出埃及記 第 36 章

1

(THR) Pí-sat-lia̍t kap A-hô-lī-a-pek, kap lóng-chóng sim ū tì-hūi ê lâng, chiū-sī tit-tio̍h Iâ-hô-hoa siúⁿ-sù tì-hūi chhang-miâ hō͘ in chai chòe sèng-só͘ ta̍k-iūⁿ lō͘-ēng ê kang-ê, lóng tio̍h chiàu Iâ-hô-hoa só͘ hoan-hù-ê chòe kang.

(BCL) 比撒列及亞何利亞伯，及攏總心有智慧的人，就是得著耶和華賞賜智慧聰明、互知做聖所逐樣路用的工的，攏著照耶和華所吩咐的做工。」

2

(THR) Mô͘-se tiàu Pí-sat-lia̍t, A-hô-lī-a-pek, kap kìⁿ-nā sim ū tì-hūi ê lâng lâi, chiū-sī Iâ-hô-hoa ēng tì-hūi siúⁿ-sù in ê sim, sim siū kám-tōng lâi chòe-kang-ê.

(BCL) 摩西召比撒列、亞何利亞伯及見若心有智慧的人來，就是耶和華用智慧賞賜的心，心受感動來做工者。

3

(THR) In tùi Mô͘-se the̍h it-chhè ê lé-mı̍h, chiū-sī Í-sek-lia̍t lâng ūi-tio̍h chòe sèng-só͘ kap lāi-bīn só͘ ēng ê mı̍h the̍h-lâi-ê. Peh-sìⁿ ta̍k chá-khí iû-gôan ēng kam-sim hiàn ê lé-mı̍h the̍h-lâi hō͘-i.

(BCL) 對摩西提一切的禮物，就是以色列人為著做聖所及內面所用的物提來的。百姓逐早起猶原用甘心獻的禮物提來互伊。

4

(THR) Kìⁿ-nā chòe sèng-só͘ ê kang chiah-ê ū tì-hūi ê lâng, lóng chiām-thêng in só͘ chòe ê kang;

(BCL) 見若做聖所的工諸個有智慧的人攏暫停所做的工，

5

(THR) lâi tùi Mô͘-se kóng, Peh-sìⁿ só͘ the̍h-lâi-ê, pí Iâ-hô-hoa bēng-lēng chòe ê kang só͘ tio̍h ēng ê liāu, kè-gia̍h ū chhun.

(BCL) 來對摩西講：「百姓所提來的比耶和華命令做的工所著用的料，過額有剩。」

6

(THR) Mô͘-se chhut-bēng, in chiū soan-pò͘ tī chôan-iâⁿ, kóng, Bô-lūn lâm-lú bo̍h-tit koh chòe sím-mı̍h lâi, hiàn hō͘ sèng-só͘; tùi án-ni chó͘-chí peh-sìⁿ bô koh the̍h-lâi.

(BCL) 摩西出命，就宣佈佇全營講：「無論男女，莫得閣做甚麼來獻互聖所。」對按呢阻止百姓無閣提來。

7

(THR) In-ūi in só͘ ū ê chhâi-liāu, kàu-gia̍h thang chòe it-chhè só͘ tio̍h chòe chiah-ê kang, soah ū chhun.

(BCL) 因為所有的材料夠額通做一切所著做諸個工，續有剩。

8

(THR) In tiong-kan kìⁿ-nā sim ū tì-hūi chòe-kang-ê, ēng cha̍p-pak ê tiùⁿ chòe hōe-bō͘; chiah-ê tiùⁿ sī ēng kè-pháng ê iù-tōe, kap lâm-sek, chí-sek, chu-âng-sek ê liāu; iā ēng kî-khiáu ê kang chit-chiâⁿ ki-lō͘-peng chòe-i.

(BCL) 中間，見若心有智慧做工者，用十幅的帳做會幕。諸個帳是用過紡的幼苧及藍色、紫色、朱紅色的料，也用奇巧的工織成兵做伊。

9

(THR) Múi pak tiùⁿ tn̂g jī-cha̍p-poeh tiú, khoah sì-tiú; tiùⁿ lóng sī chı̍t-iūⁿ ê chhùn-chhioh.

(BCL) 每幅帳長二十八肘，闊四肘，帳攏是一樣的寸尺。

10

(THR) Chit gō͘ pak tiùⁿ, i chhòng hō͘ in ta̍k pak saⁿ-liân; hit gō͘ pak tiùⁿ iā ta̍k-pak saⁿ-liân.

