lâng kau-chiàn.

(BCL) 閣講：「耶和華已經咒誓，耶和華欲代代及亞瑪力人交戰。」

Bible Color Mark

• 台語漢字羅馬本
• 巴克禮全羅