出埃及記 第 22 章

1

(THR) Lâng nā thau-khan gû, á-sī iûⁿ, bô-lūn thâi á-sī bōe, chı̍t chiah gû tio̍h pê i gō͘ chiah, chı̍t chiah iûⁿ tio̍h pê sì-chiah.

(BCL) 「人若偷牽牛抑是羊，無論，抑是賣，一隻牛著賠伊五隻，一隻羊著賠四隻。

2

(THR) Chha̍t nā iah-khang, hō͘ lâng tú-tio̍h, kā i phah-sí, chiū bô sǹg i ū phah-sí lâng ê chōe.

(BCL) 賊若挖孔互人抵著，給伊拍死，就無算伊有拍死人的罪。

3

(THR) Nā jı̍t-thâu í-keng chhut, chiū sǹg i ū phah-sí lâng ê chōe. Chha̍t tek-khak tio̍h pê; nā bô thang pê, chha̍t tio̍h bōe sin, lâi tí i só͘ thau-ê.

(BCL) 若日頭已經出，就算伊有拍死人的罪。賊的確著賠。若無通賠，賊著賣身，來抵伊所偷的。

4

(THR) Nā i só͘ thau-ê, kiám-chhái gû, á-sī lû, iûⁿ, iáu o̍ah tī i ê chhiú, chiū tio̍h pê têng-pē.

(BCL) 若伊所偷的，豈採牛，抑是驢、羊，猶活佇伊的手，就著賠重倍。

5

(THR) Lâng nā tī chhân-nı̍h, á-sī phû-tô-hn̂g, pàng cheng-siⁿ, chhut-chāi i chia̍h pa̍t-lâng ê chhân, chiū tio̍h ēng ka-kī ê chhân-nı̍h siōng hó-ê, kap phû-tô-hn̂g siōng hó-ê lâi pê-i.

(BCL) 「人若佇田裡抑是葡萄園放精牲，出在伊食別人的田，就著用家己的田裡上好的及葡萄園上好的來賠伊。

6

(THR) Nā hé sio chhì-phè, sòa sio-tio̍h tiū-tui, á-sī iáu-bē koah ê tiū, á-sī chhân-hn̂g, chiū khí-hé ê lâng tek-khak tio̍h pê.

(BCL) 「若火燒莿帕，續燒著稻堆，抑是猶未割的稻，抑是田園，就起火的人的確著賠。

7

(THR) Lâng nā chiong gûn á-sī mı̍h-kiāⁿ, kau-tài chhù-piⁿ kò͘-siú, chiah-ê mı̍h, nā tùi hit-lâng ê ke tio̍h chha̍t thau, chha̍t nā lia̍h-tio̍h, chha̍t tio̍h pê têng-pē;

(BCL) 「人若將銀抑是物件交代厝邊顧守，諸個物若對彼人的家著賊偷，賊若掠著，賊著賠重倍；

8

(THR) chha̍t nā lia̍h-bô-tio̍h, hit-ê ke-chú tio̍h kàu koaⁿ-hú bīn-chêng, khòaⁿ i ū the̍h chhù-piⁿ ê mı̍h-kiāⁿ á-bô.

(BCL) 賊若掠無著，彼個家主著到官府面前，看伊有提厝邊的物件抑無。

9

(THR) Kìⁿ-nā ū kè-sit, kiám-chhái sī ūi-tio̍h gû, lû, iûⁿ, á-sī ūi-tio̍h i-chiûⁿ á-sī sím-mı̍h sit-lo̍h ê mı̍h, ū lâng jīn-tit sī i-ê, siang-pêng ê àn-kiāⁿ tio̍h kàu koaⁿ-hú ê bīn-chêng; koaⁿ-hú nā tòan-tēng sím-mı̍h lâng ū chōe, hit-lâng tio̍h pê i ê chhù-piⁿ têng-pē.

(BCL) 「見若有過失，豈採是為著牛、驢、羊，抑是為著衣裳，抑是甚麼失落的物，有人認得是伊的，雙旁的案件著到官府的面前，官府若斷定甚麼人有罪，彼人著賠伊的厝邊重倍。

10

(THR) Lâng nā chiong lû, á-sī gû, á-sī iûⁿ, á-sī pa̍t-hō cheng-siⁿ, kau-tài chhù-piⁿ kò͘-siú, cheng-siⁿ kiám-chhái sí, á-sī siū-siong, á-sī hō͘ lâng khan-khì, bô lâng khòaⁿ-kìⁿ;

(BCL) 「人若將驢，抑是牛，抑是羊，抑是別號精牲，交代厝邊顧守，精牲豈採死，抑是受傷，抑是互人牽去，無人看見，

11

(THR) nn̄g-lâng ê tiong-kan, tio̍h kí Iâ-hô-hoa chiù-chōa, m̄-bat the̍h chhù-piⁿ ê mı̍h, gôan-chú chiū tio̍h soah, kò͘-siú ê lâng m̄-bián pê.

(BCL) 二人的中間著指耶和華咒誓，呣曾提厝邊的物，原主就著息，顧守的人呣免賠。

12

(THR) Cheng-siⁿ nā tùi kò͘-siú ê lâng hia hō͘ lâng thau-khì, i chiū tio̍h pê gôan-chú.

(BCL) 精牲若對顧守的人遐互人偷去，伊就著賠原主；

13

(THR) Nā siū iá-siù thiah-chhùi, kò͘-siú ê lâng tio̍h tòa i lâi chòe chèng-kù; só͘ thiah-chhùi-ê chiū m̄-bián pê.

