出埃及記 第 40 章

1

(THR) Iâ-hô-hoa hoan-hù Mô͘-se kóng,

(BCL) 耶和華吩咐摩西講：

2

(THR) Chiaⁿ-ge̍h chhoe-it, lí tio̍h khí chū-chı̍p ê hōe-bō͘.

(BCL) 「正月初一，你著起聚集的會幕，

3

(THR) Lí tio̍h hē hoat-kūi tī hit lāi-bīn, ēng tiùⁿ-lî jia-cha̍h-i.

(BCL) 你著下法櫃佇彼內面，用帳簾遮截伊。

4

(THR) Kng toh jı̍p-khì, pâi-siat téng-bīn ê mı̍h; kng teng-tâi jı̍p-khì, tiám i ê teng.

(BCL) 扛桌入去，排設頂面的物。扛燈台入去，點伊的燈。

5

(THR) Kng sio-hiuⁿ ê kim-tôaⁿ, hē tī hoat-kūi-chêng, kòa hōe-bō͘ mn̂g ê mn̂g-lî.

(BCL) 扛燒香的金壇下佇法櫃前，掛會幕門的門簾。

6

(THR) Chiong sio-chè ê tôaⁿ, hē tī chū-chı̍p ê hōe-bō͘ mn̂g-chêng.

(BCL) 將燒祭的壇下佇聚集的會幕門前。

7

(THR) Chiong sóe-tn̄g ê phûn, hē tī hōe-bō͘ kap tôaⁿ ê tiong-kan, tóe chúi tī phûn-lāi.

(BCL) 將洗盪的盆下佇會幕及壇的中間，貯水佇盆內。

8

(THR) Koh tī sì-ûi khiā tiûⁿ-ûi, kòa tiûⁿ-mn̂g ê mn̂g-lî.

(BCL) 閣佇四圍　場帷，掛場門的門簾。

9

(THR) Ēng boah ê iû boah hōe-bō͘, kap kî-tiong hōan só͘-ū-ê, hun-piat i kap lóng-chóng ê khì-kū chòe-sèng; i chiū chòe-sèng.

(BCL) 用抹的油抹會幕及其中凡所有的，分別伊及攏總的器具做聖，伊就做聖。

10

(THR) Koh boah sio-chè ê tôaⁿ, kap i lóng-chóng ê khì-kū, hun-piat tôaⁿ chòe-sèng; tôaⁿ chiū chòe chì-sèng.

(BCL) 閣抹燒祭的壇及伊攏總的器具，分別壇做聖，壇就做至聖。

11

(THR) Iā tio̍h boah sóe-tn̄g ê phûn, hun-piat i chòe-sèng.

(BCL) 也著抹洗盪的盆，分別伊做聖。

12

(THR) Koh tio̍h chhōa A-lûn kap i hiah-ê kiáⁿ, kàu hōe-bō͘ mn̂g-chêng, ēng chúi kā in sóe.

(BCL) 閣著導亞倫及伊許個子到會幕門前，用水給洗。

13

(THR) Iā kā A-lûn chhēng sèng-saⁿ, koh ēng iû boah i, hun-piat i chòe-sèng, hō͘ i chòe chè-si lâi ho̍k-sāi Góa.

(BCL) 也給亞倫穿聖衫，閣用油抹伊，分別伊做聖，互伊做祭司來服事我；

14

(THR) Koh chhōa i hiah-ê kiáⁿ lâi, kā in chhēng lāi-phàu.

(BCL) 閣導伊許個子來，給穿內袍。

15

(THR) Tio̍h kā in boah-iû, chhin-chhiūⁿ boah in lāu-pē chı̍t-iūⁿ, hō͘ in chòe chè-si lâi ho̍k-sāi Góa; in siū boah-iû beh éng-óan chòe chè-si, kàu ta̍k sè-tāi.

(BCL) 著給抹油親像抹老父一樣，互做祭司來服事我。受抹油欲永遠做祭司，到逐世代。」

16

(THR) Mô͘-se án-ni kiâⁿ; lóng sī chiàu Iâ-hô-hoa só͘ hoan-hù i ê lâi kiâⁿ.

(BCL) 摩西按呢行，攏是照耶和華所吩咐伊的來行。

17

(THR) Tē-jī nî chiaⁿ-ge̍h chhoe-it, hōe-bō͘ chiū khiā-khí-lâi.

(BCL) 第二年正月初一，會幕就　起來。

18

(THR) Mô͘-se khiā hōe-bō͘ hē hiah-ê khū, khiā hiah-ê pán, chhng hiah-ê hôaiⁿ-kông, khiā hiah-ê thiāu.

(BCL) 摩西　會幕，下許個臼，　許個板，串許個橫楗　許個柱。

19

(THR) Tī hōe-bō͘ téng tah pò͘-pîⁿ, chiong pò͘-pîⁿ ê kòa, khàm tī i ê téng-bīn, sī chiàu Iâ-hô-hoa só͘ hoan-hù Mô͘-se-ê.

(BCL) 佇會幕頂搭布棚，將布棚的蓋蓋佇伊的頂面，是照耶和華所吩咐摩西的。

20

(THR) Koh ēng lu̍t-hoat hē tī kūi-lāi, ēng kǹg chhng tī kūi-nı̍h, hē si-un-só͘ tī kūi-téng.

(BCL) 閣用律法下佇櫃內，用槓串佇櫃裡，下施恩所佇櫃頂。

21

(THR) Kng kūi jı̍p hōe-bō͘, kòa jia-cha̍h ê tiùⁿ-lî, jia-cha̍h hoat-kūi, sī chiàu Iâ-hô-hoa só͘ hoan-hù Mô͘-se-ê.