(BCL) 此五幅帳伊創互逐幅相連，彼五幅帳也逐幅相連；

11

(THR) Tī chit-ê saⁿ-liân ê tiùⁿ, lō͘-bé pak ê piⁿ-á chòe lâm-sek ê liú-phàn; tī hit-ê saⁿ-liân ê tiùⁿ, lō͘-bé pak ê piⁿ-á iā án-ni chòe.

(BCL) 佇此個相連的帳路尾幅的邊仔做藍色的紐襻，佇彼個相連的帳路尾幅的邊仔也按呢做；

12

(THR) I tī chit niá tiùⁿ chòe gō͘-cha̍p ê liú-phàn, koh tī tē-jī niá tiùⁿ saⁿ-liân ê piⁿ-á, iā chòe gō͘-cha̍p ê liú-phàn; liú-phàn lóng nn̄g-ê nn̄g-ê saⁿ-tùi.

(BCL) 伊佇此領帳做五十個紐襻，閣佇第二領帳相連的邊仔也做五十個紐襻，紐襻攏二個二個相對；

13

(THR) Koh chòe gō͘-cha̍p ê kim-kau, ēng i lâi kau hō͘ tiùⁿ saⁿ-liân; chiū chiâⁿ-chòe chı̍t ê hōe-bō͘.

(BCL) 閣做五十個金，用伊來互帳相連。就成做一個會幕。

14

(THR) I koh ēng soaⁿ-iûⁿ-mn̂g chit cha̍p-it pak ê tiùⁿ, chòe hōe-bō͘-téng ê pò͘-pîⁿ;

(BCL) 伊閣用山羊毛織十一幅的帳，做會幕頂的布棚。

15

(THR) múi-pak tiùⁿ tn̂g saⁿ-cha̍p tiú, khoah sì-tiú; cha̍p-it pak tiùⁿ lóng chı̍t-iūⁿ ê chhùn-chhioh.

(BCL) 每幅帳長三十肘，闊四肘；十一幅帳攏一樣的寸尺。

16

(THR) Chiong gō͘ pak tiùⁿ liân-chòe chı̍t-pak, koh chiong la̍k pak tiùⁿ liân-chòe chı̍t-pak.

(BCL) 將五幅帳連做一幅，閣將六幅帳連做一幅；

17

(THR) Tī chit-ê saⁿ-liân ê tiùⁿ lō͘-bé pak ê piⁿ-á, i chòe gō͘-cha̍p ê liú-phàn, tī hit-ê saⁿ-liân lō͘-bé pak ê piⁿ-á iā chòe gō͘-cha̍p ê liú-phàn.

(BCL) 佇此個相連的帳路尾幅的邊仔，伊做五十個紐襻，佇彼個相連路尾幅的邊仔也做五十個紐襻；

18

(THR) I koh chòe gō͘-cha̍p ê tâng-kau, hō͘ pò͘-pîⁿ liân-chòe chı̍t-ê.

(BCL) 伊閣做五十個銅，互布棚連做一個；

19

(THR) Koh ēng ní-âng ê iûⁿ-phê chòe pò͘-pîⁿ ê kòa; koh ēng hái-káu-phê kòa tī téng-bīn.

(BCL) 閣用染紅的羊皮做布棚的蓋，閣用海狗皮掛佇頂面。

20

(THR) I ēng chō-kiap-chhâ chòe hōe-bō͘ khiā ê pán.

(BCL) 伊用皂莢柴做會幕豎的板。

21

(THR) Khiā ê pán tn̂g cha̍p-tiú, khoah chı̍t-tiú-pòaⁿ.

(BCL) 豎的板長十肘，闊一肘半；

22

(THR) Ta̍k tè pán ū nn̄g ê sún saⁿ-pâi; hōe-bō͘ it-chhè ê pán lóng chiàu án-ni chòe.

(BCL) 逐塊板有二個榫相排。會幕一切的板攏照按呢做。

23

(THR) I chòe hōe-bō͘ ê pán, lâm-pêng ê lâm-sì jī-cha̍p tè pán;

(BCL) 伊做會幕的板，南旁的南勢二十塊板。

24

(THR) tī chiah-ê jī-cha̍p tè pán ê ē-bīn chòe sì-cha̍p ê gûn-khū; chı̍t tè pán ê ē-bīn ū nn̄g ê khū lâi chhēng i nn̄g ki sún; koh chı̍t tè pán ê ē-bīn iā ū nn̄g ê khū lâi chhēng i nn̄g ki sún.

