出埃及記 第 37 章

1

(THR) Pí-sat-lia̍t ēng chō-kiap-chhâ chòe kūi, tn̂g nn̄g-tiú-pòaⁿ, khoah tiú-pòaⁿ, kôaiⁿ tiú-pòaⁿ;

(BCL) 比撒列用皂莢柴做櫃，長二肘半，闊肘半，高肘半。

2

(THR) lāi-gōa ēng hó-kim pau i, sì-ûi khí kim-sòaⁿ,

(BCL) 內外用好金包伊，四圍齒金線，

3

(THR) tī i ê sì-kha kā i chù sì ê kim-khôan; chit-pêng nn̄g khôan, hit-pêng nn̄g khôan.

(BCL) 佇伊的四腳給伊鑄四個金環：此旁二環，彼旁二環。

4

(THR) Ēng chō-kiap-chhâ chòe nn̄g ki kǹg, ēng kim pau i.

(BCL) 用皂莢柴做二支槓，用金包伊。

5

(THR) Chiong kǹg chhng tī kūi-piⁿ ê khôan-lāi, thang kng kūi.

(BCL) 將槓串佇櫃邊的環內，通扛櫃。

6

(THR) Ēng hó-kim chòe si-un-só͘, tn̂g nn̄g-tiú-pòaⁿ, khoah tiú-pòaⁿ.

(BCL) 用好金做施恩所，長二肘半，闊肘半。

7

(THR) Ēng kim chòe nn̄g ê ki-lō͘-peng; ēng chhia ê hoat chòe i, tī si-un-só͘ ê siang-thâu;

(BCL) 用金做二個兵，用捙的法做伊，佇施恩所的雙頭，

8

(THR) chit-thâu chı̍t ê ki-lō͘-peng, hit-thâu chı̍t ê ki-lō͘-peng; nn̄g ê ki-lō͘-peng tī si-un-só͘ ê siang-thâu kap i liân-chòe chı̍t-tè.

(BCL) 此頭一個兵，彼頭一個兵，二個兵佇施恩所的雙頭，及伊連做一塊。

9

(THR) Nn̄g ê ki-lō͘-peng kôaiⁿ-kôaiⁿ thí-khui sı̍t, ēng in ê sı̍t jia si-un-só͘, in ê bīn saⁿ-tùi; ki-lō͘-peng ê bīn àⁿ si-un-só͘.

(BCL) 二個兵高高展開翅，用的翅遮施恩所；的面相對；兵的面俯施恩所。

10

(THR) I ēng chō-kiap-chhâ chòe toh, tn̂g nn̄g-tiú, khoah chı̍t-tiú, kôaiⁿ tiú-pòaⁿ;

(BCL) 伊用皂莢柴做桌，長二肘，闊一肘，高肘半，

11

(THR) ēng hó-kim pau i, sì-ûi kā i khí kim-sòaⁿ.

(BCL) 用好金包伊，四圍給伊齒金線。

12

(THR) Toh ê sì-ûi kok chòe chı̍t pa-chiúⁿ khoah ê hôaiⁿ-niû; hôaiⁿ-niû-téng sì-ûi khí kim-sòaⁿ.

(BCL) 桌的四圍各做一巴掌闊的橫樑，橫樑頂四圍齒金線，

13

(THR) Kā i chù sì ê kim-khôan, an tī i ê sì-kha ê sì-kak.

(BCL) 給伊鑄四個金環，安佇伊的四腳的四角。

14

(THR) An khôan ê só͘-chāi óa-kūn hôaiⁿ-niû, thang chhng-kǹg lâi kng toh.

(BCL) 安環的所在倚近橫樑，通串槓來扛桌。

15

(THR) Ēng chō-kiap-chhâ chòe nn̄g ki kǹg, ēng kim pau i, thang kng toh.

(BCL) 用皂莢柴做二支槓，用金包伊，通扛桌；

16

(THR) Iā chòe toh-téng ê khì-kū, i ê pôaⁿ, óaⁿ, pân, poe, thang lâi kòan-tiān, lóng ēng hó-kim chòe.