(BCL) 扛櫃入會幕，掛遮截的帳簾，遮截法櫃，是照耶和華所吩咐摩西的。

22

(THR) Koh chiong toh hē tī hōe-bō͘-lāi, tī hōe-bō͘ ê pak-sì, tī tiùⁿ-lî gōa;

(BCL) 閣將桌下佇會幕內，佇會幕的北勢，佇帳簾外。

23

(THR) hit téng-bīn ēng piáⁿ pâi tī Iâ-hô-hoa ê bīn-chêng; sī chiàu Iâ-hô-hoa só͘ hoan-hù Mô͘-se-ê.

(BCL) 彼頂面用餅排佇耶和華的面前，是照耶和華所吩咐摩西的。

24

(THR) Koh hē teng-tâi tī hōe-bō͘-lāi, kap toh saⁿ-tùi, tī hōe-bō͘ ê lâm-pêng.

(BCL) 閣下燈台佇會幕內，及桌相對，佇會幕的南旁，

25

(THR) Tī Iâ-hô-hoa ê bīn-chêng tiám-teng; sī chiàu Iâ-hô-hoa só͘ hoan-hù Mô͘-se-ê.

(BCL) 佇耶和華的面前點燈，是照耶和華所吩咐摩西的。

26

(THR) Koh hē kim-tôaⁿ tī hōe-bō͘-lāi ê tiùⁿ-lî chêng;

(BCL) 閣下金壇佇會幕內的帳簾前，

27

(THR) tī hit téng-bīn sio phang-liāu ê hiuⁿ; sī chiàu Iâ-hô-hoa só͘ hoan-hù Mô͘-se-ê.

(BCL) 佇彼頂面燒芳料的香，是照耶和華所吩咐摩西的，

28

(THR) Koh kòa hōe-bō͘ mn̂g ê mn̂g-lî.

(BCL) 閣掛會幕門的門簾。

29

(THR) Tī chū-chı̍p ê hōe-bō͘ mn̂g-chêng, hē sio-chè ê tôaⁿ, chiong sio-chè kap sò͘-chè hiàn ti7hit téng-bīn; sī chiàu Iâ-hô-hoa só͘ hoan-hù Mô͘-se-ê.

(BCL) 佇聚集的會幕門前，下燒祭的壇，將燒祭及素祭獻佇彼頂面，是照耶和華所吩咐摩西的。

30

(THR) Hē sóe-tn̄g ê phûn tī hōe-bō͘ kap tôaⁿ ê tiong-kan, phûn-lāi tóe chúi, thang sóe-tn̄g.

(BCL) 下洗盪的盆佇會幕及壇的中間，盆內貯水，通洗盪。

31

(THR) Mô͘-se kap A-lûn kap i hiah-ê kiáⁿ, tī-hia sóe-chhiú sóe-kha.

(BCL) 摩西及亞倫及伊許個子佇遐洗手洗腳。

32

(THR) In jı̍p hōe-bō͘ ê sî, á-sī chiū-kūn tôaⁿ ê sî, chiū sóe; sī chiàu Iâ-hô-hoa só͘ hoan-hù Mô͘-se-ê.

(BCL) 入會幕的時抑是就近壇的時，就洗，是照耶和華所吩咐摩西的。

33

(THR) Tī hōe-bō͘ kap tôaⁿ ê sì-ûi, khiā tiùⁿ-ûi, iā kòa tiùⁿ-ûi mn̂g ê mn̂g-lî; án-ni Mô͘-se chiū ôan-kang.

(BCL) 佇會幕及壇的四圍　帳帷，也掛帳帷門的門簾。按呢，摩西就完工。

34

(THR) Hit-sî hûn jia-khàm hōe-bō͘, Iâ-hô-hoa ê êng-kng chhiong-móa hōe-bō͘.

(BCL) 彼時，雲遮蓋會幕，耶和華的榮光充滿會幕。

35

(THR) Mô͘-se bōe-ōe jı̍p hōe-bō͘, in-ūi hûn thêng tī hit téng-bīn; koh Iâ-hô-hoa ê êng-kng chhiong-móa tī hōe-bō͘.

(BCL) 摩西會入會幕；因為雲停佇彼頂面，閣耶和華的榮光充滿佇會幕。

36

(THR) Hûn tùi hōe-bō͘ siu chiūⁿ-khì ê sî, Í-sek-lia̍t lâng chiū khí-sin kiâⁿ in ê lō͘-chām.

(BCL) 雲對會幕收上去的時，以色列人就起身行的路站；

37

(THR) Hûn nā bô siu chiūⁿ-khì, in chiū bô khí-sin kiâⁿ, tı̍t-tı̍t kàu hûn siu chiūⁿ-khì.

(BCL) 雲若無收上去，就無起身行，直直到雲收上去。

38

(THR) Jı̍t-sî Iâ-hô-hoa ê hûn tī hōe-bō͘ téng, mî-sî hit tiong-kan ū hé, tī Í-sek-lia̍t chôan-ke ê ba̍k-chiu-chêng; tī in só͘ kiâⁿ ê lō͘-chām lóng sī.57

(BCL) 日時，耶和華的雲佇會幕頂；暝時，彼中間有火，佇以色列全家的目睭前。佇所行的路站攏是按呢。

Bible Color Mark

• 台語漢字羅馬本
• 巴克禮全羅