(BCL) 若受野獸拆碎，顧守的人著帶伊來做證據，所拆碎的就呣免賠。

14

(THR) Lâng nā tùi chhù-piⁿ chioh sím-mı̍h mı̍h, só͘ chioh-ê kiám-chhái siū-siong á-sī sí, gôan-chú bô saⁿ-kap tī-teh, i tek-khak tio̍h pê.

(BCL) 「人若對厝邊借甚麼物，所借的豈採受傷，抑是死，原主無相及佇，伊的確著賠；

15

(THR) Nā gôan-chú saⁿ-kap tī-teh, i chiū m̄-bián pê; nā sī cho͘-ê, iā m̄-bián pê, in-ūi pún ū cho͘-chîⁿ.

(BCL) 若原主相及佇，伊就呣免賠；若是租的，也呣免賠，因為本有租錢。」

16

(THR) Lâng nā ín-iú bē siū phèng ê cha-bó͘-gín-ná kap i tâng-pâng, i tio̍h phèng i chòe-bó͘.

(BCL) 「人若引誘未受聘的查某囝仔，及伊同房，伊著聘伊做某。

17

(THR) Nā i ê lāu-pē koat-tòan m̄-khéng chiong cha-bó͘-kiáⁿ phòe-i, i chiū tio̍h chiàu chāi-sek-lú ê phèng-lé, hō͘ i gûn.

(BCL) 若伊的老父決斷呣肯將查某子配伊，伊就著照在室女的聘禮，互伊銀。

18

(THR) Chòe ang-î-ê, tio̍h hō͘ i sí.

(BCL) 「做尪姨者，著互伊死。

19

(THR) Kìⁿ-nā kap siù îm-ê, tek-khak tio̍h hō͘ i sí.

(BCL) 「見若及獸淫者，的確著互伊死。

20

(THR) Bô choan-choan chè-sū Iâ-hô-hoa, lâi chè-sū pa̍t ê siōng-tè-ê, tio̍h bia̍t-i.

(BCL) 「無專專祭祀耶和華，來祭祀別個上帝者，著滅伊。

21

(THR) M̄-thang khi-hū chhut-gōa lâng, iā m̄-thang ap-chè i; in-ūi lín tī Ai-kı̍p tōe iā bat chòe chhut-gōa lâng.

(BCL) 「呣通欺負出外人，也呣通壓制伊，因為恁佇埃及地也曾做出外人。

22

(THR) M̄-thang pháiⁿ khóan-thāi kóaⁿ-hū kap ko͘-jî.

(BCL) 呣通歹款待寡婦及孤兒；

23

(THR) Nā sió-khóa pháiⁿ khóan-thāi-in, in kiû-kiò Góa, Góa tek-khak beh thiaⁿ in ê kiû-kiò.

(BCL) 若小可歹款待，求叫我，我的確欲聽的求叫，

24

(THR) Iā beh tōa siū-khì, ēng to thâi-lín; hō͘ lín ê bó͘ chòe kóaⁿ-hū, lín ê kiáⁿ chòe ko͘-jî.

(BCL) 也欲大受氣，用刀恁，互恁的某做寡婦，恁的子做孤兒。

25

(THR) Góa ê peh-sìⁿ-tiong ū sòng-hiong lâng kap lín khiā-khí, lí nā chioh i gûn, lí m̄-thang chhin-chhiūⁿ chè-chú khóan-thāi i, iā m̄-thang the̍h i ê lī-sek.

(BCL) 「我的百姓中有喪鄉人及恁徛起，你若借伊銀，你呣通親像債主款待伊，也呣通提伊的利息。

26

(THR) Lí nā the̍h chhù-piⁿ ê i-chiûⁿ chòe chún-tǹg, jı̍t-lo̍h chiū tio̍h hêng-i;

(BCL) 你若提厝邊的衣裳做準當，日落就著還伊；

27

(THR) i chí-ū chit-kiāⁿ thang kah, sī i jia seng-khu ê saⁿ; nā bô, i beh cháiⁿ-iūⁿ khùn? i kiû-Góa, Góa beh thiaⁿ, in-ūi Góa sī chû-pi-ê.

(BCL) 伊只有此件通蓋，是伊遮身軀的衫，若無，伊欲怎樣睏？伊求我，我欲聽，因為我是慈悲者。

28

(THR) M̄-thang húi-pòng koaⁿ-hú; iā m̄-thang mē lí ê peh-sìⁿ ê sī-tōa.

(BCL) 「呣通誹謗官府，也呣通罵你的百姓的序大。

29

(THR) Lí tio̍h tùi só͘ siu-sêng ê gō͘-kak, kap chiú-khut-lāi só͘ lâu-chhut ê chiú, the̍h-lâi hiàn, m̄-thang iân-chhiân.

(BCL) 「你著對所收成的五穀及酒窟內所流出的酒提來獻，呣通延延。

30

(THR) Lí tio̍h chiong thâu-chiūⁿ ê kiáⁿ kui tī Góa; lí ê gû, lí ê iûⁿ, iā tio̍h án-ni; chhit-jı̍t thang tè i ê bú, tī poeh-jı̍t tio̍h kui tī Góa.

(BCL) 「你著將頭上的子歸佇我。你的牛你的羊，也著按呢；七日通隨伊的母，第八日著歸佇我。

31

(THR) Lín tio̍h ūi-tio̍h Góa chòe sèng ê peh-sìⁿ; só͘-í chhân-nı̍h iá-siù só͘ thiah-lı̍h ê bah, lín m̄-thang chia̍h, tio̍h hiat hō͘ káu.

(BCL) 「恁著為著我做聖的百姓。所以，田裡野獸所拆裂的肉，恁呣通食，著互狗。」

Bible Color Mark

• 台語漢字羅馬本
• 巴克禮全羅