創世記 第 2 章

1

(THR) Thiⁿ tōe kap i it-chhè só͘-ū-ê í-keng chòe-ôan.

(BCL) 天地及伊一切所有的已經做完。

2

(THR) Tī tē-chhit jı̍t, Siōng-tè ôan I só͘ chō ê kang; chiū tī tē-chhit jı̍t hioh I it-chhè só͘ chō ê kang.

(BCL) 佇第七日，上帝完伊所造的工，就佇第七日息伊一切所造的工。

3

(THR) Siōng-tè sù-hok tī tē-chhit jı̍t, tēng chòe sèng-jı̍t; in-ūi tī chit-jı̍t Siōng-tè thêng I it-chhè chhòng-chō ê kang, chiū an-hioh.

(BCL) 上帝賜福佇第七日，定做聖日；因為佇此日，上帝停伊一切創造的工，就安息。

4

(THR) Thiⁿ tōe chhòng-chō ê lâi-le̍k, tī Iâ-hô-hoa Siōng-tè chō tōe kap thiⁿ ê jı̍t, chhin-chhiūⁿ ē-tóe.

(BCL) 天地創造的來歷，佇耶和華上帝造地及天的日，親像下底，

5

(THR) Soaⁿ-iá it-chhè ê chháu-ba̍k bē ū tī tōe-nı̍h; soaⁿ-iá it-chhè ê chhài-soe bē ū hoat; in-ūi Iâ-hô-hoa Siōng-tè bô lo̍h-hō͘ tī tōe-nı̍h, iā bô lâng thang chèng-choh hit ê thó͘-tōe.

(BCL) 山野一切的草木未有佇地裡，山野一切的菜蔬未有發；因為耶和華上帝無落雨佇地裡，也無人通種作彼個土地，

6

(THR) Chóng-sī ū bū tùi tōe khí, lūn-te̍k piàn tōe-bīn.

(BCL) 總是有霧對地起，潤澤遍地面。

7

(THR) Iâ-hô-hoa Siōng-tè ēng tōe-chiūⁿ ê thô͘-hún chhiau chòe lâng, pûn o̍ah ê khì jı̍p i ê phīⁿ-khang; lâng chiū chiâⁿ-chòe o̍ah ê lêng-hûn.

(BCL) 耶和華上帝用地上的土粉摶做人，歕活的氣入伊的鼻孔，人就成做活的靈魂。

8

(THR) Iâ-hô-hoa Siōng-tè tī tang-hng, tī Ai-tiân, chèng chı̍t ê hn̂g; chiong só͘ chō ê lâng hē tī-hia.

(BCL) 耶和華上帝佇東方佇伊甸種一個園，將所造的人下佇遐。

9

(THR) Iâ-hô-hoa Siōng-tè hō͘ ta̍k-iūⁿ ê chhiū tùi tōe-nı̍h hoat-khí-lâi, hó-khòaⁿ iā hó-chia̍h; tī hn̂g ê tiong-kan koh ū o̍ah-miā ê chhiū, kap hun-piat hó-pháiⁿ ê chhiū.

(BCL) 耶和華上帝互逐樣的樹對地裡發起來，好看也好食。佇園的中間閣有活命的樹及分別好歹的樹。

10

(THR) Ai-tiân ū hô lâu-chhut lâi kòan-ak hit ê hn̂g; tùi-hia hun-khui chòe sì-tiâu.

(BCL) 伊甸有河流出來，灌沃彼個園，對遐分開做四條：

11

(THR) Thâu-chı̍t-tiâu miâ-kiò Pí-sùn; chiū-sī se̍h-lâu tī Hap-hui-la̍h chôan-tōe-ê; tī-hia ū chhut kim;

(BCL) 頭一條名叫比遜，就是踅流佇哈腓拉全地的。佇遐有出金，

12

(THR) hit-ūi ê kim sī chin-hó; ia̍h chhut chin-chu phek-ge̍k.

(BCL) 彼位的金是真好；亦出真珠碧玉。

13

(THR) Tē-jī-tiâu miâ kiò Ki-hùn, chiū-sī se̍h-lâu tī Kó͘-sı̍t chôan-tōe-ê.

(BCL) 第二條名叫基訓，就是踅流佇古實全地的。

14

(THR) Tē-saⁿ-tiâu miâ-kiò Hi-tí-kiat, chiū-sī lâu tī A-su̍t ê tang-sì-ê. Tē-sì-tiâu chiū-sī Pek-lat.