(BCL) 佇諸個二十塊板的下面做四十個銀臼：一塊板的下面有二個臼來穿伊二支榫，閣一塊板的下面也有二個臼來穿伊二支榫。

25

(THR) Hōe-bō͘ tē-jī bīn, chiū-sī pak-bīn, iā chòe pán jī-cha̍p-tè,

(BCL) 會幕第二面，就是北面，也做板二十塊，

26

(THR) kap in ê gûn-khū sì-cha̍p-ê; chit-ê pán ê ē-bīn ū nn̄g ê khū, hit-ê pán ê ē-bīn iā ū nn̄g ê khū.

(BCL) 及的銀臼四十個：此個板的下面有二個臼，彼個板的下面也有二個臼。

27

(THR) Hōe-bō͘ ê āu-bīn, chiū-sī sai-bīn, iā chòe la̍k tè pán.

(BCL) 會幕的後面，就是西面，也做六塊板。

28

(THR) Hōe-bō͘ āu-bīn ê nn̄g ê kak-thâu, chòe nn̄g tè pán.

(BCL) 會幕後面的二個角頭做二塊板。

29

(THR) Pán ê ē-tn̂g, nn̄g-ê saⁿ-tâng, tı̍t-kàu téng-bīn tē-it ê khôan lóng sī ka-nn̂g-ê; nn̄g ê kak-thâu ê pán lóng sī án-ni chòe.

(BCL) 板的下長，二個相同，直到頂面第一個環攏是完整的；二個角頭的板攏是按呢做。

30

(THR) Ū poeh ê pán, kap cha̍p-la̍k ê gûn-khū; ta̍k tè pán ê ē-bīn ū nn̄g ê khū.

(BCL) 有八個板及十六個銀臼，逐塊板的下面有二個臼。

31

(THR) I ēng chō-kiap-chhâ chòe hôaiⁿ-kông; ūi-tio̍h hōe-bō͘ chit-pêng ê pán chòe gō͘-ki,

(BCL) 伊用皂莢柴做橫楗：為著會幕此旁的板做五支，

32

(THR) ūi-tio̍h hōe-bō͘ hit-pêng ê pán chòe gō͘-ki; koh ūi-tio̍h hōe-bō͘-āu sai-bīn ê pán chòe gō͘-ki.

(BCL) 為著會幕彼旁的板做五支，閣為著會幕後西面的板做五支，

33

(THR) Pán ê tùi-tiong hit ki hôaiⁿ-kông, hō͘ i tùi chit-thâu kàu hit-thâu.

(BCL) 板的對中彼支橫楗互伊對此頭到彼頭。

34

(THR) Pán ēng kim pau; koh chòe pán ê kim-khôan lâi thò kông; kông iā ēng kim pau.

(BCL) 板用金包，閣做板的金環來套楗；楗也用金包。

35

(THR) Koh ēng lâm-sek, chí-sek, chu-âng-sek ê liāu, kap kè-pháng ê iù-tōe chit tiùⁿ-lî; chit-ê tiùⁿ-lî ēng kî-khiáu ê kang chit-chiâⁿ ki-lō͘-peng lâi chòe-ê.

(BCL) 閣用藍色、紫色、朱紅色的料，及過紡的幼苧織帳簾，此個帳簾用奇巧的工織成兵來做的。

36

(THR) Koh ēng chō-kiap-chhâ ūi-tio̍h i chòe sì ki thiāu, ēng kim pau i; in ê kau sī kim-ê; koh ūi-tio̍h in chù sì ê gûn-khū.

(BCL) 閣用皂莢柴為著伊做四支柱，用金包伊，的是金的，閣為著鑄四個銀臼。

37

(THR) Ēng lâm-sek, chí-sek, chu-âng-sek ê liāu, kap kè-pháng ê iù-tōe, ēng siù-hoe ê kang chòe pò͘-pîⁿ mn̂g ê mn̂g-lî,

(BCL) 用藍色、紫色、朱紅色的料，及過紡的幼苧，用　花的工做布棚門的門簾；及伊五支柱，

38

(THR) kap i gō͘ ki thiāu, kap in ê kau; in ê thiāu-táu kap hôaiⁿ-koaiⁿ ēng kim pau i; hit gō͘ ê khū sī tâng-ê.

(BCL) 及的，的柱枓及橫杆用金包伊，彼五個臼是銅的。

Bible Color Mark

• 台語漢字羅馬本
• 巴克禮全羅