(BCL) 也做桌頂的器具，伊的盤、碗、瓶、杯通來灌奠，攏用好金做。

17

(THR) I ēng hó-kim chòe teng-tâi; teng-tâi ê chō kap tiong-thiāu, i ê poe, i ê ba̍k, i ê hoe, lóng ēng phah ê hoat, chòe kui-chō;

(BCL) 伊用好金做燈台；燈台的座及中柱，伊的杯，伊的木，伊的花，攏用拍的法做歸座。

18

(THR) i ê piⁿ-á pun-chhut la̍k-ki; teng-tâi ê chit-pêng ū saⁿ-ki, teng-tâi ê hit-pêng ū saⁿ-ki;

(BCL) 伊的邊仔分出六枝：燈台的此旁有三枝，燈台的彼旁有三枝；

19

(THR) chit-pêng múi-ki ū saⁿ ê poe, khóan-sit chhin-chhiūⁿ hēng-hoe, ū ba̍k ū hoe; hit-pêng múi-ki iā ū saⁿ ê poe, khóan-sit chhin-chhiūⁿ hēng-hoe, ū ba̍k ū hoe; tùi teng-tâi pun-chhut ê la̍k-ki lóng sī án-ni.

(BCL) 此旁每枝有三個杯，款式親像杏花，有木有花；彼旁每枝也有三個杯，款式親像杏花，有木有花。對燈台分出的六枝攏是按呢。

20

(THR) Teng-tâi thiāu ū sì ê poe, khóan-sit chhin-chhiūⁿ hēng-hoe, ū i ê ba̍k, kap i ê hoe.

(BCL) 燈台柱有四個杯，款式親像杏花，有伊的木及伊的花。

21

(THR) Nn̄g-ki ê ē-bīn ū chı̍t-ba̍k kap i saⁿ-liân; koh nn̄g-ki ê ē-bīn ū chı̍t-ba̍k kap i saⁿ-liân; koh nn̄g-ki ê ē-bīn ū chı̍t-ba̍k kap i saⁿ-liân; teng-tâi só͘ chhut ê la̍k-ki lóng sī án-ni.

(BCL) 二枝的下面有一木及伊相連，閣二枝的下面有一木及伊相連，閣二枝的下面有一木及伊相連；燈台所出的六枝攏是按呢。

22

(THR) Hiah-ê ba̍k kap hiah-ê ki lóng kap i liân-chòe chı̍t-ê; lóng ēng hó-kim, chiàu phah ê hoat chòe.

(BCL) 許個木及許個枝攏及伊連做一個，攏用好金照拍的法做。

23

(THR) Iā kā i chòe chhit-ê teng-chóaⁿ, kap i ê chián, kap i ê pôaⁿ, lóng ēng hó-kim chòe ê.

(BCL) 也給伊做七個燈盞，及伊的剪及伊的盤攏用好金做的。

24

(THR) Chòe teng-tâi kap it-chhè ê khì-kū ēng hó-kim chı̍t tha-liân-tek.

(BCL) 做燈台及一切的器具用好金一他連得。

25

(THR) I ēng chō-kiap-chhâ chòe hiuⁿ-tôaⁿ, tn̂g chı̍t-tiú, khoah chı̍t-tiú, khóan-sit sù-hong-ê; kôaiⁿ nn̄g-tiú; i hiah-ê kak kap tôaⁿ liân-chòe chı̍t-tè.

(BCL) 伊用皂莢柴做香壇，長一肘，闊一肘，款式四方的，高二肘，伊許個角及壇連做一塊；

26

(THR) Tôaⁿ kap i ê téng-bīn, kap i ê sì-ûi, kap i hiah-ê kak, lóng ēng hó-kim pau i, iā tī i ê sì-ûi khí kim-sòaⁿ.

(BCL) 壇及伊的頂面及伊的四圍及伊許個角攏用好金包伊，也佇伊的四圍齒金線。

27

(THR) Koh kā i chòe nn̄g ê kim-khôan, an tī khí-sòaⁿ ê ē-bīn, tī tôaⁿ ê siang-pêng nn̄g ki hôaiⁿ-koaiⁿ ê téng-bīn; chiah-ê khôan sī chòe chhng-kǹg ê lō͘-ēng, thang kng tôaⁿ.

(BCL) 閣給伊做二個金環，安佇齒線的下面，佇壇的雙旁、二支橫杆的頂面，諸個環是做串槓的路用，通扛壇。

28

(THR) Ēng chō-kiap-chhâ chòe kǹg, ēng kim pau in.

(BCL) 用皂莢柴做槓，用金包。

29

(THR) Koh chiàu chòe phang-bī ê hoat chòe thang boah ê sèng-iû, kap phang-liāu chheng-kiat ê hiuⁿ.

(BCL) 閣照做芳味的法做通抹的聖油及芳料清潔的香。

Bible Color Mark

• 台語漢字羅馬本
• 巴克禮全羅