(BCL) 第三條名叫希底結，就是流佇亞述的東勢的。第四條就是伯拉。

15

(THR) Iâ-hô-hoa Siōng-tè chiong hit ê lâng hē tī Ai-tiân hn̂g, lâi chèng-choh kò͘-siú.

(BCL) 耶和華上帝將彼個人下佇伊甸園，來種作顧守。

16

(THR) Iâ-hô-hoa Siōng-tè hoan-hù hit ê lâng kóng, Hn̂g-lāi ta̍k-hō chhiū ê ké-chí, thang sûi-ì lâi chia̍h.

(BCL) 耶和華上帝吩咐彼個人講：「園內逐號樹的果子，通隨意來食，

17

(THR) Chóng-sī hun-piat hó-pháiⁿ ê chhiū, i ê ké-chí m̄-thang chia̍h; in-ūi chia̍h ê jı̍t lí tek-khak sí.

(BCL) 總是分別好歹的樹，伊的果子呣通食，因為食的日你的確死！」

18

(THR) Iâ-hô-hoa Siōng-tè kóng, Lâng toaⁿ-sin ka-kī tòa m̄-hó; Góa beh kā i chō chı̍t ê pang-chān-ê, lâi phit-phòe i.

(BCL) 耶和華上帝講：「人單身家己住呣好，我欲給伊造一個幫助者來匹配伊。」

19

(THR) Iâ-hô-hoa Siōng-tè ēng thô͘ chòe soaⁿ-iá ta̍k-iūⁿ ê cháu-siù, í-kı̍p khong-tiong ta̍k-iūⁿ ê pe-chiáu; chhōa kàu hit-lâng ê bīn-chêng, khòaⁿ i beh chheng in sím-mı̍h miâ; kìⁿ-nā i só͘ chheng ta̍k-iūⁿ o̍ah-mı̍h-ê, chiū chòe hit ê mı̍h ê miâ.

(BCL) 耶和華上帝用土做山野逐樣的走獸以及空中逐樣的飛鳥，導到彼人的面前，看伊欲稱甚麼名。見若伊所稱逐樣活物的，就做彼個物的名。

20

(THR) Hit ê lâng chiū kā it-chhè ê cheng-siⁿ, kap khong-tiong ê pe-chiáu, kap soaⁿ-iá it-chhè ê cháu-siù lóng hō miâ; chóng-sī chhē bô chı̍t-ê thang chòe hit lâng ê pang-chān, lâi phit-phòe i.

(BCL) 彼個人就給一切的精牲及空中的飛鳥、及山野一切的走獸攏號名；總是尋無一個通做彼人的幫助來匹配伊。

21

(THR) Iâ-hô-hoa Siōng-tè hō͘ hit ê lâng khùn tāng-bîn, i chiū khùn; chiū the̍h i ê hia̍p-kut chı̍t-ki, pau-ba̍t i ê bah.

(BCL) 耶和華上帝互彼個人睏重眠，伊就睏；就提伊的脅骨一支，包密伊的肉。

22

(THR) Iâ-hô-hoa Siōng-tè chiū chiong tùi hit-lâng só͘ the̍h-chhut ê hia̍p-kut, chō-chiâⁿ chı̍t ê cha-bó͘-lâng, chhōa lâi chiū-kūn hit-lâng.

(BCL) 耶和華上帝就將對彼人所提出的脅骨造成一個查某人，導來就近彼人。

23

(THR) Hit-lâng kóng, Taⁿ chit-ê sī góa kut-lāi ê kut, bah-lāi ê bah; beh chheng-chòe cha-bó͘-lâng, in-ūi i sī tùi ta-po͘-lâng the̍h-chhut.

(BCL) 彼人講：今此個是我骨內的骨，肉內的肉，欲稱做「查某人」，因為伊是對「查甫人」提出。

24

(THR) Só͘-í lâng beh lī-khui i ê pē-bú, kiat-liân i ê bó͘, in chiū chiâⁿ-chòe chı̍t-thé.

(BCL) 所以，人欲離開伊的父母，結聯伊的某，就成做一體。

25

(THR) Ang-bó͘ nn̄g-lâng pîⁿ-pîⁿ thǹg-pak-theh, iā bô kiàn-siàu.

(BCL) 翁某二人平平褪腹裼，也無見誚。

Bible Color Mark

• 台語漢字羅馬本
• 巴克禮全羅